सोलापूर : जानेवारी महिन्यात भरणाऱ्या श्री शिवयोगी सिद्धरामेश्वर यात्रेतील गड्डा यात्रेची आठवण करून देणारा आनंद मेळा आता होम मैदानावर तब्बल ६० दिवस रंगणार आहे. या मेळ्यासाठी महापालिकेच्या मालकीचे होम मैदान भाडेतत्त्वावर देण्यात आले असून त्यातून महापालिका तिजोरीत १२ लाख रुपयांचे उत्पन्न जमा होणार आहे.
महापालिकेच्या रिक्त जागांचा नियोजनबद्ध वापर करून उत्पन्न वाढविण्याच्या दृष्टीने भूमी व मालमत्ता विभागाकडून चांगले प्रयत्न करण्यात येत असल्याचे दिसून येते.
होम मैदानावरील या आनंद मेळ्यात लहान मुलांपासून ते मोठ्यांपर्यंत सर्वांसाठी विविध आकर्षणे असणार आहेत. टोरा-टोरा, ड्रॅगन ट्रेन, अवाढव्य आकाश पाळणा, ब्रेक डान्स, सुनामी, स्ट्रीट टॉवर, कप-सासर, रेंजर पाळणा यांसारख्या थरारक राईड्स नागरिकांच्या मनोरंजनासाठी सज्ज होत आहेत. याशिवाय थराराचा थेट अनुभव देणारा ‘मौत का कुआ’ हेही प्रमुख आकर्षण ठरणार आहे. मेळाव्याच्या प्रवेशद्वारासाठी यंदा विशेष वॉटर फॉल अर्थात धबधबा थीमवर आधारित भव्य सजावट करण्यात येत आहे. या आकर्षक प्रवेशद्वारामुळे मेळाव्याच्या सौंदर्यात भर पडणार आहे. तसेच मेळाव्यात उभारण्यात येणाऱ्या अवाढव्य पाळण्यांच्या सुरक्षित जुळणीसाठी कर्नाटक, केरळ, बिहार आणि उत्तर प्रदेशमधील तज्ज्ञ कामगार अहोरात्र मेहनत घेत आहेत.
दरम्यान, होम मैदान ६० दिवसांसाठी आरक्षित करण्यात आले असून त्यासाठी १२ लाख रुपये भाडे आकारण्यात आले आहे. याशिवाय क्राफ्ट उत्सवासाठी देण्यात आलेल्या जागेच्या भाड्यापोटी आणखी दीड लाख रुपयांचे उत्पन्न महापालिकेला मिळणार आहे. इतर वेळी रिकामी असलेल्या या मैदानासाठी चांगले भाडे मिळत आहे. भूमी व मालमत्ता विभागाने चांगला पुढाकार घेतला आहे.
महापालिकेच्या रिक्त जागांचा नियोजनबद्ध वापर करून उत्पन्न वाढविण्याच्या दृष्टीने हा उपक्रम महत्त्वाचा मानला जात असून, सोलापूरकरांसाठी मनोरंजनाची पर्वणी आणि महापालिकेसाठी उत्पन्नाचा नवा स्रोत ठरणार आहे.
