अक्कलकोट : योग्य वयात लसीकरण केल्यास भविष्यात गर्भाशय मुखाच्या कर्करोगापासून संरक्षण मिळू शकते. एचपीव्ही (HPV) लसीकरण प्रभावी व शंभर टक्के परीणामकारक आहे. तीन महिने कालावधीत ९ ते १४ वर्षे वयोगटातील सर्व मुलींना ही लस दिली जाणार आहे. लसीकरण सिंगल डोस व मोफत असून सर्वांनी न घाबरता लसीकरण करून घ्यावे असे आवाहन डॉ. रवींद्र बनसोडे यांनी केले. विद्यार्थिनींच्या आरोग्य संरक्षणासाठी शुक्रवारी येथील मराठा मंदिर श्री शहाजी हायस्कूल, अक्कलकोट येथे एचपीव्ही (HPV) लसीकरण मोहिमेचा शुभारंभ करण्यात आला.त्यावेळी ते बोलत होते. यावेळी मुख्याध्यापक आर.एस. पडवलकर , अक्कलकोट नगर परिषद आरोग्य सभापती अविनाश मडीखांबे, नन्नू कोरबू, पर्यवेक्षक वाय. पी.कबाडे, सांस्कृतिक विभाग प्रमुख जे.एस. बगले , सिस्टर शीतल जाधव यांच्या सह पालक, विद्यार्थिनी उपस्थित होते.
गर्भाशय मुखाच्या कर्करोगापासून संरक्षण मिळावे या उद्देशाने आरोग्य विभागाच्या वतीने ही मोहीम राबविण्यात आली. कार्यक्रमाच्या वेळी ग्रामीण रुग्णालय अक्कलकोट येथील वैद्यकीय अधिकारी डॉ. रवींद्र बनसोडे यांनी विद्यार्थिनींना एचपीव्ही विषाणू, त्यापासून होणारे आजार तसेच लसीकरणाचे महत्त्व याबाबत मार्गदर्शन केले.
या प्रसंगी शाळेचे मुख्याध्यापक, शिक्षकवृंद तसेच आरोग्य विभागाचे कर्मचारी उपस्थित होते. मोहिमेअंतर्गत पात्र विद्यार्थिनींना एचपीव्ही लस देण्यात आली. विद्यार्थिनींनीही उत्साहाने या उपक्रमात सहभाग नोंदविला.
पंतप्रधान नरेंद्र मोदी व मुख्यमंत्री देवेंद्र फडणवीस यांच्या संकल्पनेतून विद्यार्थिनींच्या निरोगी भविष्यासाठी अशा आरोग्यविषयक उपक्रमांचे महत्त्व मोठे असून ही मोहीम समाजात आरोग्याविषयी जनजागृती निर्माण करणारी ठरेल, असे आरोग्य सभापती अविनाश मडीखांबे यांनी व्यक्त केले.
यावेळी बोलताना सिस्टर शीतल जाधव यांनी लस पूर्णपणे सुरक्षित असून छोट्या छोट्या उदाहरणातून स्वच्छतेचे महत्त्व विषद केले.
स्वागत व प्रास्ताविक पर्यवेक्षक वाय पी कबाडे यांनी केले तर आभार जे. एस. बगले यांनी मानले. यावेळी ज्येष्ठ शिक्षक एम. बी. मुनोळी, एस. के . माळवदकर, आर.ए. जाधव, सिस्टर सुरेखा वर्दे, नागम्मा नंदे, विनोद ढगे,श्रीशैल कोटनुर आदीसह पालक विद्यार्थिनी उपस्थित होते.
एचपीव्ही लसीकरण मोहिमेचा शुभारंभ ८ मार्च महिला दिना दिवशी करण्यात आला.
सिंगल मोफत डोस -एचपीव्ही लसीमुळे गर्भाशय मुखाच्या कर्करोगापासून संरक्षण मिळते. कोणतेही दुष्परिणाम नाही. लसीकरण तीन महिन्यात होणार आहे.
सई जगदाळे नववी अ – माझ्या पालकांनी सुमारे साडेसात हजार रुपये खर्चून या आधीच ही लस दिली आहे. शासन मोफत देत आहे हे कौतुकास्पद आहे. मला काहीही त्रास झाला नाही.
