सोलापूर – जिद्द, प्रचंड मेहनत आणि पाण्यावर हुकूमत गाजवण्याच्या अद्भूत कौशल्याच्या जोरावर येथील सुपुत्री श्रावणी सूर्यवंशी हिने पुन्हा एकदा देशाच्या क्रीडा जगतात आपला दबदबा निर्माण केला आहे. थायलंडमधील बँकॉक येथे १६ ते २५ जुलै दरम्यान होणाऱ्या १२ व्या एशियन ऐज ग्रुप चॅम्पियनशिप साठी श्रावणीची भारतीय डायव्हिंग संघात निवड झाली आहे.
या आंतरराष्ट्रीय रणसंग्रामात भारताचे प्रतिनिधित्व करण्यासाठी ती नुकतीच बँकॉकसाठी रवाना झाली असून, संपूर्ण देशाचे डोळे आता तिच्या सुवर्णवेधाकडे लागले आहेत.
—–
चाचणी स्पर्धेत ‘तिहेरी’ सुवर्ण
अहमदाबाद येथील वीर सावरकर स्पोर्ट्स कॉम्प्लेक्समध्ये १७ ते १९ जून दरम्यान या स्पर्धेची अत्यंत चुरशीची निवड चाचणी पार पडली. देशभरातील आघाडीच्या खेळाडूंना तगडे आव्हान देत श्रावणीने आपल्या कौशल्याची घोडदौड कायम राखली. तिने १ मीटर, ३ मीटर स्प्रिंग बोर्ड व हायबोर्ड डायव्हिंग या तिन्ही अत्यंत आव्हानात्मक प्रकारांत प्रथम क्रमांक पटकावून भारतीय संघातील आपले स्थान निश्चित केले.
—–
वयाच्या १७ व्या वर्षी ७४ पदकांची कमाई
श्रावणीने शालेय आणि फेडरेशनच्या स्पर्धांमध्ये आजवर मिळवलेल्या यशाचा आलेख थक्क करणारा आहे. तिच्या नावावर तब्बल ५३ सुवर्णपदकांसह ७४ पदकांचा विक्रम नोंदवला गेला आहे:
* राज्य : ३० गोल्ड, ६ सिल्वर, १ ब्रॉन्झ (एकूण ३७ पदके)
* राष्ट्रीय पातळी: २१ गोल्ड, ६ सिल्वर, २ ब्रॉन्झ (एकूण २९ पदके)
आंतरराष्ट्रीय पातळी: २ गोल्ड, ४ सिल्वर, २ ब्रॉन्झ (एकूण ८ पदके)
* एकूण एकत्रित कमाई: ५३ गोल्ड, १६ सिल्वर, ५ ब्रॉन्झ = ७४ पदके
——
यशाचे शिल्पकार: आंतरराष्ट्रीय मार्गदर्शक श्रीकांत शेटे
श्रावणीला या यशाशिखरावर पोहोचवण्यामागे तिचे आंतरराष्ट्रीय दर्जाचे प्रशिक्षक श्रीकांत शेटे यांचे योगदान आहे. त्यांच्या शिस्तबद्ध, कडक आणि शास्त्रोक्त प्रशिक्षणाखालीच श्रावणीने डायव्हिंगमधील अत्यंत अवघड तांत्रिक बारकावे आत्मसात केले असून, तिच्या या यशात सरांचा वाटा सिंहाचा आहे.
——
सुवर्णपदकाची अपेक्षा
वयाच्या अवघ्या १७ व्या वर्षी आंतरराष्ट्रीय स्तरावर भारताचा तिरंगा फडकवण्यासाठी सज्ज झालेल्या या ‘गोल्डन गर्ल’ कडून यंदा बँकॉकच्या भूमीवरही सुवर्णपदकाची मोठी अपेक्षा आहे. श्रावणीच्या या ऐतिहासिक कामगिरीबद्दल सध्या तिच्यावर सर्व स्तरांतून कौतुकाचा आणि शुभेच्छांचा वर्षाव होत आहे.
