बार्शी – शहरातील भगवंत मैदान येथे दि. २१ ते २८ एप्रिल या कालावधीत आयोजित करण्यात येणाऱ्या श्री भगवंत महोत्सव २०२६ निमित्त मुख्य रंगमंचाचे भूमिपूजन मोठ्या उत्साहात पार पडले. या महोत्सवात भारतभर गाजलेले विविध सांस्कृतिक कार्यक्रमांची पर्वणी बार्शीकरांना अनुभवायला मिळणार असून शहरात उत्साहाचे वातावरण निर्माण झाले आहे.
हा महोत्सव श्री भगवंत देवस्थान ट्रस्ट, बार्शी नगरपरिषद, कृषी उत्पन्न बाजार समिती आणि श्री भगवंत बहुद्देशीय संस्था यांच्या संयुक्त विद्यमाने आयोजित करण्यात आला आहे. मुख्य रंगमंचाचे भूमिपूजन विविध क्षेत्रातील मान्यवरांच्या हस्ते संपन्न झाले.
भूमिपूजन सोहळ्यावेळी विशेष आकर्षण ठरले ते मंगळवार दि.२१ एप्रिल रोजी होणाऱ्या क्रांती नाना मळेगावकर प्रस्तुत ‘न्यू होम मिनिस्टर’ या कार्यक्रमाच्या पोस्टरचे प्रकाशन. बार्शीतील माता-भगिनींसाठी हा कार्यक्रम विशेष मनोरंजनाचा ठरणार असल्याचे आयोजकांनी सांगितले.
मुख्य रंगमंचाच्या भूमिपूजन कार्यक्रमास माजी आमदार राजेंद्र राऊत, सोलापूर जिल्हा परिषद अध्यक्ष दिपक वैद्य, नगराध्यक्षा तेजस्विनी कथले, पंचायत समिती सभापती मीनाक्षी रोंगे, बाजार समिती सभापती विजय गरड, माजी नगराध्यक्ष ॲड. आसिफ तांबोळी, माजी नगराध्यक्ष रमेश पाटील, भगवंत देवस्थान ट्रस्ट अध्यक्ष दादा बुडूख, श्री शिवाजी शिक्षण प्रसारक मंडळ अध्यक्ष डॉ. बी. वाय. यादव, शिवशक्ती बँकेचे चेअरमन डॉ. प्रकाश बुरुगुटे, बार्शी नगरपालिकेचे मुख्याधिकारी मुलाणी, बाजार समिती उपसभापती बाबा गायकवाड, प्रशांत कथले, दिलीप गांधी यांच्यासह नगरसेवक, संचालक, जिल्हा परिषद सदस्य, पंचायत समिती सदस्य तसेच श्री भगवंत महोत्सव समितीचे सर्व सदस्य मोठ्या संख्येने उपस्थित होते.
या भूमिपूजनामुळे श्री भगवंत महोत्सवाच्या तयारीला वेग आला असून येत्या काही दिवसांत भगवंत मैदानात भव्य रंगमंच उभारणीचे काम पूर्ण होणार आहे. बार्शीकरांसाठी हा महोत्सव सांस्कृतिक पर्वणी ठरणार असल्याचे आयोजकांनी सांगितले.
