मराठी सिनेसृष्टीची आघाडीची अभिनेत्री म्हणून प्रिया बापटला ओळखले जाते. बालकलाकार म्हणून आपल्या करिअरची सुरुवात करणाऱ्या प्रियाने आतापर्यंत अनेक उत्कृष्ट मालिका, सिनेमा, नाटक आणि वेब सीरिजमध्ये काम केले आहे. प्रिया सोशल मीडियावर खूप सक्रिय असते.
सोशल मीडियावर प्रिया बापटचे अनेक फॉलोअर्स आहेत. तिच्या प्रत्येक फोटो आणि व्हिडिओवर चाहते कमेंट करत असतात. पण काही दिवसांपूर्वी तिने पोस्ट केलेल्या बिकीनीवरील पोस्टवरुन बराच गदारोळ झालेला. तसेच एका वेब सिरीजमध्ये प्रियाने बरेच इंटिमेट सीन दिले आहेत. त्यावरुन ही बरीच चर्चा झाली. या सर्व प्रकारावर तिच्या घरच्यांची प्रतिक्रिया काय होती यावर अभिनेत्रीने भाष्य केले आहे.
प्रिया म्हणाली की, “त्या बोल्ड सीनपासून ते आता मी ऑस्ट्रेलियात बिकिनी घालून फोटोशूट केलं तिथपर्यंत या काळात मला लोकांचे बरेच अनुभव आले. आमच्या प्रियाने असं नाही करायला पाहिजे होतं, आमची प्रिया साडीतच छान दिसते अशा अनेक प्रतिक्रिया मला ऐकायला मिळाल्या. ‘सिटी ऑफ ड्रीम्स’च्या त्या बोल्ड सीननंतर तर मला लोकांचं प्रचंड ऐकायला लागलं होतं.”
“आपण समाज म्हणून एखाद्या कलाकाराकडे कलाकार म्हणूनच पाहिलं पाहिजे. लोक मला आपलं समजतात…त्यांच्या घरातल्यासारखं समजतात ही खूप चांगली गोष्ट आहे. मग त्या सगळ्या लोकांना मी असं जरुर सांगेन की, माझ्या घरच्यांना या सगळ्याचा अजिबात त्रास होत नाहीये …त्यांना याबद्दल काहीच समस्या नाहीये. माझं हे काम आहे ही गोष्ट त्यांनी समजून घेतली आहे. माझे आई-बाबा, माझा नवरा यांना काहीच अडचण नव्हती. त्या सगळ्यांनी माझ्या कामाचा एक भाग म्हणून या सगळ्या गोष्टी आनंदाने स्वीकारल्या आहेत…जबरदस्तीने नाहीत.”
‘सिटी ऑफ ड्रीम्स’ रिलीज झाल्यावर ती क्लिप सगळीकडे व्हायरल होत होती. मला सुरुवातीला काहीच कल्पना नव्हती कारण, मी प्रमोशनमध्ये व्यग्र होते. मला ज्या क्षणी ती क्लिप दिसली, तेव्हा मी सगळ्यात आधी बाबांना फोन केला त्यांना सगळी कल्पना दिली. तुम्हाला माझी लाज नाही ना वाटत? असंही मी त्यांना विचारलं. त्यावर माझ्या बाबांनी एका शब्दात मला उत्तर दिलेलं, ते म्हणजे हा सगळा तुझ्या कामाचा एक भाग आहे. तू काम म्हणून हे स्वीकारलंस यात आम्हाला काहीच गैर वाटत नाही. तू दुर्लक्ष कर…विसरुन जा!”
“ऑस्ट्रेलियातील बिकिनी शूटबद्दल सांगताना प्रिया म्हणाली, ते फोटो माझ्या वडिलांनी पाहिले… त्यांचं काहीच म्हणणं नव्हतं. मला असं वाटतं आपण कलाकारांना आपल्याला हव्या त्या सोयीच्या साचात पाहत असतो आणि असं करणं योग्य नाही. बॉलिवूड-हॉलीवूड सिनेमामधील कलाकारांच्या भूमिकांना तुम्ही पात्र म्हणून बघता आणि हेच काम तुमच्या मराठी मुलीने केलं तर संस्कृती आड का येते? एका मराठी मुलीने साकारलेल्या पात्राचा अभिमान तुम्हाला का वाटत नाही? पण, अशा चर्चा तेवढ्या काळापुरत्याच होतात त्यानंतर होत नाही. कोणत्या गोष्टीला महत्त्व द्यायचं हे आपल्या हातात असतं.”
प्रियाच्या कामाबद्दल बोलायचे झाल्यास तिचे जर तरची गोष्ट हे नाटक रंगभूमीवर तुफान चालू आहे. तसेच लवकरच ती नवाजुद्दीन सिद्दीकीसोबत बॉलिवूड सिनेमातही दिसणार आहे.
