नवी दिल्ली, 25 जुलै (हिं.स.) : केंद्रीय लोकसेवा आयोग (यूपीएससी) परीक्षा पद्धतीत बदल करण्याच्या तयारीत आहे. मात्र, याबाबत अधिकृतपणे जाहिअर करण्यात आलेले नाही. पूजा खेडकर प्रकरणामुळे केंद्रीय लोकसेवा आयोगावर प्रश्नचिन्ह उपस्थित केले जात असतांना आयोग हा निर्णय घेण्याच्या तयारीत आहे.
परीक्षेतील फसवणूक आणि फसवणूक टाळण्यासाठी या पुढे यूपीएससी अत्याधुनिक तंत्रज्ञानाची मदत घेण्याची शक्यता आहे. यासाठी आर्टिफिशियल इंटेलिजन्स (एआय), चेहऱ्याची ओळख यांसारख्या तंत्रज्ञानाचा समावेश केला जाण्याची शक्यता आहे. भारतात प्रशासकीय सेवेत जाण्यासाठी केंद्रीय लोकसेवा आयोग दरवर्षी विविध परीक्षांचे आयोजन करत असते. तब्बल 14 परीक्षा या दरवर्षी घेतल्या जातात. सीएसई म्हणजेच नागरी सेवा परीक्षेचा यात प्रामुख्याने समावेश आहे. याशिवाय, उच्च सरकारी पदांसाठी भरती चाचणी आणि मुलाखतीचे आयोजन देखील यूपीएससी घेत असते. यूपीएससी आधार आधारित फिंगरप्रिंटिंगवरही विचार करत आहे. याशिवाय एआय तंत्रज्ञानाचा देखील वापर करण्याच्या विचारात आयोग आहे. सीसीटीव्ही, ई-ॲडमिट कार्डचे क्यूआर कोड स्कॅनिंग यांचाही या नव्या प्रणालीचा समावेश राहणार आहे. परीक्षेत उमेदवाराच्या जागी दूसरा डमी विद्यार्थी बसवून फसवून टाळण्यासाठी व आयोगाची प्रतिमा योग्य ठेवण्यासाठी हे पाऊल आयोग उचलण्याची शक्यता आहे.
यूपीएससीने या नव्या बदलांसाठी निविदा मागवल्या आहेत. अशा सेवा देणाऱ्या कंपन्यांना वेळापत्रक, परीक्षा केंद्र आणि किती उमेदवार परीक्षेच्या दोन ते तीन आठवड्यांपूर्वी हजार राहतील, अशी माहिती निविदा कागदपत्रांमध्ये स्पष्ट करण्यास सांगितले आहे. विशेष म्हणजे हा सगळा प्रकार अशावेळी घडत आहे जेव्हा महाराष्ट्र केडरच्या आयएएस पूजा खेडकर यांच्या निवडीवरून लोकसेवा आयोगावर प्रश्नचिन्ह उपस्थित करण्यात आले आहे.पूजा खेडकर यांच्यावर नॉन क्रीमी लेयर आणि ओबीसी प्रवर्गाचे बनावट प्रमाणपत्र वापरुन आयएएस पद मिळवल्याचा आरोप आहे. याशिवाय खेडकर यांच्या वर्तणुकीबाबत पुणे जिल्हाधिकाऱ्यांकडेही तक्रार करण्यात आली होती, त्यानंतर पूजा खेडकर यांच्या विरोधात चौकशी सुरू करण्यात आली होती. व त्यांची बदली वाशिम येथे करण्यात आली होती. थांनी आयोगाची फसवण केल्याने त्यांचा प्रोबेशन कालावधी रद्द करून त्याची सेवा रद्द करण्यात आली आहे. त्यांना मसुरी येथील एलबीएसएनएए या अकादमीमध्ये पुन्हा येण्यास सांगण्यात आले. मात्र, असे असतांना देखील पूजा खेडकर या मंगळवारी आयोगा पुढे हजर राहील्या नाहीत. याशिवाय यूपीएससीनेही त्याच्याविरोधात गुन्हा दाखल केला असून दिल्ली पोलीस या प्रकरणाचा तपास करत आहेत.
