सोलापूर : सार्वत्रिक निवडणुकीनंतर सोलापूर महानगरपालिकेची पहिली विशेष सभा शुक्रवार दि. ६ फेब्रुवारी रोजी सकाळी ११ वाजता कौन्सिल हॉलमध्ये होणार आहे. या सभेत अडीच वर्षांसाठी महापौर व उपमहापौरांची निवड केली जाणार आहे. सभेच्या अध्यक्षस्थानी अपर जिल्हाधिकारी गणेश निऱ्हाळी राहणार आहेत. आवश्यकतेनुसार निवडणूक प्रक्रिया हात वर करून मतदानाने पार पडणार आहे.
मुंबई प्रांतिक महानगरपालिका (महापौर व उपमहापौर पदांसाठी निवडणूक घेणे) नियम, २००५ तसेच विभागीय आयुक्त, पुणे विभाग, पुणे यांचेकडील आदेश क्र. नपाप्र/४/कावि/५१/२०२६, दि. २३ जानेवारी २०२६ अन्वये सार्वत्रिक निवडणुकीनंतर सोलापूर महानगरपालिकेची पहिली विशेष सभा शुक्रवार, दि. ६ फेब्रुवारी २०२६ रोजी सकाळी ११ वाजता महापालिकेच्या कै. यशवंतराव बळवंतराव चव्हाण सभागृहात (कौन्सिल हॉल) आयोजित करण्यात आली आहे. या सभेच्या अध्यक्षस्थानी पुणे विभागीय आयुक्त यांचे प्रतिनिधी तथा सोलापूरचे अपर जिल्हाधिकारी गणेश निऱ्हाळी हे राहणार आहेत. महाराष्ट्र महानगरपालिका अधिनियमाच्या कलम १९ (१) नुसार सार्वत्रिक निवडणुकीनंतरच्या पहिल्या बैठकीत अडीच वर्षांच्या कालावधीसाठी महापौर व उपमहापौरांची निवड करण्यात येणार आहे. महाराष्ट्र शासन राजपत्रानुसार महापौर पद हे अनारक्षित (खुल्या) प्रवर्गासाठी राहणार आहे.
सोलापूर महानगरपालिकेचे नगरसचिव प्रविण दंतकाळे यांनी याबाबतची कार्यपत्रिका क्र. १ प्रसिद्ध केली आहे. ही कार्यपत्रिका महाराष्ट्र महानगरपालिका अधिनियमाच्या अनुसूची प्रकरण २ अंतर्गत काढण्यात आली आहे. सोमवार, दि. २ फेब्रुवारी २०२६ रोजी महापौर व उपमहापौर पदासाठी इच्छुक उमेदवारांसाठीची नामनिर्देशन पत्रे नगरसचिव कार्यालयात स्वीकारण्यात आली आहेत. सभागृहात उपस्थित राहणाऱ्या सदस्यांनी शासनमान्य ओळखपत्र तसेच निवडणूक निर्णय अधिकारी यांनी दिलेल्या प्रमाणपत्राची छायांकित प्रत सोबत बाळगणे आवश्यक असल्याचेही सूचित करण्यात आले आहे. नामनिर्देशन पत्रांची छाननी तसेच उमेदवारी परत घेण्याची प्रक्रिया शुक्रवार, दि. ६ फेब्रुवारी २०२६ रोजी सकाळी ११ वाजता सभा सुरू झाल्यानंतर नियमांनुसार पार पडणार आहे.पिठासीन अधिकारी म्हणून अप्पर जिल्हाधिकारी गणेश निऱ्हाळी हे राहणार आहेत. यावेळी सुरुवातीला अर्ज छाननी, अंतिम उमेदवार यादी जाहीर करणे त्यानंतर उमेदवारी अर्ज मागे घेण्यासाठी 15 मिनिटे वेळ दिला जाणार आहे. दरम्यान, आवश्यकतेनुसार मतदान हात वर करून घेतले जाणार आहे. मुंबई प्रांतिक महानगरपालिका (महापौर व उपमहापौर पदांसाठी निवडणूक घेणे) नियम, २००५ मधील नियम ७ (३) नुसार हात वर करून मतदान करण्यात येणार आहे. या सभेसाठी महापालिकेतील कै. यशवंतराव बळवंतराव चव्हाण सभागृहात जय्यत तयारी करण्यात आली आहे.
महापौर–उपमहापौर निवडणूक उमेदवारी चित्र
* महापौर पदासाठी उमेदवार :
भाजप : विनायक रामकृष्ण कोंड्याल
शिवसेना (शिंदे गट) : प्रियदर्शन बाळासाहेब साठे
एमआयएम : तौफिक बाबुमियाँ हत्तुरे.
* उपमहापौर पदासाठी उमेदवार :
भाजप : ज्ञानेश्वरी महेश देवकर
शिवसेना (शिंदे गट) : प्रियदर्शन बाळासाहेब साठे
एमएमएम : आसिफ अहमद पीर अहमद शेख.
