सोलापूर – गेल्या १३ वर्षांपासून अविरतपणे गुणवान रायफल शूटर खेळाडू घडवणारी आणि सोलापूरचे नाव राष्ट्रीय व आंतरराष्ट्रीय स्तरावर उज्वल करणारी येथील इंडियन मॉडेल स्कूल मध्ये सुरू असणारी ‘मॉडेल रायफल शूटिंग अकॅडमी’ अचानक बंद करण्यात आली आहे. रेंज शिफ्टिंगमुळे ही शूटिंग रेंज गेल्या दोन महिन्यांपासून बंद असल्याने ३० हून अधिक प्रतिभावान खेळाडूंच्या सरावासमोर मोठा प्रश्नचिन्ह निर्माण झाला आहे.
या रेंजमध्ये राष्ट्रीय आणि इंडिया ट्रायल देणाऱ्या खेळाडूंसह जवळपास ३० खेळाडू दररोज नियमित सराव करत होते. सध्या नॅशनल ट्रायल आणि शालेय स्पर्धा तोंडावर असताना रेंज बंद असल्याने आणि ती कधी सुरू होणार याबाबत खेळाडू व पालक वर्गात गोंधळाचे वातावरण निर्माण झाले आहे.
——-
अकॅडमीची गौरवशाली परंपरा
अविनाश गोसावी यांच्या मार्गदर्शनाखाली चालणाऱ्या या अकॅडमीने आजवर अनेक राष्ट्रीय आणि आंतरराष्ट्रीय पदक विजेते खेळाडू घडवले आहेत. विशेष म्हणजे, विश्वचषक विजेता आंतरराष्ट्रीय खेळाडू पार्थ राकेश माने याने याच शूटिंग रेंजवरून बंदूक धरण्याचे प्राथमिक धडे गिरवत आपल्या यशाची सुरुवात केली होती. गेल्याच वर्षी येथील खेळाडूंनी ‘खेलो इंडिया’ स्पर्धेत चमकदार कामगिरी करत पदक पटकावले. सोलापूर विद्यापीठाच्या इतिहासात शूटिंग स्पर्धेत ऑल इंडिया स्पर्धेत टॉप ८ मध्ये स्थान मिळवणे आणि त्या माध्यमातून ‘खेलो इंडिया’साठी निवड होणे, असे उल्लेखनीय यश या अकॅडमीच्या खेळाडूंनी मिळवून दिले आहे.
——–
अतिशय खर्चिक खेळ
शूटिंग हा अतिशय खर्चिक खेळ आहे. एका खेळाडूची रायफल अंदाजे ४ ते ५ लाख रुपयांना येते, तर शूटिंगसाठी लागणाऱ्या विशेष ड्रेसची किंमत ५० ते ७५ हजार रुपयांच्या घरात असते. तसेच, एक खेळाडू सरासरी महिन्याला ५ ते ६ हजार रुपयांच्या गोळ्या (अॅम्युनिशिन) सरावावर खर्च करत असतो. पालकांचा हा लाखो रुपयांचा खर्च आणि खेळाडूंची मेहनत ऐन महत्त्वाच्या स्पर्धांच्या तोंडावर वाया जाण्याची भीती निर्माण झाली आहे.
—-
इनडोअर हॉल उपलब्ध करून द्यावा
सोलापुरातील क्रीडा क्षेत्राला प्रोत्साहन देणाऱ्या संस्थांनी किंवा प्रशासनाने पुढे येऊन या अकॅडमीसाठी तातडीने ४० बाय ५०चा इनडोअर हॉल उपलब्ध करून द्यावा, अशी आर्त हाक खेळाडू आणि पालकांकडून दिली जात आहे. योग्य जागा मिळाल्यास ही हक्काची शूटिंग रेंज पुन्हा सुरू होईल आणि खेळाडूंचा सराव पूर्ववत होऊ शकेल.
—–
अकॅडमीतून घडलेले राष्ट्रीय व आंतरराष्ट्रीय खेळाडू:
या अकॅडमीच्या माध्यमातून सोलापूरचे नाव देशपातळीवर पोहोचवणारे प्रमुख खेळाडू याप्रमाणे:आंतरराष्ट्रीय: पार्थ माने. राष्ट्रीय : रोहित गायकवाड, ओंकार घोडके, वैष्णवी गायकवाड, सुयोग गायकवाड, कृष्णा बनसोडे, आदिती चोपडे, अवंतिका नारायणकर, जागृती चाकोते, शुभम क्षीरसागर, अलीशा पुरी,श्रद्धा दिवटे,त्वरिता खटके, कैलास शिवशरण.
