‘पिंकीचा विजय असो’ या मालिकेत मुख्य भूमिका साकारणारी शरयू सोनावणेने उरकला साखरपुडा, अलीकडेच सोडली होती मालिका
अभिनेत्री शरयू सोनावणे ‘पिंकीचा विजय असो’ या मालिकेतून घराघरात पोहोचलेला चेहरा आहे. स्टार प्रवाहवरील या मालिकेत ‘पिंकी’ ही भूमिका साकारत तिने प्रेक्षकांची मनं जिंकली. यातील पिंकी आणि युवराज ही जोडीही चाहत्यांना आवडायची. आता या पिंकीने तिच्या खऱ्या आयुष्यातील युवराजशी साखरपुडा केला आहे. ‘पिंकीचा विजय असो’ फेम शरयूने साखरपुडा केला असून तिने या खास क्षणाचे फोटो सोशल मीडियावरही शेअर केलेत. अभिनेत्रीने जयंत लाडेशी साखरपुडा केला असून तो एक फिल्ममेकर-निर्माता आहे. शरयूने सोशल मीडियावर पोस्ट शेअर केल्यानंतर तिच्यावर शुभेच्छांचा वर्षाव होतो आहे.
शरयूने शेअर केलेल्या पोस्टमध्ये असे लिहिले आहे की, ‘आयुष्यभरासाठी एका व्यक्तीला त्रास देण्याचं मी ठरवलं आहे’. अभिनेत्रीने या पोस्टमध्ये तिच्या होणाऱ्या नवऱ्यालाही टॅग केले आहे. तिने कॅप्शनमध्ये पुढे असे लिहिले की, ‘आनंदी आहे आणि आता साखरपुडाही झालाय, गणपती बाप्पा मोरया’. अभिनेत्रीने तिच्या या खास दिवसानिमित्त केलेल्या पोस्टमध्ये #love #ganpatibappamorya #specialday असे हॅशटॅगही वापरले आहेत.
शरयूचा होणारा नवरा जयंत लाडे याने ‘सुरसपाटा’ आणि ‘ए पेईंग घोस्ट’ या सिनेमांची निर्मिती केली आहे. शरयूदेखील सुरसपाटा या सिनेमात दिसली होती. दरम्यान शरयूने साखरपुड्याची पोस्ट इन्स्टाग्रामवर शेअर केल्यानंतर तिच्यावर शुभेच्छांचा वर्षाव होतो आहे. तिच्या चाहत्यांसह सिनेविश्वातील अनेक मंडळींनी या जोडप्याला शुभेच्छा दिल्या. आता अभिनेत्री लग्नबेडीत कधी अडकणार याची उत्सुकता प्रेक्षकांना लागून राहिली आहे.
शरयूने काही दिवसांपूर्वी ‘पिंकीचा विजय असो’ ही मालिका सोडली होती अन् प्रेक्षकांना धक्काच दिला. मालिकेत पिंकीचा एका अपघातानंतर चेहरामोहरा बदलला आणि तिच्या जागी अभिनेत्री आरती मोरे आता ही भूमिका साकारत आहे. शरयूने मालिका सोडल्यानंतर वाहिनीच्या इन्स्टाग्राम अकाउंटवरही तिचा एक व्हिडिओ शेअर करण्यात आला होता. आता शरयू नव्या कोणत्या भूमिकेत दिसेल या प्रतिक्षेत चाहते आहेत.
