सोलापूर : वापर परवाना उपलब्ध नसल्याच्या कारणामुळे नवीन मिळकतींची मालमत्ता कर आकारणी प्रलंबित ठेवू नये, असे स्पष्ट निर्देश सोलापूर महानगरपालिका आयुक्त डॉ. सचिन ओम्बासे यांनी दिले आहेत. त्यामुळे अपार्टमेंटमधील फ्लॅट तसेच गाळ्यांच्या कर आकारणीला गती मिळणार असून, बिल्डरने कर आकारणी करून घेतली नसलेल्या फ्लॅटधारकांना दिलासा मिळणार आहे.
महापालिका हद्दीतील नवीन मिळकतींचा शोध घेऊन त्यांची मालमत्ता कर आकारणी करण्याच्या कामाला गती देण्यात आली आहे. यासाठी संबंधित कर निरीक्षक व वसुली लिपिकांशी चर्चा करून उद्दिष्ट व कालमर्यादा निश्चित करण्यात आली आहे. या कामाचा वेळोवेळी आढावा घेतला जात असून, दिलेल्या उद्दिष्टानुसार काम न करणाऱ्या संबंधित कर्मचाऱ्यांवर दंडात्मक कारवाई करण्यात येणार आहे.नवीन मिळकतींच्या सर्वेक्षण व कर आकारणीच्या आढाव्यात काही प्रकरणांत वापर परवाना उपलब्ध नसल्याने तसेच अन्य कारणांमुळे कर आकारणी झालेली नसल्याचे निदर्शनास आले. त्यामुळे नागरिकांच्या मिळकती कर आकारणीच्या कक्षेत आणण्यासाठी आयुक्तांनी स्पष्ट निर्देश दिले आहेत.
ज्या मिळकतीला बांधकाम परवाना मिळालेला आहे मात्र वापर परवाना घेतलेला नाही, अशा मिळकतीची मालमत्ता कर आकारणी करावी. बांधकाम परवाना मिळाल्यापासून आदेशात नमूद केलेल्या एक वर्षाच्या कालावधीचा विचार करून कर आकारणी करण्याचे निर्देश आयुक्तांनी दिले आहेत.
बिल्डरने कर आकारणी केली नसेल तर…
अपार्टमेंट इमारतीचा वापर परवाना नसल्यामुळे बिल्डरने फ्लॅटची मालमत्ता कर आकारणी करून घेतली नसेल, तर कर आकारणी प्रलंबित ठेवू नये. अशा प्रकरणात फ्लॅट खरेदी केल्याची तारीख किंवा संबंधित फ्लॅटचे लाईट बिल घेतल्याची तारीख, यापैकी लागू होणाऱ्या तारखेपासून मालमत्ता कर आकारणी करावी. तसेच संबंधित व्यक्तीची नोंद भोगवटादार म्हणून करण्याचे निर्देश देण्यात आले आहेत.त्यामुळे फ्लॅट वापरात असूनही केवळ वापर परवाना उपलब्ध नसल्यामुळे मालमत्ता कर आकारणी झालेली नसल्यास फ्लॅटधारकांनी आवश्यक कागदपत्रांसह महापालिकेच्या कर विभागाशी संपर्क साधावा, असे आवाहन केले आहे.
बिल्डरच्या नावावर आधीच कर आकारणी असल्यास
एखाद्या अपार्टमेंटमधील फ्लॅटची मालमत्ता कर आकारणी मूळ मालक अथवा बिल्डरच्या नावावर झालेली आहे मात्र इमारतीचा वापर परवाना उपलब्ध नाही, अशा प्रकरणातही केवळ या कारणामुळे कर आकारणीची नोंद प्रलंबित ठेवू नये.मिळकतधारकाकडून वापर परवाना अथवा अन्य कारणांमुळे कर आकारणी करून घेतली नसल्यास मूळ मालक अथवा बिल्डरचे नाव मालकी हक्काच्या नोंदीत कायम ठेवून प्रत्यक्ष वापर करणाऱ्या व्यक्तीचे नाव भोगवटादार म्हणून नोंदवावे, असे निर्देश देण्यात आले आहेत.
नागरिकांनी काय करावे ?
फ्लॅट, गाळा किंवा नवीन मिळकत खरेदी करून वापर सुरू केलेल्या नागरिकांनी आपल्या मिळकतीची मालमत्ता कर नोंद झाली आहे की नाही, याची खात्री करावी. कर आकारणी झालेली नसल्यास संबंधित कर विभागाशी संपर्क साधून आवश्यक कागदपत्रे सादर करावीत.यासाठी फ्लॅट खरेदीची तारीख, लाईट बिलाची तारीख, मालकी हक्काची कागदपत्रे तसेच उपलब्ध बांधकाम अथवा परवानगीशी संबंधित कागदपत्रे सोबत ठेवावीत. नवीन मिळकतींची कर आकारणी ही महापालिकेच्या उत्पन्नाच्या दृष्टीने महत्त्वाची असून, प्रत्येक नागरिकाच्या मालमत्तेची अधिकृत कर नोंद होण्यासाठीही आवश्यक आहे. त्यामुळे नागरिकांनी आपल्या मिळकतीची कर आकारणी व नोंदणी अद्ययावत करून घ्यावी, असे आवाहन महापालिका आयुक्त डॉ. सचिन ओम्बासे यांनी केले आहे.
