समता फिल्मस् निर्मित आणि अभिता फिल्म्स प्रस्तुत क्रांतिसूर्य महात्मा जोतीराव फुले आणि क्रांतीज्योती सावित्रीबाई फुले यांच्या जीवनावर आधारित आगामी “सत्यशोधक” चित्रपटाच्या पोस्टरचे अनावरण राज्याचे अन्न,नागरी पुरवठा व ग्राहक संरक्षण मंत्री मा. श्री. छगनजी भुजबळ यांच्या हस्ते नाशिक येथील कार्यालयात करण्यात आले. यावेळी राष्ट्रवादी काँग्रेस पार्टीचे जिल्हाध्यक्ष ॲड. रवींद्र पगार, दिलिप खैरे, समता फिल्मस् चे निर्माते श्री. आप्पा बोराटे, श्री. प्रवीण तायडे, लेखक आणि दिगदर्शक श्री. निलेश जळमकर , कार्यकारी निर्माता श्री. शिवा बागुल, माळी महासंघाचे प्रमुख मा. श्री. बाजीराव अण्णा तिडके, समता परिषदेचे प्रमुख श्री. रवी सोनवणे साहेब, सत्यशोधक श्री. राजेंद्र बागुल, अभिनेते श्री. रोहित सरवार, श्री. आदित्य कमोदकर, समता परिषदेचे जिल्हाध्यक्ष डॉ.योगेश गोसावी, श्री. सुनील पैठणकर यांच्यासह पदाधिकारी उपस्थित होते.
याप्रसंगी “सत्यशोधक” चित्रपटाचा प्रारूप ट्रेलर मा. श्री. छगनजी भुजबळ यांना दाखविण्यात आला व लवकरच हा ट्रेलर प्रदर्शित करण्यात येणार असल्याची माहिती निर्मात्यांनी दिली. मंत्री छगन भुजबळ यांनी सत्यशोधक चित्रपटाची निर्मिती करणाऱ्या सर्व टीमला मन:पूर्वक शुभेच्छा दिल्या.
समता फिल्मस् निर्मित “सत्यशोधक” मराठी चित्रपटासाठी उच्च दर्जाचे तंत्रज्ञान, आधुनिक उपकरणे आणि अद्ययावत व्हीएफएक्सचा वापर करण्यात आलेला आहे. या चित्रपटात महात्मा जोतीराव फुलेंनी समाज परिवर्तनासाठी केलेला संघर्ष, आधुनिक महाराष्ट्राच्या विकास, कामगार चळवळ, महिलांचा शैक्षणिक विकास, आधुनिक इमारतींची बांधणी या सर्वांमध्ये केलेली भरीव कामगिरी तसेच त्यांना या सर्व प्रसंगात क्रांतीज्योती सावित्रीबाई फुलेंनी दिलेली साथ आणि त्यांनी आयुष्यभर केलेले समाजप्रबोधन हे सर्व पैलू चित्रपटात अत्यंत काळानुरूप दाखविण्यात आले आहे.
या चित्रपटाचे लेखन आणि दिग्दर्शन राज्य पुरस्कार विजेते दिग्दर्शक श्री. नीलेश जळमकर यांनी केले आहे. चित्रपटात महात्मा जोतीराव फुले यांची भूमिका राष्ट्रीय पुरस्कार विजेते संदीप कुलकर्णी यांनी साकारली आहे तर आंतरराष्ट्रीय पुरस्कार विजेत्या राजश्री देशपांडे सावित्रीबाई फुले यांच्या भूमिकेत आहेत, तसेच रवींद्र मंकणी, रवी पटवर्धन, गणेश यादव, सुरेश विश्वकर्मा या दमदार कलाकारांची त्यांना लाभली आहेत. या चित्रपटाची पटकथा तयार करण्यासाठी राज्य शासनाने प्रकाशित केलेल्या पुस्तकांचा संदर्भ घेण्यात आला आहे आणि महात्मा जोतीराव फुलेंचे गाढे अभ्यासक माननीय साहित्यिक प्रा.हरी नरके यांच्या मार्गदर्शनाखाली हा चित्रपट तयार करण्यात आला आहे. या चित्रपटाला दादासाहेब फाळके पुरस्कार विजेते संगीत दिग्दर्शक अमित राज यांचे कर्णमधुर संगीत लाभले असून राष्ट्रीय पुरस्कार विजेते समीर फातर्फेकर यांनी पार्श्वसंगीत दिले आहे.
“सत्यशोधक” लवकरच संपूर्ण महाराष्ट्रात आणि भारतभर प्रदर्शित करण्यात येणार आहे.
