बार्शीच्या एका शेतकऱ्याने १० पोते कांदे विकल्यानंतर सर्व खर्च वजा करुन व्यापाऱ्याने त्याला २ रुपयांची पट्टी दिली होती. शेतकऱ्याला २ रुपयांचा चेक मिळाल्याचे फोटो सोशल मीडियावर व्हायरल झाल्यानंतर कृषी प्रधान म्हणवल्या जाणाऱ्या देशात बळीराजाची अशी थट्टा होत असल्याने नेटकऱ्यांनी धोरणकर्त्यांवर आसूड ओढले होते. याची दखल विरोधी पक्षनेते अजित पवार यांनी घेत शेतकऱ्याची विचारपूस केली आणि येणाऱ्या अधिवेशात हा मुद्दा मांडू, असं संबंधित शेतकऱ्याला आश्वस्त केलं. दरम्यान, शेतकऱ्याला २ रुपयांचा चेक देणाऱ्या व्यापाऱ्याविरोधात सोलापूर कृषी उत्पन्न बाजार समितीने कारवाईचा बडगा उगारलाय.
सोलापूर जिल्ह्यातील बार्शीच्या झाडी बोरगावमधील राजेंद्र चव्हाण या शेतकऱ्याने सोलापूर कृषी उत्पन्न बाजार समितीत १० पोते कांदे विकायला आणले होते. कांद्याचा लिलाव होऊन पट्टी तयार करण्यासाठी अडत व्यापाऱ्याने पावती पुस्तक काढले तेव्हा शेतकऱ्याला फक्त दोन रुपये ४९ पैसे देण्यात आले. शेतकऱ्यासहित त्याला मिळालेल्या चेकचे फोटो सोशल मीडियावर व्हायरल झाल्यानंतर बळीराजाच्या व्यथा आणि त्या व्यथेच्या कथा समोर आल्या.
व्यापाऱ्याने शेतकऱ्याला रोख पैसे न देता धनादेश स्वरुपात पैसे दिल्याने संबंधित व्यापाऱ्याचा परवाना पंधरा दिवसांसाठी निलंबित केल्याची कारवाई बाजार समितीने केली आहे. याबाबतचा आदेश बाजार समितीचे सचिव सी. ए. बिराजदार यांनी काढला आहे. जे व्यापारी शेतकऱ्यांना रोख स्वरुपात पट्टी देणार नाहीत, त्यांच्यावर बाजार समिती कारवाईचा बडगा नक्की उगारेल, असं पत्रात नमूद करण्यात आलंय.
नक्की प्रकरण काय?
शेतकऱ्याने सोलापूर मार्केट यार्डात १७ फेब्रुवारी २०२३ रोजी जवळपास पाचशे किलो कांदा विकला होता. कांद्याचे दर घसरल्याने शेतकऱ्याला प्रतिकिलो १ रुपया प्रमाणे भाव मिळाला. मोटारभाडे, हमाली, तोलाई याचे पैसे वजा करून फक्त दोन रुपये शिल्लक राहिले होते. मार्केट यार्डातील सुर्या ट्रेडर्स या व्यापाऱ्याने दोन रुपयांचा चेक दिला.
राजू शेट्टी यांची संतप्त प्रतिक्रिया
राज्यकर्त्यांनो जरा तरी लाज बाळगा, शेतकऱ्यांनी जगायचं कसं हे आता तुम्हीच सांगा? एका बाजूला थकबाकीपोटी शेतकऱ्यांची वीज कनेक्शन धडाधड तोडता… आणि डोळ्यासमोर पीक करपून जातं. राजेंद्र तुकाराम चव्हाण यांनी सोलापूर बाजार समितीमध्ये १० पोती कांदे विकल्यावर त्याला किती पैसे आले ते बघा… निर्लज्ज व्यापाऱ्याला दोन रूपयांचा चेक देताना लाज कशी वाटली नाही? असा संतप्त स्वाभिमानीचे नेते राजू शेट्टी यांनी केला.
