तभा फ्लॅश न्यूज/ विकास वाघ : कळंब तालुक्यातील शिराढोण येथे राजमाता पुण्यश्लोक अहिल्यादेवी होळकर यांच्याविषयी फेसबुकवर आक्षेपार्ह आणि अश्लील भाषा वापरत केलेल्या टिपणीमुळे संतापाची लाट उसळली आहे. समाजातील भावना दुखावणाऱ्या या प्रकाराविरोधात समस्त धनगर समाजाच्या वतीने शिराढोण पोलीस ठाण्यात संबंधित व्यक्तीविरोधात कठोर कारवाईची मागणी करत निवेदन सादर करण्यात आले आहे.
दि. १८ जुलै २०२५ रोजी फेसबुकवर सुनील गोपाळराव उभे (मो. ९९७५५५३९८५) या व्यक्तीने राजमाता अहिल्यादेवी होळकर यांच्याविषयी अत्यंत आक्षेपार्ह शब्दांत टिप्पणी केल्याचा आरोप निवेदनकर्त्यांनी केला आहे. या वक्तव्यामुळे धनगर समाजातील नागरिकांची धार्मिक व सामाजिक भावना तीव्र दुखावली असून, गावात रोषाचे वातावरण निर्माण झाले आहे.
समाजबांधवांच्या म्हणण्यानुसार, इतिहासातील थोर महापुरुष आणि महिलांविषयी अशा प्रकारे अवमानकारक भाषेत टिप्पणी करून समाजात तेढ निर्माण करण्याचा प्रयत्न करण्यात येत आहे. त्यामुळे संबंधित व्यक्तीवर कठोरात कठोर कारवाई करण्यात यावी, अशी मागणी एपीआय धरणीधर कोळेकर यांना दिलेल्या निवेदनात करण्यात आली आहे.
तसेच निवेदनकर्त्यांनी स्पष्ट इशारा दिला आहे की, २५ जुलै २०२५ पर्यंत जर सदर व्यक्तीवर कायदेशीर कारवाई झाली नाही, तर सकल धनगर समाज, शिराढोण यांच्यावतीने तीव्र आंदोलन व निषेध मोर्चा काढण्यात येईल.
