सोलापूर : पंतप्रधान नरेंद्र मोदी यांनी इंधन बचत, पर्यावरण संवर्धन आणि शाश्वत जीवनशैलीचा अवलंब करण्याबाबत केलेल्या आवाहनाला प्रतिसाद देत महानगरपालिकेच्या वतीने दर सोमवार हा दिवस ‘नो व्हेईकल डे म्हणून राबविण्यात येत आहे. त्यानुसार महापौर विनायक कोंड्याल आणि उपमहापौर ज्ञानेश्वरी देवकर हे ई-बाईकवरून महापालिकेत आले. सभागृह नेते नरेंद्र काळे
थेट सायकलवरून आले. तर अतिरिक्त आयुक्त संदीप कारंजे हे पायी चालत महापालिकेत आल्याचे पाहायला मिळाले.
आखाती युद्धजन्य परिस्थितीमुळे पेट्रोल, डिझेल व इतर इंधनाचा काटकसरीने आणि गरजेपुरता वापर व्हावा, तसेच वाढते वायू प्रदूषण आणि जागतिक तापमानवाढ यावर नियंत्रण मिळवण्यासाठी सोलापूर महानगरपालिकेने महत्त्वपूर्ण पाऊल उचलले आहे.या उपक्रमाचा एक भाग म्हणून सोलापूर महानगरपालिकेतील सर्व पदाधिकारी, अधिकारी आणि कर्मचाऱ्यांसाठी दर सोमवार हा दिवस महापौर विनायक कोंड्याल यांनी ‘नो व्हेईकल डे’ म्हणून घोषित केला होता. या दिवशी खाजगी तसेच शासकीय वाहनांचा वापर टाळून सार्वजनिक वाहतूक, सायकल, ई-वाहने किंवा पायी कार्यालयात येण्यास प्राधान्य देण्याचे आवाहन केले होते.
ही घोषणा कृतीत उतरवत आज महापौर विनायक कोंड्याल हे हेल्मेट घालून ई-बाईकवरून सोलापूर महापालिकेत दाखल झाले. गाडीवर त्यांच्यासमवेत माजी नगरसेवक दीपक राजगे होते. जुनी मिल चाळ येथील निवासस्थानापासून रखरखत्या उन्हात दुपारी 12.15 वाजता महापौर विनायक कोंड्याल हे ई-बाईकवरून महापालिकेत आले. दरम्यान, पर्यावरणवादी उपमहापौर ज्ञानेश्वरी देवकर या ई-बाईकवरून सकाळी 11.32 वाजता महापालिकेत दाखल झाल्या. तर सभागृहनेते नरेंद्र काळे हे थेट सायकलवरून 11.28 महापालिकेत आल्याचे पाहायला मिळाले. त्याचबरोबर नगरसेवक सत्यनारायण गुर्रम , विजय चिप्पा यांनीही ई बाईकवरून येत आवाहनाला प्रतिसाद दिला.
दरम्यान, या आवाहनास अधिकारी व कर्मचाऱ्यांमधून म्हणावा तसा प्रतिसाद मिळाला नसल्याचे दिसून आले याबाबत महापौरांना विचारले असता आदेश काढून सर्वांना सूचना केल्या जातील. पर्यावरण रक्षण आणि देशहितासाठी हा उपक्रम महत्त्वपूर्ण असल्याचे महापौरांनी स्पष्ट केले. महापालिकेतील पदाधिकारी, नगरसेवक, नगरसेविका, अधिकारी, कर्मचारी तसेच सोलापूर शहरातील नागरिकांनी या उपक्रमात उत्स्फूर्त सहभाग नोंदवावा. सर्व नागरिकांनी या विधायक उपक्रमात सहभागी होऊन देशहितासाठी आणि पर्यावरण संवर्धनासाठी आपले योगदान देण्याचे आवाहन महापौर विनायक कोंड्याल यांनी केले आहे.
पर्यावरणपूरक जीवनशैली स्वीकारणे
काळाची गरज : महापौर कोंड्याल
यावेळी महापौर विनायक कोंड्याल म्हणाले की, पंतप्रधान नरेंद्र मोदी यांनी दिलेल्या संदेशानुसार आपण सर्वांनी पर्यावरणपूरक जीवनशैली स्वीकारणे काळाची गरज आहे. ‘नो व्हेईकल डे’ हा उपक्रम फक्त एक दिवसापुरता मर्यादित नसून भविष्यातील पिढ्यांसाठी स्वच्छ आणि निरोगी वातावरण निर्माण करण्याचा संकल्प आहे. सोलापूरकरांनी या मोहिमेला सकारात्मक प्रतिसाद देऊन शहराला प्रदूषणमुक्त करण्यासाठी सहकार्य करावे. या निर्णयामुळे इंधन बचत, वाहतूक कोंडी कमी होणे, वायू प्रदूषणावर नियंत्रण आणि नागरिकांमध्ये पर्यावरण जनजागृती निर्माण होण्यास मोठी मदत होणार आहे.
अतिरिक्त आयुक्त संदीप कारंजे आले पायी चालत
महापौरांच्या आवाहनाला प्रतिसाद देत अतिरिक्त आयुक्त संदीप कारंजे हे आपल्या वसंत विहार परिसरातील घरापासून थेट महापालिकेत पायी चालत आले. भर उन्हात पर्यावरणाचा संदेश देत ते महापालिकेत दाखल झाले. एका हातात डायरी आणि दुसऱ्या हातात पाण्याची बाटली घेऊन ते चालत आले. या माध्यमातून त्यांनी कृतीतून इतर कर्मचारी- अधिकाऱ्यांना सकारात्मक आणि प्रेरक संदेश दिला आहे.
