पंढरपूर – प्राथमिक आणि माध्यमिक शाळांच्या परीक्षा आता लवकरच संपतील आणि उन्हाळ्याच्या सुट्ट्या सुरू होणार आहेत. याकाळात बच्चेकंपनींचे करमणूकीचे तसेच मौजमाजेचे दिवस असतात. त्यांचे खेळण्या बागडण्याचे दिवस असतात. मात्र तरीही पंढरपूर येथील दोन्ही उद्याने किंवा बागा सध्या बंद अवस्थेत आहेत. या मधील जिजामाता बागेचे तर नूतनीकरण करण्यात आलेले आहे. मात्र राजकीय श्रेयवादाच्या साठमारीत या बागेचे उदघाटन रखडले आहे. त्यामुळे शहरातील बच्चेकंपनींच्या मनोरंजनासाठी या दोन्ही बागा लवकर सुरू करण्यात याव्यात अशी मागणी आता नागरिकांतून विशेषत: बच्चेकंपनींच्या पालकवर्गातून केली जात आहे.
पंढरपूर येथे जिजामाता उद्यान आणि पद्मावती बाग आहे, मात्र ही दोन्ही उद्याने कोरोना काळापासून साधारणपणे सहा सात वर्षे झाली तरीही बंद अवस्थेत आहेत. यातील जिजामाता उद्यान सुमारे अडीच ते तीन कोटी रुपये खर्च करून नूतनीकरण करून सज्ज झाले आहे. मात्र राजकीय श्रेयवाद आणि कुरघोडीच्या राजकारणात त्याचे उद्घाटन दिवसेंदिवस लांबणीवर पडत आहे. जिजामाता ही बाग शहराच्या मध्यवर्ती ठिकाणी छत्रपती शिवाजी महाराज चौकात आहे. या बागेत लहान मुलांसाठी नवीन खेळणी बसविण्यात आली आहेत विशेष म्हणजे हिरवीगार झाडी, हिरवळ याने समृद्ध असलेली ही बाग पन्नास वर्षांपेक्षा जुनी आहे.
पद्मावती उद्यान ही एक ऐतिहासिक वास्तू असून पेशवेकालीन बांधकाम एखाद्या पुरातन स्टेडियम सारखे आहे, दोन महिन्यांपूर्वी नगराध्यक्षा डॉ. प्रणिता भालके यांच्या नेतृत्वाखाली ही बाग स्वच्छ करण्यात आली तेव्हा शेकडो टन कचरा या बागेतून किंवा उद्यानातून काढण्यात आला. याठिकाणी सुंदर असे पद्मावती देवीचे मंदिर असून नवरात्रात येथे मोठी गर्दी असते. मध्यंतरीच्या काळात या उद्यानात रेल्वेबाबा गाडी, खेळणी बसविण्यात आलेली होती. मात्र सध्या त्याची पार वाट लागलेली दिसुन येते आहे. त्यामुळे या उद्यानाचे देखील नूतनीकरण करुन ही बाग शहरातील बच्चेकंपनीसाठी तसेच नागरिकांसाठी एक आकर्षणाचे ठिकाण कसे होईल यासाठी प्रयत्न करणे गरजेचे आहे.
जिजामाता उद्यान हे पूर्वी बुरडाची बाग म्हणून प्रसिद्ध होती. येथे सुंदर कारंजे होते. ससा, कासव, मोर, हरिण, मुंगूस असे पाळीव प्राणी देखील या बागेत असायचे. १९८०च्या दशकात ही बाग मनोरंजनाचे ठिकाण होते. अनेक व्याख्याने, सभा, नाटके या बागेत झाली असून सर्वात महत्वाचे म्हणजे शहरातील, उपनगरातील गर्भवती महिलांचे डोहाळजेवण व ईतर छोटे कार्यक्रम देखील या बागेतच पूर्वी होत असत. मुलांना खेळण्या बागडण्यासाठी एक उत्तम पर्याय ही बाग होती. त्यामुळे जिजामाता आणि पद्मावती या दोन्ही बागा उन्हाळी सुट्टीत सुरू कराव्यात अशी मागणी शहरातील नागरिकांमधून विशेषत: पालकवर्गातून होत आहे.
——————–
चौकट : ( मुलांनी खेळायचे कुठे हा प्रश्न )
राजकारण आता बास झाले. मुलांच्या करमणुकीसाठी बागा सुरू करण्यात याव्यात, कारण सुट्ट्या मध्ये मुलांनी कुठे खेळायचे हा प्रश्नच आहे. शहरातील सर्व मैदाने भाविकांच्या वाहनासाठी पार्किंग तळ झाली असून खेळण्यासाठी जागा नाहीत. शालेय मुले मोबाईल मध्ये गुंतत असून हे अत्यंत धोकादायक आहे, पब जी, फ्री फायर,रिल्स, अश्लिल साईट अशा मुळे मुले बिघडत चालली आहेत.
——————–
चौकट : ( नगराध्यक्षांनी पुढाकार घ्यावा )
पंढरपूर नगरपरिषदे मध्ये सध्या सत्तांतर झाले असून नगराध्यक्षपदी तिर्थक्षेत्र विकास आघाडीच्या डॉ.प्रणिता भालके या काम पहात आहेत. मध्यंतरी त्यांनी स्वच्छता मोहिम हाती घेतलेली होती. या मध्ये पद्मावती उद्यानाची देखील स्वच्छता करण्यात आली होती. त्यामुळे काही दिवसात पद्मावती बाग किंवा उद्यान सर्वसामान्यांसाठी खुली होणार असल्याच्या आशा काही प्रमाणात पल्लवीत झाल्या होत्या. मात्र स्वच्छतेनंतर पुन्हा बाग बंद अवस्थेत दिसून येत आहे. दरम्यान चार दिवसापूर्वीच नगराध्यक्षा डाँ.भालके यांनी शिवसेना ( एकनाथ शिंदे ) पक्षात प्रवेश केलेला आहे. त्यामुळे नगराध्यक्षा प्रणिता भालकेंनीच पद्मावती बाग सुरु करण्यासाठी आता पुढाकार घेणे गरजेचे आहे. कारण भाजपा आणि शिवसेना हे राज्याच्या सत्तेमधील भागीदार किंवा सत्तेतील मित्रपक्ष आहेत. त्यामुळे राजकीय श्रेयवादामुळे उदघाटनाच्या प्रतिक्षेत असलेले जिजामाता उद्यानाचे देखील उदघाटन लवकरात लवकर कसे करता येईल हे नगराध्यक्षांनी पाहणे आवश्यक आहे.
————
फोटोओळी : पंढरपूर : शहरातील मध्यवर्ती असलेल्या जिजामाता उद्यानाचा सुमारे चार ते पाच कोटी रुपये खर्चून कायापालट करण्यात आलेला आहे. या ठिकाणी बच्चे कंपनीसाठी आकर्षक खेळणी बसविण्यात आलेली आहे. मात्र केवळ राजकीय श्रेयवादामुळे उद्घाटना अभावी ही जिजामाता उद्यान बाग सध्या बंद आहे.
