सोलापूर – रेल्वेची ७९ व्या स्कॉट मेमोरियल प्रिसिजन क्रिकेट स्पर्धेत मॉडेल क्रिकेट ॲकॅडमी आणि ख्वाजा बंदेनवाज क्रिकेट क्लब यांनी आपापल्या प्रतिस्पर्ध्यांवर मात करत शानदार विजय नोंदवले.
सकाळच्या सत्रात पावसाच्या कारणास्तव ८-८ षटकांच्या खेळवण्यात आलेल्या सामन्यात एस एस आय संघाने नाणेफेक जिंकून प्रथम गोलंदाजी स्वीकारली. प्रथम फलंदाजी करताना मॉडेल क्रिकेट ॲकॅडमीने ८ षटकांत ६ बाद ८८ धावा उभारल्या. यात वैष्णव जावळेने ३०, सुमित येवलेने २२ तर विवेक अंचीने १६ धावांचे योगदान दिले. एस.एस.आय.कडून गोलंदाजीत निखिल दोरणाल व चेतन नराळ यांनी प्रत्येकी २ बळी, तर दीपक राजुल व मनीष यमुल यांनी प्रत्येकी १ बळी घेतला. प्रत्युत्तरात मैदानात उतरलेला एस एस आय संघ ८ षटकांत ५ बाद ७४ धावांपर्यंतच मजल मारू शकला. त्यांच्याकडून निखिल मादास (१६), समर्थ दोरणाल (१६) आणि निखिल दोरनाल (१२) यांनी संघर्ष केला. मॉडेल ॲकॅडमीच्या प्रथमेश राठोड व सुदेश राठोड यांनी प्रत्येकी २, तर आदर्श नागोजीने १ बळी घेत एस एस आयला रोखले. हा सामना मॉडेल क्रिकेट ॲकॅडमीने १४ धावांनी जिंकला. उत्कृष्ट कामगिरीबद्दल प्रथमेश राठोडला वरिष्ठ खेळाडू राजा पटेल यांच्या हस्ते, आणि विक्रांत पवार, अंबादास तोरा, वासुदेव धोरणाल व वैभव इरावती यांच्या उपस्थितीत सामनावीर पुरस्कार देण्यात आला. या सामन्यात मजहर मंगोली व चिराग शहा यांनी पंच म्हणून, तर सचिन गायकवाड यांनी गुणलेखक म्हणून काम पाहिले.
दुपारच्या सत्रात पावसाच्या व्यत्ययामुळे १५-१५ षटकांच्या झालेल्या दुसऱ्या सामन्यात मारिया क्रिकेट ॲकॅडमी, ठाणे संघाने नाणेफेक जिंकून प्रथम गोलंदाजीचा निर्णय घेतला. पहिल्यांदा फलंदाजी करताना ख्वाजा बंदे नवाज क्रिकेट ॲकॅडमीने वसीम बॅगच्या ७९ धावांच्या वादळी खेळीच्या जोरावर १५ षटकांत ६ बाद १५० धावांचा टप्पा गाठला. केदारनाथ आणि आदर्श राठोड यांनी प्रत्येकी १६ धावा केल्या. मारिया क्रिकेट क्लबतर्फे बाबूने ३, बाळाने २ तर जयप्रकाशने १ बळी घेतला. १५१ धावांच्या आव्हानाचा पाठलाग करताना मारिया क्रिकेट क्लबचा डाव १५ षटकांत ८ बाद १२१ धावांवर मर्यादित राहिला. त्यांच्याकडून अभिषेकने ३०, बाबूने १७ आणि मीत घोळतने १६ धावा केल्या. ख्वाजा बंदेनवाज संघाकडून अष्टपैलू वसीम बेगने गोलंदाजीतही चमक दाखवत अवघ्या ५ धावांत ३ बळी टिपले, तर जाहिद पठाण आणि जकवान यांनी प्रत्येकी १ बळी घेतला. हा सामना ख्वाजा बंदेनवाज क्रिकेट ॲकॅडमीने २९ धावांनी खिशात घातला. दमदार अष्टपैलू कामगिरी करणाऱ्या वसीम बॅगला वरिष्ठ खेळाडू लियाकत शेख आणि राजा पटेल यांच्या हस्ते, व अतुल बांदोडकर आणि सचिन गायकवाड यांच्या उपस्थितीत सामनावीर पुरस्काराने गौरविण्यात आले. या सामन्याचे पंच म्हणून महेश सोनवणे व युनूस खान यांनी, तर गुणलेखक म्हणून सचिन गायकवाड यांनी काम पाहिले.
उद्याचे सामने:
सकाळी : सेंट्रल रेल्वे इन्स्टिट्यूट ‘बी’ विरुद्ध श्री स्वामी समर्थ क्रिकेट क्लब.
दुपारी : खाजा बंदे नवाज क्रिकेट क्लब विरुद्ध कंपली प्रकाश क्रिकेट ॲकॅडमी
