सोलापूर – संभाव्य पाणीटंचाईच्या पार्श्वभूमीवर गावपातळीवरील अडचणी तातडीने सोडविण्यासाठी सर्व विभागीय अधिकाऱ्यांनी समन्वयाने काम करण्याचे निर्देश जिल्हा परिषद सोलापूरच्या जलव्यवस्थापन व स्वच्छता समितीच्या बैठकीत देण्यात आले. जिल्ह्यातील जलसंधारण, पाणीपुरवठा आणि भूजलस्थितीचा आढावा घेताना लोकप्रतिनिधींनी मांडलेल्या विविध समस्यांवर तातडीने कार्यवाही करण्याची गरज बैठकीत अधोरेखित करण्यात आली.
जिल्हा परिषद सोलापूर येथे सोमवारी झालेल्या या बैठकीस समितीचे अध्यक्ष दीपक वैद्य, जिल्हा परिषद उपाध्यक्ष इंद्रजित पवार, प्रभारी अतिरिक्त मुख्य कार्यकारी अधिकारी चंद्रशेखर जगताप, जिल्हा जलसंधारण अधिकारी हरिश सपताळे, सहाय्यक जिल्हा जलसंधारण अधिकारी एन. एस. लाड यांच्यासह विविध विभागांचे खातेप्रमुख आणि समिती सदस्य उपस्थित होते.
या बैठकीत कृषी विभाग, महाराष्ट्र जीवन प्राधिकरण, ग्रामीण पाणीपुरवठा विभाग, मृद व जलसंधारण विभाग, भूजल सर्वेक्षण व विकास यंत्रणा, यांत्रिकी विभाग तसेच लघुपाटबंधारे विभागाच्या कामकाजाचा सविस्तर आढावा घेण्यात आला. कृषी विभागामार्फत राबविण्यात येणाऱ्या शेततळे योजनांच्या प्रगतीची माहिती घेण्यात आली. तसेच भूजल सर्वेक्षण विभागाने जिल्ह्यातील तालुकानिहाय भूजल पातळीत झालेली वाढ-घट याबाबतचे सादरीकरण करून सद्यस्थिती स्पष्ट केली.
महाराष्ट्र जीवन प्राधिकरणाच्या शिरभावी व आंधळगाव पाणीपुरवठा योजनांच्या कामांचा आढावा घेण्यात आला. मृद व जलसंधारण विभागाकडून कोल्हापूर पद्धतीच्या बंधाऱ्यांची स्थिती, साठवण तलाव आणि सर्वेक्षणाबाबत माहिती सादर करण्यात आली. यांत्रिकी विभागाला ग्रामीण भागातील हातपंप दुरुस्तीची कामे तातडीने पूर्ण करण्याच्या सूचना देण्यात आल्या. उन्हाळी टंचाईच्या काळात ग्रामस्थ, पदाधिकारी आणि जिल्हा परिषद सदस्यांकडून मांडण्यात आलेल्या समस्यांवर चर्चा करून त्या सोडविण्यासाठी तालुकास्तरावरील सर्व विभागीय अधिकाऱ्यांनी परस्पर समन्वयाने कार्यवाही करावी, असे निर्देश बैठकीत देण्यात आले.
जिल्ह्यातील जलस्रोतांचे प्रभावी व्यवस्थापन, पाणीपुरवठा योजनांची कार्यक्षमता आणि टंचाईग्रस्त भागांतील नागरिकांना दिलासा देण्यासाठी प्रशासनाने अधिक सजगपणे काम करण्याची आवश्यकता बैठकीत व्यक्त करण्यात आली. या बैठकीस समिती सदस्य रामप्पा चिवडशेटटी, रशमी हिप्परगी सदस्य, सिध्दराम शिवमुर्ती, गीतांजली साळुंखे, नंदकुमार काळे, शनमुखी कोरके, वंदना कांबळे उपस्थित होते.
