टेंभुर्णी : जगात खळबळ माजवणाऱ्या ‘एफस्टीन फाईल्स’ प्रकरणाच्या निषेधार्थ अखिल महाराष्ट्र वडार समाज संघटना यांच्या वतीने सोमवारी (दि. १६) सकाळी ११ वाजता टेंभुर्णी- कुर्डूवाडी रस्त्यावरील कुर्डूवाडी चौकात निषेध आंदोलन करण्यात आले. हे आंदोलन राजकुमार बाबा धोत्रे यांच्या नेतृत्वाखाली पार पडले.
यावेळी उपस्थितांना संबोधित करताना राजकुमार बाबा धोत्रे म्हणाले की, जेफ्री एफस्टीन प्रकरणातील न्यायालयीन कागदपत्रांमध्ये (एफस्टीन फाईल्स) काही भारतीय व्यक्तींची नावे आल्याची चर्चा विविध माध्यमांतून होत आहे. त्यामुळे संबंधित नावांची सखोल चौकशी करून दोषींवर कायदेशीर कारवाई करावी, अन्यथा सोलापूर जिल्ह्यात व्यापक आंदोलन छेडले जाईल, असा इशारा त्यांनी सरकारला दिला.
दरम्यान, सामाजिक कार्यकर्ते महावीर वजाळे यांनी सांगितले की, अमेरिकेतील महिला पत्रकार ज्युली ब्राउन यांनी २०१८ साली या प्रकरणाला नव्याने प्रकाशझोतात आणले. त्यानंतर जेफ्री एफस्टीन याला अटक करण्यात आली आणि हे प्रकरण संपूर्ण जगापुढे उघडे झाले. ‘एफस्टीन फाईल्स’मध्ये जगातील नामवंत राजकीय नेते व उद्योगपतींची नावे असल्याची चर्चा आहे. तसेच भारतातील राजकीय व उद्योजक क्षेत्रातील काही लोकांची नावे देखील चर्चेत असल्याचे सांगण्यात आले. यामध्ये पंतप्रधान नरेंद्र मोदी, उद्योगपती अनिल अंबानी, केंद्रीय मंत्री हरदीप सिंग पुरी यांची नावे चर्चेत असल्याचा उल्लेख करून सरकारने याबाबत अधिकृत भूमिका स्पष्ट करावी व दोषींवर तातडीने कायदेशीर कारवाई करावी, अशी मागणी करण्यात आली.
बीएमपी अध्यक्ष प्रशांत गायकवाड यांनीही ‘एफस्टीन फाईल्स’मधील सर्व नावांची निष्पक्ष चौकशी व्हावी, अन्यथा तीव्र आंदोलन करण्यात येईल, असा इशारा दिला.
या आंदोलनात समाधान धोत्रे, तानाजी धोत्रे, रानबा मासुळे, सचिन सीना ननवरे, शंभू पवार, रोहित धोत्रे, विकास बंदपट्टे, सुनील पवार, विलाज जगताप, राहुल धोत्रे, सुरज धोत्रे, अक्षय जगताप, सचिन तांदळे, अक्षय काळे, रोहिदास पवार, नितीन धोत्रे, बालाजी मोहिते, अभिषेक धोत्रे यांच्यासह शेकडो कार्यकर्ते उपस्थित होते.
दरम्यान, ‘एफस्टीन फाईल्स’ प्रकरणाबाबत विविध देशांमध्ये न्यायालयीन प्रक्रिया सुरू असून, संपूर्ण जगात खळबळ उडाली आहे. जगभरातील अनेक देशांमध्ये या प्रकरणावरून राजकीय वातावरण तापले असून, भारतात या प्रकरणाबाबत नेमकी भूमिका काय राहणार, याकडेही सर्वांचे लक्ष लागले आहे.
