संदीप रेड्डी वांगा दिग्दर्शित ॲनिमल सिनेमाने बॉक्स ऑफिसवर धुमाकूळ घातला आहे. या सिनेमात रणबीर कपूरसह, रश्मिका मंदाना, बॉबी देओल, तृप्ती डिमरी, अनिल कपूर अशा मल्टीस्टारर सिनेमाला प्रेक्षकांची मोठी पसंती मिळते आहे. सिनेमात तृप्ती डिमरी आणि रणबीर कपूरच्या इंटिमेट सीनची मोठी चर्चा आहे. रणबीर कपूरसोबत सुपरहिट झालेली ही अभिनेत्री नेमकी आहे तरी कोण?
ॲनिमल सिनेमा प्रदर्शित झाल्यानंतर तृप्ती डिमरीच्या लोकप्रियतेत वाढ झाली आहे. सिनेमा रिलीज झाल्यापासून केवळ तीन दिवसांमध्ये इन्स्टाग्रामवर अभिनेत्रीच्या फॉलोअर्समध्ये वाढ झाल्याचंही बोललं जात आहे. सिनेमात रणबीर कपूर, बॉबी देओलसह तृप्ती डिमरीने मोठी लोकप्रियता मिळवली आहे.
कोण आहे तृप्ती डिमरी?
२३ फेब्रुवारी १९९४ मध्ये जन्मलेली तृप्ती डिमरी उत्तराखंडमध्ये राहणारी आहे. मागील अनेक वर्षांपासूव अभिनेत्री बॉलिवूडशी जोडलेली आहे. तिने २०१७ मध्ये पोस्टर बॉईज या सिनेमातून बॉलिवूड डेब्यू केला होता. त्यानंतर नेटफ्लिक्सवरील २०२० मध्ये आलेल्या बुलबुल सिनेमातही तिने भूमिका साकारली होती. तिने या वेबसीरिजमधून अनेकांचं लक्ष वेधलं होतं. २०२२ मध्ये आलेल्या कला, लैला मजनू नावाच्या सिनेमातही ती दिसली होती. या सिनेमा, वेबसीरिजमधून तिला फारशी लोकप्रियता मिळाली नव्हती, पण संदीप रेड्डी वांगा दिग्दर्शित ॲनिमल सिनेमातून ती रातोरात स्टार झाली.
अनुष्का शर्माच्या भावासोबत जोडलं गेलेलं नाव
तृप्ती डिमरी तिच्या खासगी आयुष्यामुळेही चर्चेत आली होती. तिचं नाव अभिनेत्री अनुष्का शर्माच्या भावासोबत कर्णेश शर्मासोबत जोडलं गेलं होतं. पण त्या दोघांचं नातं फार काळ टिकलं नाही आणि जुलै २०२३ मध्ये त्यांचे मार्ग वेगळे झाले. अनुष्का शर्माच्या भावासोबतच्या नात्यामुळे ती चर्चेत आली होती.
