सोलापूर : महापौर झाल्यावर आपण विकासाचे मॉडेल समोर ठेवून काम करणार आहोत. पाणी, रस्ते, स्वच्छता, उड्डाणपूल, आयटी पार्क, रोजगार निर्मिती आदींचे व्हिजन राहणार असून त्यावर आपण भर देऊ, अशी ग्वाही भाजपचे महापौरपदाचे उमेदवार विनायक कोंड्याल यांनी सोमवारी उमेदवारी अर्ज दाखल केल्यानंतर महापालिकेत पत्रकारांशी बोलताना दिली.
महापौरपदासाठी उमेदवारी अर्ज दाखल केल्यानंतर भाजप शहराध्यक्ष रोहिणी तडवळकर, भाजपचे गटनेते नरेंद्र काळे, महापौरपदाचे उमेदवार विनायक कोंड्याल, उपमहापौरपदाच्या उमेदवार ज्ञानेश्वरी देवकर यांनी पत्रकारांशी संवाद साधला. याप्रसंगी कोंड्याल यांनी सांगितले की, सोलापूरकरांनी महापालिका निवडणुकीत भाजपला भरभरून मतदान केले आहे. सोलापूरकरांनी दाखवलेला हा विश्वास सार्थ ठरवू.
अनुभवाच्या निकषावर कोंड्याल यांना महापौरपद : रोहिणी तडवळकर
महापौरपदाची निवड कोणत्या निकषावर केली या पत्रकारांच्या प्रश्नावर उत्तर देताना भाजप शहराध्यक्ष रोहिणी तडवळकर म्हणाल्या की, सभागृह चालवणे, कामकाज कसे चालते याची माहिती, नगरसेवकपदाचा अनुभव या निकषावर विनायक कोंड्याल यांना उमेदवारी दिली आहे. ज्ञानेश्वरी देवकर यांना सुशिक्षित महिला असल्याने चांगल्या पद्धतीने कामकाज सांभाळतील. या मुद्द्यावरून उपमहापौर पदाची उमेदवारी दिली आहे. सर्व समाजांना न्याय देण्याचा पक्षाचा प्रयत्न आहे. मराठा समाजाला उपमहापौर देऊन न्याय देण्याचा प्रयत्न केला आहे. या समाजाला पुढील अडीच वर्षांनी चिट्ठी निघाल्यावर महापौरपदाची संधी मिळाल्यास नक्कीच न्याय देऊ, असेही त्यांनी स्पष्ट केले.
डॉ. किरण देशमुख यांना महापौरपद देण्याचा प्रश्नच उद्भवत नाही : तडवळकर
महापालिका निवडणुकीत डॉ. किरण देशमुख यांनी पक्षाकडे नगरसेवकपदासाठी मागणी केली नव्हती, तरीदेखील आम्ही त्यांना नगरसेवकपदाची उमेदवारी दिली. महापौरपदाबाबत त्यांनी इच्छा व्यक्त केली नव्हती, त्यामुळे त्यांना महापौरपद देण्याचा प्रश्नच उद्भवत नाही, असे शहराध्यक्ष रोहिणी तळवळकर यांनी पत्रकारांनी विचारलेल्या प्रश्नाला उत्तरादाखल सांगितले. व्हीप बजावूनदेखील आजच्या बैठकीला जे नगरसेवक अनुपस्थित आहेत, त्यांचा अहवाल आपण प्रदेशला कळविण्यात येईल, असेही त्यांनी सांगितले.
सभागृहाचा कारभार आदर्श पद्धतीने चालवणार : नरेंद्र काळे
भाजपनेते गटनेते अर्थात महापालिकेचे भावी सभागृह नेते नरेंद्र काळे यांनी सांगितले की, यंदा महापालिकेत सत्ता स्थापन करताना भाजपसमोर कुठलेही आव्हान नाही. सभागृहाचे कामकाज आदर्श पद्धतीने करण्याचा आपला प्रयत्न राहील. शहराच्या विकासाबाबत विरोधक ज्या सूचना करतील त्या विचारात घेऊन काम करण्याचा प्रयत्न करणार आहोत. शहर विकासासाठी जिथे निधीची आवश्यकता आहे तिथे पूर्तता करण्यात येईल, असेही ते म्हणाले.
पदाचा उपयोग सर्वांगीण विकासासाठी करणार : ज्ञानेश्वरी देवकर
उपमहापौरपदाचा वापर आपण शहराच्या सर्वांगीण विकासासाठी करणार आहोत, अशी ग्वाही भाजपच्या उपमहापौरपदाच्या उमेदवार ज्ञानेश्वरी देवकर यांनी दिली उपमहापौरपदाची संधी दिल्याबाबत त्यांनी मुख्यमंत्री देवेंद्र फडणवीस, पालकमंत्री जयकुमार गोरे, शहराध्यक्ष रोहिणी तडवळकर, आमदार सुभाष देशमुख, मनीष देशमुख यांचे आभार मानले.
