सोलापूर – इराण – इजराइल अमेरिका यांच्या युद्धामुळे भारतावर मोठे गॅस संकट उभे ठाकले आहे. घरगुती गॅस सिलेंडरचा पुरवठा विस्कळीत होत असल्याने अनेक नागरिक चिंताक्रांत बनले आहेत. तर दुसरीकडे कमर्शियल म्हणजेच व्यावसायिक गॅस पुरवठा शासनाने बंद केल्यामुळे अनेक हॉटेल व्यवसायिक बंद पडण्याच्या मार्गावर आहेत. इतके दिवस गॅसचासाठा शिल्लक असल्याने हॉटेल व्यवसाय सुरू राहिले. परंतु आता उरलेला जास्तसाठा संपल्याने अनेक हॉटेल शुक्रवारपासून बंद पडलेले चित्र दिसत आहेत.
दरम्यान, सोलापूर शहरातील हॉटेलमध्ये व्यावसायिक गॅस नसल्याने किचन पूर्णतः बंद करण्यात आला आहे. किचन बंद झाल्यामुळे हॉटेल व्यवसायिकांवर तसेच येथे कार्यरत असणाऱ्या कर्मचाऱ्यांवर उपासमारीची कुराड कोसळली आहे. एकीकडे भाडे कर्मचाऱ्यांचा पगार इतर खर्च कायम असताना उत्पन्न काहीच पदरी पडत नसल्यामुळे हॉटेल मालकांपुढे यक्ष प्रश्न उभा ठाकला आहे.
व्यवसायिक गॅस बंद झाल्यामुळे हॉटेल व्यवसाय पूर्ण बंद पडला आहे. शासनाने यावर योग्य तोडगा काढावा. आणि व्यावसायिक गॅस पुरवठा सुरळीत करावा, अशी मागणी यावेळी हॉटेल मालक निलेश धोत्रे यांनी केली आहे.
हॉटेल व्यवसाय बंद पडल्यामुळे हॉटेलवर अवलंबून असणारे अनेक कामगारांवर उपासमारीची नामुष्की ओढवत आहे. रोजचा खर्च तसेच भाडे आणि कामगारांचा पगार कसा काढावा हा प्रश्न व्यवसायिकांना सतावत आहे.
