सोलापूर : शहरात भीम जयंती सप्ताहास उत्साही वातावरणात मध्यरात्रीपासून प्रारंभ झाला. यानिमित्ताने अवघे शहर नटले आहे. मध्यरात्रीपासूनच प्रज्ञासूर्यास अभिवादनासाठी जनसागर लोटला होता. पालकमंत्री जयकुमार गोरे यांच्यासह विविध पक्ष, सामाजिक – संस्था संघटनांच्या वतीने डॉ. आंबेडकर यांच्या पुतळ्यास अभिवादन करण्यात आले. रखरखत्या उन्हातही अभिवादनासाठी मोठी गर्दी झाली होती.
विश्वभूषण डॉ. बाबासाहेब आंबेडकर यांच्या जयंतीनिमित्त सोलापूर शहरात विविध शेकडो मंडळांच्या वतीने मध्यरात्री 12 वाजता डॉ. आंबेडकर यांच्या प्रतिमेची प्रतिष्ठापना सजवलेल्या आकर्षक अशा मंडपामध्ये करण्यात आली. त्रिशरण, पंचशील सामुदायिक बुद्ध वंदना घेऊन अभिवादन करण्यात आले. शहरात विविध भागांमध्ये विद्युत रोषणाईचा लखलखाट दिसून आला. “जय भीम”च्या गगनभेदी घोषणा देण्यात आल्या.
महिलांसह अबाल वृद्ध अनुयायांचे जथेंच्या जथें पार्क स्टेडियम जवळील विश्वभूषण डॉ. आंबेडकर यांच्या पुतळ्यास अभिवादन करण्यासाठी मध्यरात्रीपासूनच जनसागर लोटला होता.विविध संस्था, संघटना, राजकीय पक्षांच्या वतीने प्रज्ञासूर्यास अभिवादन करण्यात आले.
“बोलो रे बोलो, जय भीम बोलो”, “ताकत से बोलो, जय भीम बोलो”, “हिम्मत से बोलो, जय भीम बोलो”, “जोर से बोलो, जय भीम बोलो” असा नारा देत हातात निळा झेंडा घेऊन भीम अनुयायी डॉ. आंबेडकर चौकाकडे येत होते. डॉ. आंबेडकर चौक येथील त्यांच्या पुतळ्यास मनोभावे जनसागर नतमस्तक झाला. निळ व गुलालांची मुक्त उधळण करण्यात आली. उत्साही वातावरणात भीम जयंती सप्ताह प्रारंभ झाला.
यावर्षी दिनांक 14 ते 19 एप्रिल 2026 दरम्यान भीम जयंती सप्ताह साजरा करण्यात येत आहे. रविवार दि.19 एप्रिल 2025 रोजी भीम जयंती सप्ताहाची भव्य अशा विराट मिरवणुकीने सांगता होणार आहे. या जयंती सप्ताहास उत्साही वातावरणात मध्यरात्री 12 वाजल्यापासून प्रारंभ झाला. सुमारे 450 मंडळांनी आकर्षक सजवलेल्या व विद्युत रोषणाईने नटलेल्या मंडपामध्ये डॉ. आंबेडकर यांच्या प्रतिमेची प्रतिष्ठापना मध्यरात्री केली. जयंतीनिमित्ताने अवघे सोलापूर शहर नटले आहे. दोन्ही मध्यवर्ती महामंडळाच्या वतीने विश्वस्त समिती व पदाधिकाऱ्यांनी अभिवादन केले.
भीम जयंती निमित्त आज सकाळपासूनच पार्क स्टेडियम जवळील विश्वभूषण डॉ. आंबेडकर यांचा पुतळा आणि मिलिंद नगर येथील भारतरत्न बाबासाहेब आंबेडकर अस्थिविहार प्रेरणाभूमी येथे अभिवादनासाठी अलोट गर्दी झाली होती. त्रिशरण – पंचशील सामुदायिक बुद्ध वंदना घेऊन अनुयायांनी अभिवादन केले. सकाळी समता सैनिक दलाच्या वतीने मानवंदना देण्यात आली. तसेच भारतीय बौद्ध महासभेअंतर्गत समता सैनिक दलाच्या वतीने अभिवादन करण्यात आले. विविध पक्ष, सामाजिक – संस्था संघटनांच्या वतीने डॉ. आंबेडकर यांच्या पुतळ्यास अभिवादन करण्यात आले.
छत्रपती शिवाजी महाराज चौक येथील भारतरत्न डॉक्टर बाबासाहेब आंबेडकर जयंती उत्सव मंडळाच्या वतीने मध्यरात्री प्रतिमेची प्रतिष्ठापना करण्यात आली. विश्वभूषण डॉ. बाबासाहेब आंबेडकर यांच्या हयातीत सन 1955 मध्ये रेखाटलेल्या प्रतिमेची या मंडपात प्रतिष्ठापना करण्यात येते. त्रिशरण पंचशील सामुदायिक बुद्ध वंदना घेण्यात आली. यावेळी सतीश सरवदे, ॲड. अश्विन बनसोडे, डॉ. शैलेश सुरते, किरण जाधव, तळभंडारे,
सुरज आबुटे, सिद्धार्थ तळभंडारे , बाळू गायकवाड, मनीष तळभंडारे यांच्यासह पदाधिकारी व कार्यकर्ते उपस्थित होते.
पुस्तकांसह विविध स्टॉल्सवर गर्दी
डॉ. आंबेडकर चौकात पुस्तक, तथागत बुद्ध, डॉ. आंबेडकर यांची मूर्ती, कॅलेंडर , टोप्या व इतर चळवळीतील साहित्यांच्या विविध स्टॉल्सवर खरेदीसाठी मोठी गर्दी झाली होती. या स्टॉल्सवर मोठ्या प्रमाणात पुस्तक विक्री झाली असल्याचे दिसून आले.
पालकमंत्र्यांसह पदाधिकाऱ्यांनी केले अभिवादन
पालकमंत्री जयकुमार गोरे यांनी भारतरत्न डॉ. बाबासाहेब आंबेडकर यांच्या पुतळ्यास अभिवादन केले. यावेळी त्यांच्या समवेत आ. देवेंद्र कोठे, आ. सचिन कल्याणशेट्टी, महापौर विनायक कोंड्याल, समाज कल्याणच्या सहाय्यक आयुक्त सुलोचना सोनवणे, नगरसेविका रोहिणी तडवळकर, भाजप जिल्हाध्यक्ष शशिकांत चव्हाण, भाजपचे प्रदेश कार्यकारणी सदस्य शहाजी पवार , नगरसेवक गणेश वानकर , किसन जाधव, माजी नगरसेवक आनंद चंदनशिवे, रॉकी बंगाळे यांच्यासह पदाधिकारी उपस्थित होते.
सोशल मीडियावर शुभेच्छांचा वर्षाव
जयंतीचा उत्साह केवळ प्रत्यक्षातच नव्हे तर सोशल मीडियावरही दिसून आला.फेसबुक , इंस्टाग्राम , (ट्विटर) आणि व्हाट्सअँप स्टेटसवर दिवसभर शुभेच्छांचा वर्षाव झाला. प्रत्येकजण बाबासाहेबांच्या विचारांचे संदेश शेअर करत जयंती साजरी करत होता.
निळे फेटे, झेंडे घेऊन तरुणाईचा उत्स्फूर्त सहभाग
जयंतीनिमित्त तरुणाई मोठ्या अभिवादनासाठी येत होते. निळे फेटे, झेंडे, बाबासाहेबांचे फोटो असलेले टी-शर्ट परिधान करून तरुण-तरुणींनी अभिवादन केले. या उत्स्फूर्त सहभागामुळे परिसरात विशेष उत्साहाचे वातावरण निर्माण झाले होते.
सह्यांची मोहिम व मोफत सिम वितरण
अनुसूचित जाती उपवर्गीकरणाला विरोध दर्शवण्यासाठी पुतळा परिसरात सह्यांची मोहिम राबविण्यात आली. या मोहिमेला नागरिकांचा उत्स्फूर्त प्रतिसाद मिळाला. तसेच भारत संचार निगम लिमिटेडच्या वतीने जयंतीनिमित्त मोफत सिम कार्डचे वितरण करण्यात आले.
शेकडो पोलिसांचा चोख बंदोबस्त
जयंतीनिमित्त कोणताही अनुचित प्रकार घडू नये आणि कायदा सुव्यवस्थेचा प्रश्न उद्भवू नये यासाठी सोलापूर शहर पोलीसांनी संपूर्ण शहरात कडक बंदोबस्त ठेवला होता. प्रमुख ठिकाणी पोलिसांची मोठी फौज तैनात करण्यात आली होती.
सामाजिक उपक्रमांनी अभिवादन
विविध संस्था व मंडळांच्या वतीने रक्तदान शिबिरे, १८ तास अभ्यास उपक्रम आदी कार्यक्रम राबवून डॉ. बाबासाहेबांना अभिवादन करण्यात आले. समाजातील सर्व घटकांनी यात सहभाग घेतला.
