दिल्लीचे मुख्यमंत्री अरविंद केजरीवाल आज, गुरुवारी मद्य धोरण प्रकरणी चौकशीसाठी तपास यंत्रणा ईडीसमोर हजर राहणार नाहीत. केजरीवाल आणि पंजाबचे मुख्यमंत्री भगवंत मान मध्यप्रदेशातील सिंगरौली येथे रॅली घेणार आहेत.
अंमलबजावणी संचालनालयाने (ईडी) केजरीवाल यांना 30 ऑक्टोबरला चौकशीसाठी समन्स पाठवले होते. यासंदर्भात आज सकाळी 9 वाजता केजरीवाल यांनी ईडीला उत्तर पाठवून ही नोटीस बेकायदेशीर आणि राजकीय हेतूने प्रेरित असल्याचे म्हटले आहे. केजरीवाल यांनी ईडीच्या नोटीसीवर उत्तर दिले आहे. यामध्ये ईडीने ही नोटीस त्वरीत मागे घ्यावी, असे म्हटले आहे. तसेच केजरीवाल ईडीच्या चौकशीला जाणार नसून ते मध्य प्रदेशच्या सिंगरौलीमध्ये निवडणूक प्रचाराला जाणार आहेत.
दिल्लीचे मुख्यमंत्री अरविंद केजरीवालांना ईडीने समन्स पाठवून आज चौकशीसाठी बोलविले होते. केजरीवाल काल रात्रीपर्यंत चौकशीला जाणार असे पक्के होते. परंतु, आज सकाळीच ईडीने दिल्लीचे आणखी एक मंत्री राज कुमार आनंद यांच्या घरावर छापेमारी केली आहे. जवळपास 9 ठिकाणी हा छापा सुरु असून केजरीवालांनी आजच्या चौकशीवर प्रतिक्रिया दिली आहे. केजरीवाल यांना ईडी आज अटक करण्याची शक्यता आपच्या नेत्यांनी व्यक्त केली आहे. दिल्ली अबकारी घोटाळ्यात केजरीवाल यांचे 2 नेते आधीच ईडीच्या कोठडीत आहेत. यामागे भाजपाचा हात असल्याचा आरोप केजरीवाल यांनी केला आहे. तसेच ईडीची नोटीस बेकायदेशीर आहे. भाजपाच्या सांगण्यावरून ईडीने ही नोटीस पाठविली आहे. जेणेकरून मी 4 राज्यांमध्ये प्रचाराला जाऊ नये, असा आरोप केजरीवाल यांनी केला आहे.
