सोलापूर : गोवा राज्यातील मडगाव येथे दि. ६ ते १० मे २०२६ दरम्यान उत्साहपूर्ण वातावरणात पार पडलेल्या “ग्लोबल कप नॅशनल हँडबॉल चॅम्पियनशिप” स्पर्धेत केगाव येथील सिंहगड पब्लिक स्कूल अँड ज्युनिअर कॉलेजच्या विविध गटांतील संघांनी उल्लेखनीय कामगिरी करत राष्ट्रीय स्तरावर आपला ठसा उमटविला.
देशभरातील नामांकित संघांच्या सहभागामुळे स्पर्धेला विशेष महत्त्व प्राप्त झाले होते. अशा उच्चस्तरीय स्पर्धेत सिंहगडच्या खेळाडूंनी जिद्द, शिस्त आणि सांघिक खेळाच्या जोरावर दिमाखदार यश संपादन केले. अंडर-१२ मुलींच्या गटात सिंहगड पब्लिक स्कूलच्या संघाने उपांत्यपूर्व फेरीत मनोविकास गोवा संघाचा ७-४ अशा गोल फरकाने पराभव करत शानदार विजय मिळविला. या सामन्यात सिंहगडच्या खेळाडूंनी आक्रमक तसेच बचावात्मक खेळाचे उत्कृष्ट प्रदर्शन केले. कु. शरयू वल्लभ वसेकर हिने प्रभावी खेळ करत “प्लेअर ऑफ द मॅच” पुरस्कार पटकाविला.
त्यानंतर तृतीय क्रमांकासाठी झालेल्या सामन्यात सिंहगड पब्लिक स्कूल संघाने विबग्योर खारघर संघावर ६-२ असा एकतर्फी विजय मिळवत स्पर्धेत तृतीय क्रमांक मिळविला. या सामन्यात कु. जानवी दिनेश बुराडे हिने उल्लेखनीय कामगिरी करत “प्लेअर ऑफ द मॅच” पुरस्काराचा मान मिळविला.
अंडर-१७ मुलांच्या गटात सिंहगड पब्लिक स्कूलच्या संघाने उत्कृष्ट फिटनेस, सांघिक समन्वय आणि जिद्दीच्या जोरावर संयुक्त तृतीय क्रमांक पटकाविला. तसेच अंडर-१७ मुलींच्या गटातही संघाने प्रभावी खेळाचे प्रदर्शन करत संयुक्त तृतीय क्रमांक मिळवून संस्थेचा गौरव वाढविला.
या स्पर्धेसाठी खेळाडूंना प्रशालेचे क्रीडा शिक्षक व प्रशिक्षक राजू ठाकूर यांचे मोलाचे मार्गदर्शन लाभले. संघ व्यवस्थापक महेश गोगी यांनी उत्कृष्ट नियोजन केले, तर खेळाडूंच्या फिटनेससाठी फिजिओ मंजुषा सावंत यांनी विशेष परिश्रम घेतले. त्यांच्या मार्गदर्शनामुळे खेळाडूंमध्ये आत्मविश्वास आणि ऊर्जा कायम राहिली.
सिंहगड पब्लिक स्कूलच्या या उल्लेखनीय यशाबद्दल सावित्रीबाई फुले शिक्षण प्रसारक मंडळाचे सहसचिव व सिंहगड इन्स्टिट्यूट, केगाव-सोलापूरचे कॅम्पस डायरेक्टर संजय नवले यांनी सर्व खेळाडू, प्रशिक्षक, संघ व्यवस्थापक, फिजिओ तसेच पालकांचे अभिनंदन केले. “खेळामुळे विद्यार्थ्यांमध्ये शिस्त, आत्मविश्वास, नेतृत्वगुण आणि संघभावना विकसित होते. राष्ट्रीय स्तरावर विद्यार्थ्यांनी मिळवलेले हे यश संपूर्ण सिंहगड शिक्षण संस्थेसाठी अभिमानास्पद आहे,” असे गौरवोद्गार त्यांनी यावेळी व्यक्त केले.
या यशामुळे सोलापूर परिसरात आनंदाचे वातावरण निर्माण झाले असून विविध स्तरांतून खेळाडू व सिंहगड शिक्षण संस्थेवर अभिनंदनाचा वर्षाव होत आहे.
