मालक दिवाळखोर, कंपनी तोट्यात, शेअर करतोय दणक्यात कमाई… अल्पावधीत दिला मजबूत परतावा

कर्जबाजारी उद्योगपती अनिल अंबानी यांच्या रिलायन्स इन्फ्रास्ट्रक्चर कंपनीच्या शेअरने यावर्षी बाजारातील गुंतवणूकदारांना लक्षणीय परतावा दिला असून शुक्रवारी, वर्षाच्या शेवटच्या व्यवहार दिवशी, कंपनीच्या शेअर्सनी १०% झेप घेतली आणि सुमारे २१० रुपयांचा पल्ला गाठला.

भारतीय शेअर बाजारात सूचिबद्ध कर्जबाजारी उद्योगपती अनिल अंबानी यांच्या बहुतेक कंपन्या दिवाळखोरीत गेल्या आहेत. मात्र, अजूनही त्यांच्या बहुतांश कंपन्या सकारात्मक परतावा नोंदवत आहे. यापैकी एक म्हणजे रिलायन्स इन्फ्रास्ट्रक्चरचा शेअर आहे, ज्याने वर्षभरात सकारात्मक वाढ नोंदवली. अनिल अंबानींच्या या कंपनीच्या शेअर्सनी १०% झेप घेतली आणि वर्षाच्या शेवटच्या ट्रेडिंग दिवशी म्हणजेच शुक्रवार, २९ डिसेंबर रोजी प्रति शेअर २०९.८५ रुपयांवर बंद झाले.

या स्टॉकचा उच्चांक २३२ रुपये प्रति शेअर आणि नीचांकी ११४.६० रुपये आहे. विशेष म्हणेज गेल्या एका महिन्यात या स्टॉकची किंमत १८९ रुपये होती जी आता २१० रुपयांच्या आसपास पोहोचली आहे. या कालावधीत अनिल अंबानींच्या कंपनीच्या शेअर्सनी १०.५९ टक्के परतावा दिला असून रिलायन्स इन्फ्रास्ट्रक्चरने यावर्षी गुंतवणूकदारांना चांगला परतावा दिला. रिलायन्स इन्फ्रास्ट्रक्चरच्या शेअरमध्ये सहा महिन्यांत ५१% तेजी नोंदवली.

वर्षभरात किती वाढली किंमत?
जानेवारी २०२३ मध्ये रिलायन्स इन्फ्रास्ट्रक्चरचे शेअर्स १३७ रुपयांवर ट्रेंड करत होते जे शुक्रवारी, २९ डिसेंबर रोजी २०९.८५ रुपयांवर क्लोज झाले. अशाप्रकारे अनिल अंबानींच्या या कंपनीने ५२.२३ टक्के रिटर्न दिला असून एका वर्षात स्टॉकने ५२.४०% झेप घेतली. पाच वर्षांपूर्वी शेअर ३०० रुपयांवर व्यवहार करत होता, तर गेल्या पाच वर्षांत शेअरने २९.३०% नकारात्मक परतावा नोंदवला.

एकेकाळी दोन हजार रुपये होती किंमत
रिलायन्स इन्फ्राच्या शेअरची किंमत ११ जानेवारी २००९ रोजी २,४८५ रुपये जो स्टॉकचा उच्चांक आहे. यानंतर कंपनीच्या शेअर्समध्ये मोठी पडझड नोंदवली गेली आणि कंपनीच्या शेअरच्या किमतीत झपाट्याने घट झाली. ऑक्टोबर २००८ मध्ये कंपनीच्या शेअर्सची किंमत ४५७ रुपये होती जी २७ मार्च २०२० रोजी रिलायन्स इन्फ्रास्ट्रक्चरचे शेअर्स ९ रुपयांपर्यंत घसरले. तेव्हापासून शेअर्सनी सकारात्मक वाढ सुरू ठेवली आणि आता २०० रुपयांची पातळी ओलांडली आहे.

वर्षाच्या शेवटी बाजारात पडझड
२०२३ वर्षाच्या शेवटच्या व्यवहार दिवशी म्हणजे शुक्रवार, २९ डिसेंबर रोजी भारतीय स्टॉक मार्केट घसरणीत बंद झाला. BSE सेन्सेक्स ०.२३% किंवा १७० अंकांनी घसरून ७२,२४० अंकांवर बंद झाला तर, NSE निफ्टी ०.२२% किंवा ४७.३० अंकांनी पडला आणि २१,७३१ पातळीवर स्थिरावला. विशेष म्हणजे वर्षभरात शेअर बाजाराने नवनवीन उच्चांक नोंदवले.