सोलापूर – जागतिक महिला दिनानिमित्त बाल विकास प्रकल्प अधिकारी, सोलापूर शहर पश्चिम अंतर्गत कुचननगर व विजापूर रोड बिटच्या वतीने महिला सक्षमीकरणाचा संदेश देणारे विविध सांस्कृतिक कार्यक्रम उत्साहात पार पडले. हा कार्यक्रम निर्मलकुमार फडकुले सभागृह येथे आयोजित करण्यात आला होता.
दरम्यान, या कार्यक्रमास सोलापूर शहर पश्चिम विभागाचे बालविकास प्रकल्प अधिकारी दीपक ढेपे, ॲड. निलिमा काशीनाथ वाडेकर, वैष्णवी निर्मळे, लघुउद्योजिका सरस्वती चोपडे, अनुराधा कुलकर्णी, स्मिता भावे, माया जोशी, मसुती, माजी नगरसेविका शोभा नष्टे, कल्पना कदम आदी मान्यवर उपस्थित होते. या कार्यक्रमाचे उद्घाटन मान्यवरांच्या हस्ते दीपप्रज्वलन करून करण्यात आले.
यावेळी मान्यवरांनी महिलांना विविध क्षेत्रात सक्षम होण्याचे आवाहन करत मार्गदर्शन केले. प्रमुख वक्त्या ॲड. निलिमा वाडेकर यांनी महिलांसाठी असलेले कायदे, हेल्पलाईन क्रमांक, तक्रार नोंदविण्याची प्रक्रिया तसेच अडचणीच्या वेळी मदत कशी व कुठे घ्यावी याबाबत सविस्तर माहिती दिली. लघुउद्योजिका सरस्वती चोपडे यांनी महिलांसाठी उपलब्ध असलेल्या लघुउद्योगाच्या संधी व आर्थिक स्वावलंबनाचे मार्ग यावर मार्गदर्शन केले. तत्पूर्वी कार्यक्रमाच्या प्रारंभी बाल विकास प्रकल्प अधिकारी दीपक ढेपे यांनी प्रस्ताविकेत महिला सक्षमीकरणाचे महत्त्व अधोरेखित केले.
कार्यक्रमावेळी अंगणवाडी सेविका व मदतनीस यांनी थोर समाजसेविकांची वेशभूषा सादर करून समाजजागृतीपर सादरीकरण केले. तसेच बालविवाह या सामाजिक समस्येवर आधारित नाटके, नृत्य, कविता आणि गाणी यांचेही प्रभावी सादरीकरण करण्यात आले.
महिला दिनानिमित्त अंगणवाडी सेविका, मदतनीस आणि बालकांच्या सांस्कृतिक कार्यक्रमांचे नियोजन मुख्यसेविका रोहिणी निर्मळे यांनी केले. कार्यक्रमाचे सूत्रसंचालन पूजा गुरव व रुपाली इंगळे यांनी केले.
तर आभार सुमेधा पाटील यांनी मानले. कार्यक्रमाच्या यशस्वीतेसाठी दोन्ही बिटमधील सेविका, मदतनीस यांनी परिश्रम घेतले.
