सायबर फसवणूक टाळण्यासाठी ग्राहकांनी सजग रहावे 

सोलापूर : मनोरमा को-ऑप बँक लिमिटेड व मनोरमा मल्टीस्टेट को-ऑप. क्रेडिट सोसायटी यांच्या संयुक्त विद्यमाने बँकिंग सायबर सेक्युरिटी जनजागृती व मार्गदर्शन कार्यक्रमाचे आयोजन सोलापुरातील लोकमान्य टिळक सभागृहात करण्यात आले होते. वाढत्या सायबर फसवणुकीच्या पार्श्वभूमीवर ग्राहक व नागरिकांमध्ये जागरूकता निर्माण करण्यात आली. 

           यावेळी मनोरमा मल्टीस्टेट को-ऑप. क्रेडिट सोसायटीच्या चेअरमन शोभा श्रीकांत मोरे यांनी मार्गदर्शन करताना सांगितले की, ग्राहकांची गुंतवणूक अधिक सुरक्षित व सायबरमुक्त ठेवण्यासाठी मनोरमा परिवार कायम सतर्क असून ठेवीदारांच्या पैशांची सुरक्षा हीच बँकेची सर्वोच्च प्राथमिकता आहे. मनोरमा को-ऑपरेटिव्ह बँकेचे चेअरमन श्रीकांत मोरे यांनी अध्यक्षीय भाषणात सायबर फ्रॉडचे प्रत्यक्ष किस्से सांगत जनजागृतीचे महत्त्व सांगतानाच ऑनलाइन व्यवहारांचे प्रमाण झपाट्याने वाढत असताना प्रत्येक नागरिकाने स्वतःच्या पैशांबाबत सजग राहणे गरजेचे असल्याचे त्यांनी नमूद केले.  

          यावेळी सोलापूर शहर सायबर पोलीस स्टेशनचे वरिष्ठ पोलीस निरीक्षक श्रीशैल गजा यांनी सायबर सुरक्षेचे महत्त्व स्पष्ट करताना ग्राहकांनी जागरूक राहणे ही काळाची गरज असल्याचे सांगितले. मोबाईलमुळे जग जवळ आले असले तरी त्याचे फायदे–तोटे समजून घेऊन स्क्रीन टाइम मर्यादित ठेवणे, डिजिटल अरेस्ट, सायबर फ्रॉड यांसारख्या प्रकारांपासून सावध राहणे आवश्यक आहे असे आवाहन केले.

          सायबर तज्ज्ञ अविनाश पाटील यांनी व्हिडिओ व ऑडिओ क्लिप्सद्वारे सायबर फसवणुकीचे गांभीर्य उपस्थितांच्या लक्षात आणून दिले. भीती, लालच व वासना हे सायबर गुन्ह्यांचे प्रमुख हत्यार असल्याचे सांगत अनोळखी कॉल व व्हिडिओ कॉल टाळण्याचा सल्ला त्यांनी दिला. पोलीस किंवा बँक कधीही फोनवरून वैयक्तिक माहिती मागत नाही, हेही त्यांनी सांगितले.यावेळी सायबर जनजागृती पथकातील प्रांजली काळे व  सचिन अंबलगी यांनीही उपयुक्त मार्गदर्शन केले.                     

           मनोरमा बँकेच्या मुख्य कार्यकारी अधिकारी शिल्पा कुलकर्णी – मोहिते यांनी उपस्थितांचे स्वागत केले. सूत्रसंचालन विद्या भोसले यांनी केले तर आभार प्रदर्शन डॉ. सुमित मोरे यांनी केले. या कार्यक्रमास मनोरमा बँकेचे संचालक  दत्ता मुळे, शशिबाला चंडक, सिद्राम पाटील यांच्यासह ग्राहक, सभासद व नागरिक मोठ्या संख्येने उपस्थित होते.

चौकट …….

सायबर सुरक्षिततेसाठी महत्त्वाच्या सूचना

** अनोळखी मोबाईल/व्हिडिओ कॉल उचलू नयेत

** बँक किंवा पोलीस कधीही फोनवर वैयक्तिक माहिती मागत नाहीत

** डिजिटल अरेस्ट नावाची कोणतीही

 अधिकृत प्रक्रिया नाही

** संशयास्पद लिंक, ॲप्स व मेसेजपासून दूर राहा

** आर्थिक फसवणूक झाल्यास त्वरित सायबर पोलीस व बँकेशी संपर्क साधा