सांगोला – चोपडी (ता.सांगोला) येथे शिवजन्म उत्सवानिमित्त विविध कार्यक्रमांचे आयोजन करण्यात आले होते. याप्रसंगी वक्ते सुनीलबापू लाड यांनी हिंदवी स्वराज्याचे संस्थापक छत्रपती शिवाजी महाराज यांचे कार्य व इतिहास सर्वांसाठी प्रेरणादायी आहे.
बदलत्या युगात इतिहास व धार्मिक ग्रंथ अभ्यासणे गरजेचे आहे असे विचार व्यक्त केले. यावेळी व्यासपीठावर डॉ.नवनाथ बाबर, पोपट यादव, बाळासाहेब यादव, भिकाजी बाबर, दगडू बाबर, जनार्दन बाबर, दशरथ बाबर उपस्थित होते. यावेळी मिरवणुकीत बाळासाहेब देसाई महाविद्यालयातील व जि.प.प्रा.केंद्र शाळेच्या विद्यार्थ्यांनी तसेच शिवप्रेमींनी पारंपारिक मर्दानी खेळ, लेझीम सादर करून उपस्थितांची मने जिंकली. भजनी मंडळानेही टाळ मृदुंगाच्या साथीमध्ये शोभा वाढवली.
यावेळी घेण्यात आलेल्या वक्तृत्व स्पर्धेत विद्यार्थ्यांनी शिवरायांचा इतिहास दृष्टिक्षेपात आणला. कबीर मुलाणी व त्यांच्या सहकाऱ्यांनी छत्रपती शिवाजी महाराज यांच्या कार्यावर पोवाडा व सुभाष बाबर यांनी शिवगौरवपर कविता सादर केली. आर्मीमध्ये निवड झालेल्या व कार्यरत असणाऱ्या प्रतीक बाबर, प्रदीप खंडागळे, रितेश खंडागळे, अतुल चव्हाण, सुमित बाबर यांचा तसेच प्रगतशील डाळिंब उत्पादक शेतकरी अभिजीत बाबर, गुलाब बाबर, पुरवठा अधिकारी विशाल मेखले यांचा सन्मान करण्यात आला.
कार्यक्रमाचे प्रास्ताविक सतीश पाटील, सूत्रसंचालन राहुल बाबर व सुनील जवंजाळ यांनी केले. आभार सेवानिवृत्त सुभेदार अमोल बाबर यांनी मानले.
