गणपतीपुळे समुद्रात पोहण्यासाठी गेलेले चार तरूण बुडाले होते. त्यापैकी तिघांना वाचविण्यात यश आले आहे. तर एका तरूणाचा समुद्रात बुडून मृत्यू झाला. गणपतीपुळे येथील जीवरक्षकांच्या प्रसंगावधानामुळे तिघांचे प्राण वाचले आहेत. रविवारी सकाळी 11.30 वाजण्याच्या सुमारास ही घटना घडली आहे. गणपतीपुळे येथील समुद्रात रविवारी सकाळी 11.30 वाजण्याच्या सुमारास चारजण बुडाले होते. त्यातील तीन जणांना वाचवण्यात आले आहे. सोलापूर जिल्ह्यातील अजित धनाजी वाडेकर (वय 25) या तरूणाचा समुद्राच्या पाण्यात बुडून मृत्यू झाला आहे.
अजित हा सध्या पंढरपूर तालुक्यातील इसबाबी इथे राहत असला तरी तो मूळचा सोलापूर शहरातील वारद फार्म इथला रहिवासी आहे. तीन तरूणांना वाचविण्यात स्थानिक जीवरक्षक, व्यावसायिक व गणपतीपुळे पोलिसांना यश आले आहे. गणपतीपुळे येथे रविवारी सकाळी 10 वाजता सुमारास सोलापूर जिल्ह्यातील इसबावे या ठिकाणाहून अजित धनाजी वाडेकर (वय 25), अजय बबन शिंदे (वय 23), सार्थ दत्तात्रय माने (वय 24) आणि आकाश प्रकाश पाटील (वय 25) असे चार तरूण गणपतीपुळे येथे देवदर्शनासाठी पर्यटनासाठी आले होते. हे चारही तरूण समुद्राच्या पाण्यात उतरले असता त्यांनी खोल पाण्यात जाण्याचा प्रयत्न केला. त्यातील अजित वाडेकर हा खोल समुद्राच्या पाण्यात अडकला. यावेळी अजितला पाण्याबाहेर येत नाही, हे लक्षात येताच त्याच्यासह असलेल्या तरूणांनी व समुद्राच्या पाण्यात असलेल्या इतर पर्यटकांनी आरडाओरडा करण्यास सुरुवात केली.
ही बाब समुद्रकिनाऱ्यावर असलेल्या गणपतीपुळे ग्रामपंचायतीच्या जीवरक्षक व गस्तीवर असलेल्या गणपतीपुळे पोलीस दूर क्षेत्राचे सहाय्यक पोलीस उपनिरीक्षक संदीप साळवी व हेड हेड कॉन्स्टेबल कुणाल चव्हाण यांच्या निदर्शनास आली. त्यांनी तात्कळ गणपतीपुळे ग्रामपंचायतीचे जीवरक्षक यांना पाचारण करून समुद्राच्या पाण्यात पाठवले. समुद्राच्या खोल पाण्यात अडकलेल्या तीन तरूणांना पाण्याबाहेर काढले. त्यानंतर समुद्राच्या पाण्यात अडकलेल्या अजित वाडेकर या तरूणाला वाचविण्याचा प्रयत्न केला. मात्र, त्याला पाण्याबाहेर काढल्यानंतर तो बेशुद्ध अवस्थेत असल्याने त्याला जीवरक्षक, स्थानिक व्यावसायिक व पोलिसांच्या मदतीने गणपतीपुळे देवस्थानच्या रुग्णवाहिकेने तातडीने मालगुंड येथील प्राथमिक आरोग्य केंद्रात उपचारासाठी नेण्यात आले. मात्र, या ठिकाणी अजित याने उपचाराला प्रतिसाद न दिल्याने त्याला मालगुंड येथील प्राथमिक आरोग्य केंद्राच्या वैद्यकीय अधिकारी डॉ. मधुरा जाधव यांनी मृत घोषित केले.