सोलापूर : 256 गाळा ते एस. एस. आयकॉन मार्गावरील गोंधळी वस्तीसमोर असलेल्या बटगिरी टॉवेल गोडाऊनला रविवारी अचानक भीषण आग लागल्याने परिसरात एकच खळबळ उडाली. रविवारी दुपारी अडीचच्या सुमारास अचानक आग लागून टॉवेल्सचा साठा व शिलाई मशिन्स जळून खाक झाल्या. या आगीत अंदाजे ५ ते ६ लाख रुपयांचे नुकसान झाल्याची प्राथमिक माहिती समोर आली आहे.
रविवार असल्याने कारखाना बंद होता. त्यामुळे आगीच्या वेळी कारखान्यात कोणीही कर्मचारी नसल्याने कोणतीही जीवितहानी झाली नाही, अशी माहिती कारखान्याचे मालक महेश बडगिरी यांनी दिली.
घटनेची माहिती मिळताच रविवार पेठ अग्निशमन केंद्राकडून पावणे तीनच्या सुमारास तीन अग्निशमन बंब घटनास्थळी रवाना करण्यात आले. जवानांनी पाण्याचा मारा करत आगीवर नियंत्रण मिळविण्यासाठी शर्थीचे प्रयत्न केले. काही तासांच्या प्रयत्नांनंतर आग आटोक्यात आणण्यात यश आले.
कारखान्याच्या पहिल्या मजल्यावरील शिलाई विभागात लागलेली आग अग्निशमन दलाच्या जवानांनी पाण्याचा मारा करून अवघ्या अर्ध्या तासात पूर्णपणे आटोक्यात आणली. त्यामुळे आग इतर विभागात पसरण्यापूर्वीच नियंत्रणात आली, अशी माहिती महापालिकेचे अग्निशमन दल प्रमुख राकेश साळुंखे यांनी दिली.
वीज प्रवाह सतत कमी-जास्त होत असल्याने शॉर्टसर्किटमुळे आग लागली असावी, असा प्राथमिक अंदाज व्यक्त करण्यात येत आहे. मात्र, आगीचे नेमके कारण अद्याप स्पष्ट झालेले नसून पोलिसांकडून या घटनेचा पुढील तपास सुरू आहे.आगीची घटना समजताच परिसरातील नागरिकांनी घटनास्थळी मोठी गर्दी केली.
