अयोध्येत राम मंदिर झाले ही आनंदाची बाब आहे. राम मंदिर उभारणीकरिता सर्वांनी योगदान दिले आहे. मात्र, मी राम मंदिर उद्घाटन सोहळ्याला जाणार नाही असे शरद पवार यांनी स्पष्ट केले.
‘अयोध्येत राम मंदिर झाले ही आनंदाची बाब आहे. या मंदिराच्या उभारणीत साऱ्यांचे योगदान आहे. या मंदिराच्या लोकार्पण सोहळ्याचे निमंत्रण अजूनपर्यंत आलेले नाही; पण मी जाणारदेखील नाही,’ अशी स्पष्टोक्ती राष्ट्रवादी काँग्रेसचे अध्यक्ष शरद पवार यांनी दिली. ‘श्रद्धेच्या ठिकाणी जाण्यासाठी कुणाच्या निमंत्रणाची गरज नसते,’ अशी पुष्टीही त्यांनी जोडली.
डॉ. पंजाबराव देशमुख यांच्या १२५व्या जयंती सोहळ्यानिमित्त बुधवारी अमरावतीला आले असता पवार यांनी पत्रकारांशी संवाद साधला. ते म्हणाले, ‘पाच राज्यांच्या विधानसभा निवडणुकीत महाविकास आघाडीला अपेक्षित यश मिळाले नाही, हे मान्य आहे. या निकालाचा लोकसभा निवडणुकीवर परिणाम होणार नाही. संसदेत घुसखोरी करणारे युवक कुणाच्या सांगण्यावरून शिरले होते, त्यांना कुणी प्रवेश मिळवून दिला या विषयावर सरकारने माहिती द्यावी ही खासदारांनी मागणी होती. यात चुकीचे काहीही नव्हते. सरकारला संसदेत माहिती द्यायची नसल्याने १४७ खासदारांना निलंबित करण्यात आले. संसदेच्या इतिहासात पहिल्यांदाच हे घडले.’
जागावाटप ठरलेले नाही
‘महाविकास आघाडीत काँग्रेस, शिवसेना (ठाकरे गट) आणि राष्ट्रवादी काँग्रेस असे तीन मुख्य घटक पक्ष आहेत. कुणाला कुठली जागा मिळणार, दिली जाणार याविषयी अजून तरी काहीही ठरलेले नाही. जागावाटपासंदर्भात तिन्ही पक्षांचे नेते बसून लवकरच चर्चा करणार आहेत. तिथेच जागावाटपाचे सूत्र निश्चित होईल. हेच सूत्र पुढे ‘इंडिया’साठीही वापरले जाणार,’ असेही पवार म्हणाले. मागील लोकसभा निवडणुकीत अमरावतीची जागा राष्ट्रवादीच्या वाट्याला आली होती. नंतर ही जागा आम्ही सहकारी मित्राला दिली होती. आगामी निवडणुकीत अमरावतीच्या जागेविषयीचा कुठलाही निर्णय झालेला नाही. तिन्ही पक्षांच्या बैठकीतच अमरावतीचा निर्णय घेतील, असेही पवार यांनी सांगितले.
जिंकेल त्याची जागा हे आमचे सूत्र
महाविकास आघाडीमध्ये जागावाटपाबाबत कोणतीही ओढाताण नसल्याचे स्पष्टीकरण संजय राऊत यांनी बुधवारी दिले. जागावाटपाबाबत ज्या चर्चा आहेत, त्या आम्ही फक्त वर्तमानपत्रातून वाचत आहोत. आमच्यात जागावाटपावरून कोणतीही ओढाताण भविष्यातही होणार नाही. निवडून येण्याची क्षमता आणि उत्तम उमेदवार यावर आमचा भर असून, जिंकेल त्याची जागा या सूत्रावर तिन्ही पक्षांचे एकमत झाले आहे, अशी माहिती संजय राऊत यांनी बुधवारी दिली. काँग्रेस, राष्ट्रवादी काँग्रेस आणि शिवसेना उद्धव बाळासाहेब ठाकरे या तिन्ही पक्षांत या भूमिकेबाबत एकमत आहे. याबाबत राहुल गांधी, मल्लिकार्जुन खर्गे आणि शरद पवार यांचेही एकमत झाले आहे. उद्धव ठाकरे यांनीही त्याला मान्यता दिली असून या सूत्रानुसारच आम्ही पुढे जात असल्याचे राऊत म्हणाले. प्रकाश आंबेडकर यांनाही याबाबत कल्पना देण्यात आल्याचे त्यांनी या वेळी नमूद केले.
