ताजमहाल म्हणजे प्रेमाची निशाणी! हे आपल्या सगळ्यांनाच माहित आहे आणि आपल्याला याच आकर्षणही तितकंच आहे. मुघल सम्राट शाहजहाँने आपली प्रिय पत्नी मुमताज महलच्या स्मरणार्थ आग्रा येथे ताजमहाल बांधला. शहाजहान आणि मुमताज यांच्या प्रेमाचे प्रतीक ताजमहाल हे प्रेमाचे प्रतीक मानले जाते, मात्र चेन्नईतील एका व्यावसायिकाने आपल्या आईच्या स्मरणार्थ ताजमहालासारखीच इमारत बांधली आहे. आईच्या स्मरणार्थ बांधलेल्या या इमारतीला लोक दुसरा ‘ताजमहाल’ म्हणत आहेत. त्याचे फोटो आणि व्हिडिओ सोशल मीडियावर चांगलेच व्हायरल होत आहेत. लोकांना या नव्या ताजमहाल सारख्या इमारतीबद्दल खूप काही जाणून घ्यायचे आहे. ही ताजमहालसारखी नवी इमारत कोणी बांधली, का बांधली, ती कोठे आहे आणि ते बांधण्यासाठी किती खर्च आला; चला तर जाणून घेऊया.
तामिळनाडूच्या तिरुवरूर जिल्ह्यातील व्यापारी अमरुद्दीन शेख दाऊद साहिब यांनी त्यांच्या आईच्या स्मरणार्थ ही इमारत बांधली. अमरुद्दीन शेख चेन्नईमध्ये हार्डवेअरचा व्यवसाय करतात. चार बहिणींमधला एकुलता एक भाऊ अमरुद्दीन त्याच्या आईच्या खूप जवळचा होता. २०२० मध्ये त्याच्या आईचे निधन झाले. अमरुद्दीनला आपल्या आईसाठी काहीतरी करायचे होते जेणेकरून जगभरातील लोकांना आपल्या आईबद्दल माहिती व्हावी.
अमरुद्दीन यांनी आईसाठी ताजमहालसारखी दिसणारी इमारत बांधण्याचा निर्णय घेतला. यासाठी त्यांनी त्यांचा बिल्डर मित्र अमिप्पनशी संवाद साधला. इमारत बांधण्यासाठी १ एकर जागा खरेदी केली. आईने आधीच आपल्या मुलांसाठी करोडो रुपये सोडले होते. मुलांनी स्वतःसाठी पैसे वापरण्याऐवजी ते त्यांच्या आईच्या स्मरणार्थ बांधल्या जाणाऱ्या इमारतीवर खर्च करण्याचे ठरवले. ही इमारत दोन वर्षांहून अधिक कालावधीत पूर्ण झाली आहे.
२०० मजूर आणि २ वर्षात उभा राहिला दुसरा ताजमहाल
अमरुद्दीन शेख यांची आई जैलानी बीबी यांनी मुलांना एकटीने वाढवले. त्या ३० वर्षांच्या असताना त्यांच्या नवऱ्याचे निधन झाले. तेव्हापासून ती मुलांसाठी जगू लागली. मुलांनी आईचा संघर्ष पाहिला आहे. आईच्या मृत्यूनंतर त्यांनी ताजमहालसारखी दिसणारी इमारत बांधण्याचा निर्णय घेतला. बिल्डरच्या मदतीने, सुमारे २०० मजूर आणि २ वर्षांच्या अथक परिश्रमानंतर आता हा मिनी ताजमहाल तयार झाला आहे.
हा मिनी ताजमहाल तयार करण्यासाठी सुमारे साडेपाच कोटी रुपये खर्च झाले आहेत. अमरुद्दीन शेख यांनी ही जमीन आणि ताजमहाल सदृश इमारतीला ट्रस्टचे नाव दिले आहे. पांढऱ्या संगमरवरने बनवलेल्या या इमारतीसाठी राजस्थानमधून मारबान आयात करण्यात आले होते. ही वास्तू ताजमहालासारखी बनवण्याचा प्रयत्न करण्यात आला.
ताजमहाजची प्रतिकृती
इथे प्रेक्षणीय स्थळ पाहण्यासाठी येणाऱ्यांना मोफत जेवण मिळावे यासाठी लवकरच अशी व्यवस्था करणार असल्याचे अमरुद्दीन शेख सांगतात. आपल्या आईच्या स्मरणार्थ ताजमहाल बांधण्यात आल्याने अमरुद्दीन शेख यांना खूप आनंद झाला आहे, मात्र काही लोक त्यांच्या या निर्णयावर टीका करत आहेत. त्यांनी टीकाकारांना सांगितले की, ज्यांना वाटते की मी माझ्या आईसाठी इमारत बांधून पैसे उधळले आहेत आणि ती बांधण्याऐवजी मी ते पैसे गरिबांना दिले असते, मला एवढेच सांगायचे आहे की माझी आई माझ्यासाठी सर्वस्व आहे.
