सोलापूर – ग्रामीण भागातील मागासवर्गीय, गरीब व गरजू मुला-मुलींना रोजगाराभिमुख कौशल्य प्रशिक्षण उपलब्ध करून देण्यासाठी जिल्हा परिषद समाज कल्याण विभागाकडून विविध उपक्रम राबविण्याची तयारी सुरू आहे. जिल्हा परिषदेच्या सेस फंडातून एमएस-सीआयटी, टॅलीसह अन्य संगणक अभ्यासक्रम, टायपिंग तसेच पोलीस भरतीपूर्व प्रशिक्षण देण्याचा विचार सुरू असल्याची माहिती समाज कल्याण समितीच्या सभापती संस्कृती सातपुते यांनी दिली. समाजकल्याण समितीची बैठक संपन्न झाली. बैठक संपन्न झाल्यानंतर त्यांनी प्रसारमाध्यमांशी संवाद साधला.
यावेळी त्या म्हणाल्या, ग्रामीण भागातील विद्यार्थ्यांना रोजगाराच्या स्पर्धेत सक्षम करण्यासाठी आधुनिक कौशल्य प्रशिक्षणाची आवश्यकता लक्षात घेऊन हा उपक्रम राबविण्यात येणार आहे. डिजिटल युगात संगणक शिक्षणाला वाढती मागणी लक्षात घेता एमएस-सीआयटी, टॅली आणि इतर कॉम्प्युटर कोर्सेसद्वारे युवक-युवतींना रोजगाराच्या नव्या संधी उपलब्ध करून देण्याचा प्रयत्न करण्यात येणार आहे.
यासोबतच सरकारी नोकरीची तयारी करणाऱ्या युवकांसाठी टायपिंग प्रशिक्षण आणि पोलीस भरतीपूर्व मार्गदर्शन व शारीरिक प्रशिक्षण देण्याचाही प्रस्ताव आहे. ग्रामीण भागातील अनेक युवक आर्थिक अडचणींमुळे खासगी प्रशिक्षण घेऊ शकत नाहीत. अशा विद्यार्थ्यांना जिल्हा परिषद स्तरावर प्रशिक्षण उपलब्ध करून देण्याचा मानस असल्याचे सातपुते यांनी स्पष्ट केले.
ग्रामीण मुलींना स्वावलंबी बनविण्यासाठी ब्युटीपार्लर प्रशिक्षण देण्याचाही निर्णय विचाराधीन आहे. या प्रशिक्षणातून ग्रामीण भागातील मुलींना स्वयंरोजगाराच्या संधी निर्माण होतील आणि त्या आर्थिकदृष्ट्या सक्षम बनतील, असा विश्वास व्यक्त करण्यात आला. त्याचबरोबर युवकांसाठी वाहन चालविण्याचे प्रशिक्षणही आयोजित करण्यात येणार असून, त्यातून रोजगाराच्या विविध संधी उपलब्ध होण्यास मदत होणार आहे.
अपंग व्यक्तींनाही स्वावलंबनाची संधी मिळावी यासाठी लघुउद्योग विषयक कार्यशाळा घेण्याचे नियोजन समाज कल्याण विभागाकडून करण्यात येत आहे. या कार्यशाळांद्वारे अपंग बांधवांना लघुउद्योग उभारणी, व्यवसाय व्यवस्थापन आणि शासनाच्या योजनांची माहिती देण्यात येणार आहे.
कोट
शासनाच्या योजनांचा लाभ प्रत्यक्ष गरजूंपर्यंत पोहोचवणार
जिल्ह्याच्या ग्रामीण भागातील गरीब व मागास घटकांतील युवक-युवतींना रोजगारक्षम बनविणे हेच समाज कल्याण विभागाच्या या उपक्रमांचे प्रमुख उद्दिष्ट आहे. शासनाच्या योजनांचा लाभ प्रत्यक्ष गरजूंपर्यंत पोहोचवून त्यांना आत्मनिर्भर बनविण्यावर भर दिला जाणार आहे.
– संस्कृती सातपुते,सभापती समाजकल्याण विभाग जिल्हा परिषद सोलापूर
चौकट
अकलूजमध्ये मागासवर्गीय विद्यार्थ्यांसाठी वसतिगृहाची मागणी
अकलूज येथे ग्रामीण भागातील मागासवर्गीय विद्यार्थ्यांसाठी समाज कल्याण विभागामार्फत नवीन वसतिगृह उभारण्यात यावे, अशी मागणी समाज कल्याण समितीच्या सभापती संस्कृती सातपुते यांनी केली आहे. यासाठी आवश्यक जागा व निधी उपलब्ध करून देण्याबाबत पालकमंत्री जयकुमार गोरे यांच्याकडे निवेदन सादर करण्यात आले. यावेळी पालकमंत्री गोरे यांनी वसतिगृहासाठी तब्बल १० कोटी रुपयांचा निधी उपलब्ध करून देण्याचे आश्वासन दिल्याची माहिती सातपुते यांनी दिली. ग्रामीण भागातील विद्यार्थ्यांना शिक्षणासाठी चांगल्या सुविधा उपलब्ध व्हाव्यात, हा या मागणीमागील उद्देश असल्याचे त्यांनी सांगितले.
चौकट
समाजकल्याण विभागात अधिकारी कर्मचाऱ्यांची कमतरता
सोलापूर जिल्हा परिषदेच्या समाजकल्याण विभागात अधिकारी आणि कर्मचारी कमतरता भासत आहे. समाजकल्याण विभागाला पूर्ण वेळ समाजकल्याण अधिकारी मिळावा यासाठी प्रयत्न सुरू असून, यासंबंधी जिल्हा परिषद आणि शासनस्तरावर पाठपुरावा सुरू आहे. सीईओ कुशल जैन यांच्या दालनात या संबंधी चर्चा करण्यात आली आहे. त्याच पद्धतीने निरीक्षक आणि ईतर कर्मचाऱ्यांची भरती देखील करण्यासंबंधी पाठपुरावा सुरू असल्याचे सभापती संस्कृती सातपुते यांनी सांगितले.
