मंगळवेढा – तीर्थक्षेत्र माचणूर येथील श्री सिध्देश्वराच्या दर्शनासाठी महाशिवरात्रीच्या पार्श्वभूमीवर आंध्र,कर्नाटक,महाराष्ट्र,गोवा आदी राज्यातून लाखाच्या जवळपास भाविकांनी हजेरी लावून मनोभावे दर्शन घेतले. दरम्यान पहाटे पाच वाजता प्रांताधिकारी बी.आर माळी, तसेच तहसिलदार मदन जाधव व त्यांच्या सौभाग्यवती निशा जाधव यांच्या हस्ते श्री ची पुजा करुन दुग्धाभिषेक केल्यानंतर भाविकांना दर्शनासाठी मंदिर खूले करण्यात आले. हर हर महादेव च्या जयघोषाने पहाटेपासून मंदिर परिसर दणाणून गेला होता.
सोलापूर पासून 40 कि.मी.,मंगळवेढ्यापासून 14 कि.मी. अंतरावर भीमा नदीच्या कडेकपारीत भव्य असे हेमाडपंथी माचणूर येथे श्री सिध्देश्वराचे पुरातन मंदिर असून प्रतिवर्षी महाशिवरात्रीला येथे 5 दिवस यात्रा भरली जाते. यात्रेनिमित्त येथे विविध धार्मिक कार्यक्रमाचे आयोजनही केले जाते.
महाशिवरात्रीदिवशी माचणूर गावातील श्री ची पालखी सायंकाळी मंदिराकडे येते व या पालखीचा मंदिरात 5 दिवस मुक्काम असतो, पाचव्या दिवशी पुन्हा श्री ची पालखी माचणूर गावाकडे मार्गस्थ होते. महाशिवरात्रीच्या पार्श्वभूमीवर भाविकांनी भीमा नदीत पहाटे स्नान करुन काही भक्तांनी ओल्या पडद्याने दर्शन घेतले. मंदिर परिसरात मेवा मिठाई,रसपानगृह,स्टेशनरी दुकाने, नारळ,फुल विक्रेते , विविध पाळणे व अन्य छोटीमोठी दुकाने परिसरात थाटली आहेत.
कर्नाटक,आंध्र,महाराष्ट्रातील कानाकोपर्यातून लगत असलेल्या सोलापूर,मोहोळ,पंढरपूर,सांगोला व अन्य भागातून दिवसभर दर्शनासाठी भाविकांची रिघ असल्याने लांबलचक मंदिरात भाविकांच्या रांगा लागल्याचे चित्र होते. श्री च्या पालखीचे आगमन झाल्यानंतर सायंकाळी मंदिर परिसरात आरत्याचा कार्यक्रम घेण्यात आला. यावेळी नवसापोटी भाविकांनी पेढा,साखर आदींचे वाटप करुन आनंद व्दिगुणीत केला. काही भाविकांनी नवसापोटी मंदिराच्या वेशीपासून ते नदी पर्यंत प्रत्येक पायरीला नारळ फोडून आपले बोललेले नवस पुर्ण केल्याचे दिसून येत होते. मंगळवेढा एस.टी.आगाराने माचणूर यात्रेसाठी ज्यादा गाड्या सोडून भाविकांची सोय केली होती. पंचक्रोशीतील भाविक हे पारंपारिक पध्दतीने बैलांना रंगवून त्यांच्यावर झुल घालून बैलगाडीतून कुटूंबासह दर्शनाला येत असल्याचे चित्र होते. काही भाविकांनी मोटर सायकलवर कुटूंबासह येणे पसंत केले. दरम्यान यात्रेसाठी डी.वाय.एस.डी.डॉ.बसवराज शिवपुजे यांच्या मार्गदर्शनाखाली पोलीस निरीक्षक दत्तात्रय बोरीगिड्डे यांनी पोलीस निरीक्षक,सहाय्यक पोलीस निरीक्षक,पोलीस उपनिरीक्षक तीन,एस.सी.बीचे एक पथक,वाहतूक शाखेचे दहा पोलीस पथक,तीस अंमलदार, 15 होमगार्ड,आर.सी.पी.प्लॅटून एक राखीव फोर्स असा पोलीस बंदोबस्त नेमण्यात आला होता. कुठेही अनुचित प्रकार न घडता यात्रेचा पहिला दिवस शांततेत पार पडला.
पोलीस अधिक्षक अतुल कुलकर्णी यांनी श्री सिध्देश्वराचे मनोभावे दर्शन घेवून महापालिका,जिल्हा परिषद,पंचायत समिती निवडणूका शांततेत पार पाडल्या. भविष्यातही जिल्ह्यात शांतता नांदो अशी श्री सिध्देश्वराला प्रार्थना केली.
फोटो ओळी
श्री सिध्देश्वर मंदिरात भाविकांची दर्शनासाठी लावलेली रिघ छायाचित्रात दिसत आहे. (छाया- प्रथमेशराजे,मंगळवेढा)
पोलीस अधिक्षक अतुल कुलकर्णी यांचा देवस्थानच्यावतीने सत्कार करताना देवस्थानचे पुजारी छायाचित्रात दिसत आहेत. (छाया-प्रथमेशराजे,मंगळवेढा)
