बार्शी – शहरातील शिवशक्ती मैदान येथे सुरु असलेल्या क्रिकेट समर कॅम्पमध्ये झालेल्या गंभीर अपघातात १५ वर्षीय आरव ऊर्फ विरेन योगीराज चौधरी या विद्यार्थ्याचा मृत्यू झाल्याची दुर्दैवी घटना घडली आहे. या प्रकरणी मृत मुलाचे वडील योगीराज नारायण चौधरी यांनी संबंधित आयोजक, प्रशिक्षक व जबाबदार व्यक्तींविरोधात बार्शी शहर पोलीस ठाण्यात गुन्हा दाखल करण्यात आला आहे.
पोलीसांकडून मिळालेल्या माहितीनुसार, आरव ऊर्फ विरेन चौधरी हा बार्शी येथील सुलाखे हायस्कूलमध्ये नववी इयत्तेत शिक्षण घेत होता. उन्हाळी सुट्टीनिमित्त मातृभूमी प्रतिष्ठान बार्शी व बार्शी तालुका क्रिकेट असोसिएशन यांच्या संयुक्त विद्यमाने आयोजित करण्यात आलेल्या क्रिकेट समर कॅम्पमध्ये त्याने प्रवेश घेतला होता. या कॅम्पसाठी त्याच्या पालकांनी ३,५०० रुपये शुल्क भरले होते.
दररोजप्रमाणे शनिवार दि. ३० मे रोजी सकाळी तो क्रिकेट सरावासाठी शिवशक्ती मैदानावर गेला होता. यावेळी क्रिकेट पिच दाबण्यासाठी वापरण्यात येणारा हाताने ओढण्याचा जड रोलर काही लहान मुलांकडून ओढून घेतला जात होता. त्याचवेळी आरवचा तोल जाऊन तो खाली पडला आणि त्याच्या अंगावर रोलर गेल्याने तो गंभीर जखमी झाला. यावेळी उपस्थितांनी त्याला तातडीने उपचारासाठी जगदाळे मामा हॉस्पिटल, बार्शी येथे दाखल केले. मात्र डॉक्टरांनी तपासणीअंती त्याला मृत घोषित केले.
मृत मुलाचे वडील योगीराज चौधरी यांनी दिलेल्या माहितीनुसार, कॅम्पमध्ये सुमारे ३५० मुले सहभागी होती. मात्र एवढ्या मोठ्या संख्येने मुले उपस्थित असताना जड वजनाचा रोलर चालवण्यासाठी कोणताही तज्ज्ञ कर्मचारी किंवा जबाबदार प्रौढ व्यक्ती उपस्थित नव्हती. तसेच संबंधित प्रशिक्षक विवेक दुगम व अक्षय देबडवार हे मुलांपासून दूर उभे असल्याचा आरोप करण्यात आला आहे.
फिर्यादीच्या म्हणण्यानुसार, अल्पवयीन मुलांकडून धोकादायक स्वरुपाचे काम करुन घेणे आणि आवश्यक सुरक्षा उपाययोजना न करणे ही गंभीर निष्काळजीपणा असून यामुळेच त्यांच्या मुलाचा मृत्यू झाला आहे. त्यामुळे संबंधित प्रशिक्षक, आयोजक आणि जबाबदार व्यक्तींवर भागातील न्याय संहिता कलम १०५, ३(५) अन्वये गुन्हा दाखल करण्यात आला आहे.
या घटनेमुळे बार्शी शहरात हळहळ व्यक्त केली जात असून क्रीडा प्रशिक्षण शिबिरांमधील सुरक्षा व्यवस्थेचा प्रश्न पुन्हा ऐरणीवर आला आहे. या प्रकरणी पोलीस तपास सुरु आहे.
