सोलापूर : प्रथम नागरिकपदी विराजमान झालेले महापौर विनायक कोंड्याल यांनी पदभार स्वीकारल्यानंतर शहराच्या सर्वांगीण विकासाचा स्पष्ट रोडमॅप मांडला. शहर विकास, डिजिटल प्रशासन, तरुणाई, महिला सहभाग आणि वारसा, सांस्कृतिक जतन या विषयांवर त्यांनी दैनिक तरुण भारतशी बोलताना मनमोकळेपणाने संवाद साधला. सोलापूरकरांचा विश्वास हेच माझे बळ आहे. सर्वांना सोबत घेऊन पारदर्शक आणि विकासाभिमुख कारभार करणार, असा विश्वास महापौर विनायक कोंड्याल यांनी व्यक्त केला. दैनिक तरुण भारतचे उपसंपादक किरण बनसोडे यांनी महापौर विनायक कोंड्याल यांची घेतलेली विशेष मुलाखत अशी……
प्रश्न : महापौर म्हणून तुमच्या कार्यकाळातील पहिल्या १०० दिवसांचा स्पष्ट रोडमॅप काय असेल? नागरिकांना नेमका काय बदल दिसणार?
उत्तर : पहिल्या १०० दिवसांत आम्ही मूलभूत सुविधांवर लक्ष केंद्रीत करू. प्रलंबित कामांचा आढावा, विभागनिहाय जबाबदाऱ्या निश्चित करणे आणि वेळबद्ध अंमलबजावणी हा पहिला टप्पा असेल. तक्रार निवारण प्रणाली अधिक वेगवान करून नागरिकांना थेट प्रतिसाद मिळेल याची खात्री करू. नागरिकांना प्रशासन अधिक सक्रिय आणि उत्तरदायी दिसेल, हा आमचा प्रयत्न असेल.
प्रश्न : सोलापूर शहरातील पाणी, रस्ते आणि कचरा व्यवस्थापन हे कायमचे प्रश्न आहेत. यावर ठोस आणि वेळबद्ध कृती आराखडा काय आहे?
उत्तर : पाणीपुरवठ्यासाठी गळती रोखणे, वितरण व्यवस्थेचे आधुनिकीकरण आणि नियोजनबद्ध वेळापत्रक जाहीर करणे यावर भर असेल. रस्त्यांच्या दुरुस्तीसाठी प्राधान्यक्रम निश्चित करून टप्प्याटप्प्याने कामे पूर्ण केली जातील. कचरा व्यवस्थापनात घरगुती कचऱ्याचे वर्गीकरण, प्रक्रिया प्रकल्पांची कार्यक्षमता वाढवणे आणि स्वच्छतेसाठी नागरिकांचा सहभाग वाढवणे हे तीन मुख्य मुद्दे असतील.
प्रश्न : महापालिकेतील प्रशासन आणि लोकप्रतिनिधी यांच्यातील समन्वय कसा वाढवणार? गेल्या काही वर्षांत प्रशासकीय राजवट होती, त्यानंतरची ही नवी सुरुवात कशी वेगळी असेल?
उत्तर : नियमित समन्वय बैठक, स्पष्ट संवाद आणि संयुक्त जबाबदारीची पद्धत राबवू. लोकप्रतिनिधी आणि प्रशासन एकत्रितपणे निर्णय घेतील, यावर भर राहील. ही नवी सुरुवात अधिक लोकाभिमुख, पारदर्शक आणि सहभागात्मक असेल.
प्रश्न : तरुणाई आणि महिलांसाठी शहर विकासात कोणत्या विशेष योजना आणणार आहात ? ५० टक्के महिला प्रतिनिधित्वाचा प्रत्यक्ष निर्णयप्रक्रियेत कसा उपयोग होईल ?
उत्तर : तरुणांसाठी कौशल्यविकास, क्रीडा सुविधा आणि उद्योजकता प्रोत्साहन योजना राबवण्याचा विचार आहे. महिलांसाठी सुरक्षित सार्वजनिक सुविधा, आरोग्य व स्वावलंबन उपक्रमांवर भर दिला जाईल. ५० टक्के महिला प्रतिनिधित्व हे केवळ आकडेवारी नसून निर्णय प्रक्रियेत संवेदनशील आणि समतोल दृष्टीकोन आणणारी ताकद आहे.
प्रश्न : सोलापूरच्या आर्थिक विकासासाठी उद्योग, रोजगार आणि गुंतवणूक याबाबत तुमची ठोस भूमिका काय आहे ?
उत्तर : स्थानिक उद्योगांना प्रोत्साहन, नवीन गुंतवणुकीसाठी सुलभ प्रक्रिया आणि औद्योगिक पायाभूत सुविधा मजबूत करणे हे आमचे उद्दिष्ट आहे. टेक्सटाईल, लघुउद्योग आणि सेवा क्षेत्राला चालना देऊन रोजगारनिर्मिती वाढवण्याचा प्रयत्न राहील.
प्रश्न : महापालिकेतील पारदर्शकता आणि भ्रष्टाचारमुक्त कारभारासाठी कोणती यंत्रणा राबवणार? ऑनलाइन तक्रार निवारण, ई-गव्हर्नन्स यावर काय भर असेल?
उत्तर : सर्व महत्त्वाच्या सेवा ऑनलाइन करण्यात आल्या आहेत आणि कामकाजाची माहिती सार्वजनिक करण्याचा आमचा मानस आहे. तक्रार निवारण प्रणाली अधिक प्रभावी करून वेळबद्ध उत्तर देण्याची जबाबदारी निश्चित करण्यात येईल. पारदर्शकता आणि उत्तरदायित्व हीच आमच्या प्रशासनाची ओळख राहील.
प्रश्न : महापौर म्हणून सोलापूरसाठी तुमची दीर्घकालीन विकासाची संकल्पना काय आहे?
उत्तर : माझी संकल्पना स्पष्ट आहे. सोलापूर हे केवळ ऐतिहासिक शहर नसून आधुनिक, उद्योगप्रधान आणि नागरिककेंद्री शहर व्हावे. पायाभूत सुविधा मजबूत करताना शिक्षण, आरोग्य आणि रोजगार या तीन स्तंभांवर आम्ही भर देणार आहोत.
प्रश्न : पुढील काही महिन्यांत नागरिकांना कोणते ठोस बदल दिसतील?
उत्तर : पाणीपुरवठा, स्वच्छता आणि रस्ते दुरुस्ती या मूलभूत सुविधांवर तातडीने लक्ष केंद्रित केले जाईल. तक्रार निवारण प्रणाली अधिक गतिमान केली जाईल, जेणेकरून नागरिकांना वेळेवर प्रतिसाद मिळेल.
प्रश्न : स्मार्ट सिटी आणि डिजिटल प्रशासनाबाबत तुमची भूमिका काय असेल?
उत्तर : सर्व सेवा ऑनलाइन सुरू आहेत.
ई-गव्हर्नन्स अधिक सक्षम करून पारदर्शक आणि वेळबद्ध करण्याचा आमचा प्रयत्न राहणार आहे. नागरिकांना महापालिकेच्या कामकाजाची माहिती सहज उपलब्ध व्हावी, हा आमचा उद्देश आहे.
प्रश्न : तरुणाई आणि उद्योग क्षेत्रासाठी काय विशेष उपक्रम राबवणार?
उत्तर : सोलापूरमध्ये लघुउद्योग, टेक्सटाईल आणि स्टार्टअप्सना प्रोत्साहन देण्यासाठी महापालिका पातळीवर सहकार्याचे व्यासपीठ निर्माण करणार आहोत. तरुणांसाठी कौशल्यविकासाशी निगडित उपक्रमांना चालना दिली जाईल.
प्रश्न : महिलांचे वाढते प्रतिनिधित्व शहराच्या निर्णय प्रक्रियेत कसे उपयोगी ठरेल?
उत्तर : महिलांचा सहभाग म्हणजे संवेदनशील आणि समतोल निर्णयप्रक्रिया. शहर विकासात त्यांचे मत आणि नेतृत्व निर्णायक ठरेल, याची मला खात्री आहे.
प्रश्न : सोलापूरच्या सांस्कृतिक वारशाबाबत तुमचा दृष्टिकोन काय आहे?
उत्तर : विकास आणि परंपरा यांचा समतोल राखणे अत्यावश्यक आहे. पारतंत्र्यात तिरंगा ध्वज फडकलेली नवी पेठेतील जुनी नगरपालिकेची इमारत, श्री सिद्धरामेश्वर मंदिर परिसरासह ऐतिहासिक वारसा स्थळांचे जतन करत पर्यटनवृद्धीवर भर देण्यात येईल.
प्रश्न : नागरिकांशी थेट संवादासाठी काय योजना आहे?
उत्तर : नियमित ‘जनसंवाद’ बैठक, सोशल मीडिया आणि डिजिटल माध्यमातून थेट संवादाची व्यवस्था उभारणार आहोत. महापौर कार्यालय सर्वसामान्यांसाठी खुले राहील.
