पुणे शहरात रस्त्यांच्या विस्तार करण्यासाठी जागाच शिल्लक नाही. त्यामुळे भविष्यात शहरामध्ये हवेत चालणाऱ्या बसेस आणाव्या लागतील. यासंदर्भात आपल्याकडे प्रेझेंटेशन असल्याचे प्रतिपादन केंद्रीय रस्ते वाहतूक मंत्री नितीन गडकरी यांनी केले. ते आज, शनिवारी पुण्यातील चांदणी चौकातील नवीन पुलाच्या लोकार्पण कार्यक्रमात बोलत होते.
यावेळी गडकरी म्हणाले की, पुण्यातील रस्ते विस्तारासाठी जागाच शिल्लक नाहीत. त्यामुळे भविष्यात हवेत चालणाऱ्या बसेस आणाव्या लागतील. माझ्याकडे त्याचं प्रेझेंटेशन आहे. अजितदादा आणि चंद्रकांत दादा तुम्ही दोघांनी हा प्रकल्प बघून घ्यावा, असे गडकरींनी सांगितले.पुण्याला पेट्रोल, डिझेलपासून मुक्त केले तर चाळीस टक्के प्रदूषण कमी होईल. त्यासाठी इथेनॉल, मिथेनॉल आणि हायड्रोजन याचा वापर वाढवा. मला भारतातून पेट्रोल आणि डिझेल हद्दपार करायचे आहे. इथेनॉल, मिथेनॉल आणि हायड्रोजन याचा वापर वाढवा. मी स्वत: दिल्लीत हायड्रोजनवर चालणारी कार वापरतो असे गडकरी म्हणाले. पुण्यात प्रदूषण खूप वाढले आहे. त्यामुळे पुणे अजून वाढवू नका, शहराला मोकळा श्वास घेऊ द्या, पुण्याला जुने दिवस आणा, असे आवाहन त्यांनी केले.
पुणे शहराच्या विस्तारासाठी आता जागा शिल्लक नाही. त्यामुळे इथे अतिरिक्त लोकसंख्या देखील समायोजित होऊ शकत नाही. तेव्हा पुणे आता अधिक वाढवून आणखी प्रदूषित करु नका असे गडकरींनी सांगितले. जुन्या आठवणीचे स्मरण करताना गडकरी म्हणाले की, लहान असताना माझ्या बहिणीकडे स्वारगेटला रहायला यायचो तेव्हा पर्वतीवरुन गार हवा येत होती. परंतु आता ही हवा हरवली आहे. पुणे सर्वाधिक प्रदूषित शहर झाले आहे. मंत्र्यांच्या ताफ्यात असणाऱ्या वाहनांचे सायरन काढणार असल्याची घोषणा नितीन गडकरी यांनी केलीये. लवकरच कर्णकर्कश हॉर्न ऐवजी मधूर आणि सुरेल भारतीय वाद्यांच्या आवाजाचे हॉर्न बसवण्यात येणार आहे.चांदणी चौकातल्या पुलाचे उद्घाटन केले असले तरी त्याचं नाव अद्याप ठरलेले नाही. यावर नितीन गडकरी म्हणाले की, चांदणी चौकातल्या पुलाचे नाव हे अजित पवार व देवेंद्र फडणवीस यांनी मिळून ठरवा. जे ठरवायचे ते ठरवा. तुम्ही एकमताने ठरवाल त्या नावाला एकमातने अनुमती देईन अशी ग्वाही त्यांनी दिली.
