सोलापूर : सोलापूर महापालिका तब्येत आता ऐतिहासिक निर्णय घेण्यात आला.महापालिकेतील १९९५ नंतर कार्यरत असलेल्या रोजंदारी व बदली कर्मचाऱ्यांच्या सेवेत कायम करण्याचा प्रस्ताव शासनाकडे पाठविण्याचा निर्णय महापालिका सभेत घेण्यात आला. याबद्दल कामगार संघटनांनी महापौरांसह पदाधिकाऱ्यांचा सत्कार केला.
महापौर विनायक कोंड्याल यांच्या अध्यक्षतेखाली सोलापूर महापालिकेच्या मंगळवारी झालेल्या सर्वसाधारण सभेत विविध 10 विषयांना मंजुरी देण्यात आली.विविध विकासकामे, पीएम ई-बस यासह विविध 11 विषयांना महापालिका सभेत मंजुरी देण्यात आली. २०१ कर्मचारी या प्रक्रियेत आहेत. त्यापैकी महापालिकेच्या आस्थापनेवर ४५ कायमस्वरूपी रिक्त पदे उपलब्ध असल्याचे नमूद करण्यात आले आहे. उर्वरित १५६ कर्मचाऱ्यांना सामावून घेण्यासाठी १५ अधिसंख्य पदे आणि १४१ कायमस्वरूपी पदे निर्माण करावी लागणार आहेत.
या कर्मचाऱ्यांना नियमित सेवेत सामावून घेण्यासाठी शासनाकडून आवश्यक आर्थिक अनुदान मिळणे महत्त्वाचे आहे. वेतन, निवृत्तिवेतन आणि अन्य सेवा लाभांची जबाबदारी लक्षात घेता शासनाकडे सकारात्मक प्रस्ताव पाठविण्याची कार्यवाही करण्यात येणार आहे.
हा विषय मंजूर झाल्यानंतर महापालिका कामगार संघटना कृती समिती आणि महामानव डॉ. बाबासाहेब आंबेडकर ट्रेड युनियनच्या वतीने महापौरांसह सर्व पदाधिकाऱ्यांचा यथोचित सत्कार करण्यात आला. कामगार नेते अशोक जानराव, कामगार नेते जनार्दन शिंदे, कामगार नेते बापूसाहेब सदाफुले, कामगार नेते चांगदेव सोनवणे, मल्लिकार्जुन हुणजे यांच्यासह पदाधिकाऱ्यांनी यासाठी पाठपुरावा केला होता. यावेळी सभागृह नेते नरेंद्र काळे, उपमहापौर ज्ञानेश्वरी देवकर यांच्यासह पदाधिकारी उपस्थित होते.
लक्ष्मी मार्केटमधील ठेकेदारावर कारवाई
लक्ष्मी मार्केट परिसरातील महापालिकेच्या खुल्या जागेचा पार्किंग व्यवसायासाठी घेतलेल्या ठेकेदाराने करारातील अटींचे उल्लंघन करून भाडे थकीत ठेवले होते. याप्रकरणी वारंवार नोटिसा देऊनही प्रतिसाद न मिळाल्याने संबंधित जागा महापालिकेच्या ताब्यात घेण्यास तसेच संबंधित ठेकेदाराचे नाव ‘ब्लॅकलिस्ट’मध्ये समाविष्ट करण्यास सभेने मान्यता दिली.
पीएम ई-बस योजनेलाही चालना
पीएम ई-बस योजनेअंतर्गत बस डेपोसाठी आवश्यक असलेल्या कामकाजाबाबतही सभेत चर्चा झाली. केंद्र शासनाकडून मिळणाऱ्या आर्थिक सहाय्याच्या पार्श्वभूमीवर बस आगाराच्या विकासासाठी आवश्यक जमीन, चार्जिंगसह पायाभूत सुविधांची उभारणी करण्याची कार्यवाही पुढे नेण्यात येणार आहे.
महापालिका रुग्णालयांसाठी औषध खरेदी
महापालिकेच्या दवाखाने, प्रसूतिगृहे, नागरी आरोग्य केंद्रे आणि न्यूरो विभागातून दररोज मोठ्या संख्येने रुग्ण उपचार घेत असल्याने औषधांचा नियमित पुरवठा करण्यासाठी ई-जीएम पोर्टलवर निविदा काढून दर निश्चित करण्यास मान्यता देण्यात आली. यासाठी सन २०२६-२७ च्या अंदाजपत्रकात औषधे, रसायने व उपकरणे खरेदीसाठी तरतूद करण्यात आली आहे.
कौशल्य प्रशिक्षणासाठी निधी
जिल्हा नियोजन समितीच्या नाविन्यपूर्ण योजनेंतर्गत महिला व मुलींच्या कौशल्य विकासासाठी विविध प्रशिक्षण अभ्यासक्रम राबविण्यासही मान्यता देण्यात आली. जीएसटी असिस्टंट, अकाउंट असिस्टंट, बॅक ऑफिस फायनान्शियल सर्व्हिसेस, इमिटेशन ज्वेलरी मेकर, शिवणयंत्र चालक, फॅशन डिझायनर, फळ-भाजी प्रक्रिया आणि ब्युटी थेरपिस्ट आदी प्रशिक्षणांचा यात समावेश आहे. उपलब्ध कार्यपत्रिकेनुसार प्रशिक्षणासाठी विविध अभ्यासक्रमांमध्ये लाभार्थीसंख्या आणि प्रशिक्षण कालावधी निश्चित करण्यात आला आहे.
आरोग्यवर्धिनी केंद्राची जागा बदलली
१५व्या वित्त आयोगांतर्गत मंजूर आरोग्यवर्धिनी केंद्रासाठी पूर्वनिश्चित जागेवर तांत्रिक कारणामुळे पोर्टा केबिन उभारणे शक्य नसल्याने जागा बदलण्यासही मान्यता देण्यात आली. चंद्रकला नगर, सितारा चौक, नई जिंदगी येथे पोर्टा केबिनमध्ये आरोग्यवर्धिनी केंद्र उभारण्याचा प्रस्ताव मंजूर करण्यात आला.याशिवाय विविध स्मशानभूमींमध्ये संरक्षण भिंत, सुशोभीकरण व अंतर्गत रस्त्यांचे काँक्रिटीकरण तसेच प्रभाग क्रमांक १७ मध्ये ड्रेनेज लाईन टाकण्यासंबंधीच्या कामांचाही कार्यपत्रिकेत समावेश आहे.
—-
