वैराग – ‘लालपरी’चा प्रवास सुखकर आणि सुरक्षित मानला जात असला, तरी सध्या बार्शी-वैराग-सोलापूर मार्गावरील प्रवाशांसाठी हा प्रवास म्हणजे निव्वळ मनस्ताप आणि चिंतेची बाब ठरत आहे. प्रशासनाच्या बेजबाबदारपणाची हद्द म्हणजे, काल ज्या ठिकाणी एसटी बस बंद पडली होती, अगदी त्याच शेळगाव शिवारात आज पुन्हा अवघ्या ५० मीटर अंतरावर दुसरी एसटी बस अचानक नादुरुस्त होऊन बंद पडली. परिसरात हलका पाऊस आणि ढगाळ वातावरण असताना, सलग दुसऱ्या दिवशी झालेल्या या प्रकारामुळे संतप्त झालेल्या प्रवाशांना रस्त्याच्या कडेला तासनतास दुसऱ्या बसची वाट पाहत उभे राहावे लागले. एसटी प्रशासनाच्या या ढिसाळ कारभाराविरोधात आता प्रवाशांमधून तीव्र संताप व्यक्त होत आहे.
सलग दुसऱ्या दिवशी ‘तीच’ पुनरावृत्ती; प्रवासी वाऱ्यावर!
मिळालेल्या माहितीनुसार, आज दुपारी सोलापूर रस्त्यावरील शेळगाव जवळ प्रवाशांनी गच्च भरलेली एसटी बस अचानक रस्त्यातच निकामी झाली. चालक आणि वाहकाने बस सुरू करण्यासाठी शर्थीचे प्रयत्न केले, मात्र खिळखिळी झालेली बस जागची हलली नाही. विशेष म्हणजे, कालही याच परिसरात एसटीने प्रवाशांना दगा दिला होता आणि आज पुन्हा तोच प्रकार घडल्याने प्रवाशांच्या संयमाचा बांध सुटला.
आज परिसरात हलका पाऊस पडत असल्याने आणि आकाश ढगाळ असल्याने प्रवाशांचे हाल अधिकच वाढले. पावसापासून बचाव करण्यासाठी आणि पुढचा प्रवास कधी सुरू होईल या चिंतेत, लहान मुले, महिला आणि वृद्ध प्रवाशांना रस्त्याच्या कडेला असलेल्या झाडांचा आसरा घ्यावा लागला. लोक अत्यंत हताशपणे दुसऱ्या बसची वाट पाहत उभे राहिलेले चित्रात स्पष्ट दिसत आहेत. एकीकडे प्रवासी वेळेवर पोहोचण्यासाठी संपूर्ण तिकीट काढतात आणि दुसरीकडे प्रशासनाच्या नाकर्तेपणामुळे त्यांना भरपावसात रस्त्यावर ताटकळत राहावे लागत आहे.
भंगार गाड्या आणि प्रशासनाची कायमची अनास्था
सोलापूर-बार्शी-वैराग हा अत्यंत वर्दळीचा आणि महत्त्वाचा मार्ग आहे. मात्र, या मार्गावर नेहमीच जुन्या, नादुरुस्त, आणि देखभालीअभावी खिळखिळ्या झालेल्या भंगार दर्जाच्या बसेस प्रवाशांच्या माथी मारल्या जातात. पावसाळा सुरू झाला तरी या गाड्यांची योग्य दुरुस्ती करण्यात आलेली नाही. कधी टायर पंक्चर होणे, तर कधी इंजिनमध्ये बिघाड होणे अशा तांत्रिक अडचणी या मार्गावर आता ‘नित्याचीच बाब’ बनल्या आहेत. सलग दोन दिवस एकाच गावात अवघ्या काही मीटरच्या अंतरावर दोन वेगवेगळ्या बसेस बंद पडणे, हा एसटी महामंडळाच्या ढिसाळ नियोजनाचा जिवंत पुरावा आहे.
“आम्ही नियमित तिकीट काढतो, मग ही रखडपट्टी का?” – प्रवाशांचा संतप्त सवाल
“कालही या मार्गावर गाडी खराब झाली आणि आज आम्ही ज्या गाडीने निघालो, तीही शेळगावमध्येच बंद पडली. रिमझिम पाऊस सुरू आहे, तासनतास दुसरी गाडी येत नाही, मुले सोबत आहेत. आम्ही काय मोफत प्रवास करतो का? परिवहन मंत्री आणि एसटी महामंडळ या मार्गावरील प्रवाशांच्या जीवाशी खेळ कधी थांबवणार?” अशी संतप्त प्रतिक्रिया अडकून पडलेल्या प्रवाशांनी व्यक्त केली.
दररोज चालणाऱ्या या रखडपट्टीमुळे आणि प्रशासनाच्या ढिम्म कारभारामुळे प्रवाशांमध्ये आणि स्थानिक जनतेमध्ये तीव्र नाराजी पसरली आहे. सलग दुसऱ्या दिवशी झालेल्या या प्रकारानंतर तरी एसटी प्रशासन झोपेतून जागे होऊन या मार्गावर चांगल्या बसेस सोडणार का? की प्रवाशांना रोज अशीच पाऊस-पाण्यात नरकयातना सोसावी लागणार? याकडे आता संपूर्ण बार्शी-वैराग पट्ट्यातील जनतेचे ल
