मोडनिंब – माढा तालुक्यातील मोडनिंब शहराच्या पाणीपुरवठ्यासाठी जलजीवन मिशन योजनेंतर्गत आणून ठेवण्यात आलेल्या पाइपलाइनच्या साठ्याला मंगळवारी दुपारी चारच्या सुमारास अचानक भीषण आग लागली. पोलिस ठाण्यासमोरच सुमारे तासभर ही आग धुमसत होती. आगीची तीव्रता एवढी होती की, सुमारे २०० ते २५० मीटरच्या परिसरात उष्णतेची तीव्र झळ जाणवत होती. या घटनेत पाइपलाइनचा मोठा साठा जळून खाक झाला असून, परिसरातील झाडेही आगीच्या भक्ष्यस्थानी पडली. लगतच असलेला आर.ओ. प्लांट, शेडचे मोठे नुकसान झाले. सोलरचा ड्यूल पंपाचे मोठे नुकसान झाले. मोडनिंब शहराच्या पाणीपुरवठ्यासाठी जलजीवन मिशन योजनेंतर्गत १२ कोटी ४६ लाख ९८ हजार रुपयांची योजना मंजूर आहे. या योजनेचे काम जानेवारी २०२६ पर्यंत पूर्ण होणे अपेक्षित होते. अनेक वेळा विरोधामुळे हे काम थांबविण्यात आले होते. मागील महिन्यात आलेल्या विधानसभेच्या अंदाजपत्रक समितीने या पाईपची पाहणी करून ठेकेदाराची खरडपट्टी काढली होती. त्यानंतरही झालेल्या दुर्लक्षा मुळे आजची घटना घडल्याची चर्चा नागरिकांमधून होत आहे. मात्र, पाइपलाइनचा साठा मोकळ्या जागेत ठेवण्यात आल्याने तसेच त्याच्या सुरक्षिततेकडे संबंधितांकडून पुरेसे लक्ष देण्यात आले नसल्याचा आरोप नागरिकांकडून करण्यात येत आहे. आगीमुळे परिसरात मोठ्या प्रमाणात धुराचे काळे लोट पसरले होते. सुमारे पाच ते सहा किलोमीटर अंतरावरूनही धूर दिसत असल्याने घटनास्थळी नागरिकांची मोठी गर्दी झाली होती. आग आटोक्यात आणण्यासाठी विठ्ठलराव शिंदे साखर कारखाना व श्री विठ्ठल सहकारी साखर कारखान्याच्या अग्निशामक वाहनास पाचारण करण्यात आले. अग्निशामक दलाच्या प्रयत्नांनंतर आग आटोक्यात आली.दरम्यान, आगीच्या ज्वाळा परिसरातील महावितरणच्या वीजतारांपर्यंत पोहोचल्याने तारांचेही नुकसान झाले. घटनास्थळाजवळच ट्रान्सफॉर्मर असल्याने नागरिकांमध्ये काही काळ भीतीचे वातावरण निर्माण झाले होते. सुदैवाने ट्रान्सफॉर्मरचे मोठे नुकसान झाले नाही. आगीचे नेमके कारण अद्याप स्पष्ट झालेले नाही. पाइपलाइनचा मोठ्या प्रमाणात साठा जळाल्याने शासनाच्या लाखो रुपयांच्या निधीतून उभारण्यात येत असलेल्या योजनेचे नुकसान झाले आहे. या घटनेची चौकशी करण्याची मागणी ग्रामस्थातून होत आहे. अंगणवाडी ची इमारत नादुरुस्त झाल्याने गणपती मंदिराच्या सभामंडपातच अंगणवाडी भरवण्यात येते. दुपारनंतर ही आग लागल्याने मोठा धोका टळल्याचे स्थानिकांनी सांगितले.
लाखोंचे नुकसान
आगीत शासनाच्या पाइपचे सुमारे २० लाख रुपये, गणपती मंदिरातील गाभारा, सभामंडप व इतर साहित्याचे सुमारे २० लाख रुपये, तर ग्रामपंचायतीच्या पाणी फिल्टर, ओपन जिम व सोलर सिस्टिमचे अंदाजे १२ लाख रुपयांचे नुकसान झाल्याची प्राथमिक माहिती आहे. नुकसानीचा अंतिम आकडा पंचनामा व पाहणीनंतर स्पष्ट होणार आहे.
आग लागून जलजीवन मिशनच्या कामासाठी ठेवण्यात आलेल्या पाईप जळाल्या आहेत. याबाबत पोलिसांत तक्रार दाखल करण्यात येणार आहे. पंचनामा झाल्यानंतर झालेल्या नुकसानीची आकडेवारी समोर येईल.
– गायधनकर व्ही. बी.
उपभियंता, महाराष्ट्र जीवन प्राधिकरण उपविभाग बार्शी
मोडनिंबपासून सुमारे ५ किलोमीटर अंतरावर होतो. त्या ठिकाणाहूनही मोडनिंबच्या दिशेने आकाशात मोठमोठे धुराचे काळे लोट स्पष्ट दिसत होते. एवढ्या मोठ्या प्रमाणात धूर दिसत असल्याने काहीतरी दुर्घटना घडल्याचे जाणवत होते. नंतर चौकशी केल्यानंतर पाइपलाइनच्या साठ्याला आग लागल्याचे समजल्याचे उपस्थित नागरिकांनी सांगितले.
