अज्ञात वाहनाच्या धडकेत जखमी झालेल्या नळदुर्गच्या दुचाकीस्वाराचा मृत्यू
सोलापूर – अज्ञात चारचाकी वाहनाच्या धडकेत जखमी झालेल्या नळदुर्गच्या एका दुचाकी स्वाराचा उपचारादरम्यान येथील शासकीय रुग्णालयात आज शुक्रवारी सकाळी दहा वाजता मृत्यू झाला.
किशोर कोंडीबा बनसोडे ( वय 42 वर्ष , राहणार नळदुर्ग ) असे त्या मयत दुचाकी स्वाराचे नाव असून तो 27 मे रोजी रात्री धाराशिव कडून नळदुर्ग कडे मोटरसायकल वरून डबल सीट निघाला असताना वाटेत बसवंती पाटी तुळजापूर रोडवर अज्ञात चार चाकी वाहनाने त्याला पाठीमागून धडक दिली . या धडकेत मार लागून गंभीर जखमी झाल्याने त्याला दोन दवाखान्यात उपचार करून येथील शासकीय रुग्णालयात मेव्हणा कुणाल कांबळे यांनी आज शुक्रवारी पहाटे एक वाजता बेशुद्ध अवस्थेत दाखल केले असता त्याचा उपचारादरम्यान सकाळी दहा वाजता मृत्यू झाला.
पाणी समजून थिनर पिलेल्या 9 वर्षाच्या मुलाचा अखेर मृत्यू
सोलापूर – पाणी समजून थिनर पिलेल्या एका नऊ वर्षाच्या मुलाचा उपचार दरम्यान येथील शासकीय रुग्णालयात आज शुक्रवारी सकाळी दहा वाजता मृत्यू झाला .
आरव भैरवनाथ माने (वय 9 वर्ष , रा. अकोलीकाठी , उत्तर सोलापूर ) असे त्या मयत मुलाचे नाव आहे . 22 मे रोजी सायंकाळी पाच वाजता राहत्या घरासमोर खेळत असताना त्याने चुकून पाणी समजून थिनर पिले होते . त्याचा त्रास होऊ लागल्याने त्याला बीबीदारफळ येथील एका खाजगी दवाखान्यात उपचार करून आजोबा नामदेव माने यांनी त्वरित येथील शासकीय रुग्णालयात दाखल केले असता त्याचा आज सकाळी मृत्यू झाला .
एमआयटी कॉलेज समोर डिव्हायडर ला धडकून दुचाकीस्वार जागीच ठार
सोलापूर – भरधाव दुचाकी रस्त्याकडेच्या दुभाजकाला धडकून झालेल्या अपघातात बेळगावचा दुचाकी स्वार जागीच ठार झाल्याची घटना केगाव येथील एमआयटी कॉलेज समोरील ब्रिज जवळ गुरुवारी दुपारी घडली .
सर्वेश निजप्पा गुरव ( वय 42 वर्ष , रा. धमकण , मरडी , जी. बेळगाव ) असे त्या मयत दुचाकीस्वाराचे नाव असून तो गुरुवारी बेळगावहून संभाजीनगर कडे जाण्यासाठी दुचाकी वरून निघाला असताना दुपारी पावणे दोन वाजेच्या सुमारास तो विजापूर पुणे बायपास रोड वरून केगाव एमआयटी कॉलेज जवळील ब्रिजवरून खाली उतरत असताना त्याची दुचाकी बाजूच्या डिव्हायडर ला धडकली . त्यात तो गंभीर जखमी होऊन बेशुद्ध पडला . त्याला एका रुग्णवाहिकेतून सायंकाळी चार वाजता येथील शासकीय रुग्णालयात दाखल करण्यात आले असता डॉक्टरांनी त्याला मृत घोषित केले .
शंकर नगरात तरुणाची छताच्या पंख्याला गळफास घेऊन आत्महत्या
सोलापूर – अज्ञात कारणावरून एका 38 वर्षीय तरुणाने घरातील छताच्या पंख्याला लुंगीच्या साह्याने गळफास घेऊन आत्महत्या केल्याची घटना होडगी रोडवरील शंकर नगरात गुरुवारी दुपारी दोन वाजता उघडकीस आली .
अमोघसिद्ध अशोक मोरे (वय 38 वर्ष , रा. 88 / बी, शंकर नगर होडगी रोड, सोलापूर )असे त्या मयत तरुणाचे नाव आहे . गुरुवारी दुपारच्या सुमारास त्याचा मृतदेह घरात गळफास घेतलेल्या अवस्थेत घरच्यांना आढळून आला . ही खबर एमआयडीसी पोलिसांना समजली असता हवालदार एस एस कांबळे यांनी घटनास्थळी पोहचून सदरचा मृतदेह इतरांच्या साह्याने खाली उतरवून येथील शासकीय रुग्णालयात सायंकाळी पाच वाजता शवविच्छेदनासाठी दाखल केला.
बोरीच्या झाडाला गुळवेलच्यावेलीने गळफास घेऊन 26 वर्षाच्या तरुणीची आत्महत्या
सोलापूर – अज्ञात-करणावरून एका 26 वर्षाच्या तरुणीने बोरीच्या झाडाला गुळवेलच्यावेलीने गळफास घेऊन आत्महत्या केल्याची घटना दक्षिण सोलापूर तालुक्यातील उळे शिवारातील एका शेतात गुरुवारी सकाळी साडे दहा वाजता उघडकीस आली .
अर्चना अनिल भाकरे (वय 26 वर्ष , रा . हनुमान नगर , भवानी पेठ सोलापूर ) असे त्या मयत तरुणीचे नाव आहे . गुरुवारी सकाळी उळे शिवारातील होनसळ जाणाऱ्या रस्त्या बाजूला असलेल्या निवृत्ती कोळी यांच्या शेतातील बोरीच्या झाडाला अर्चना भाकरे याचा मृतदेह गळफास घेतलेल्या अवस्थेत आढळून आला .ही खबर गावचे पोलीस पाटील कुंभार यांनी सोलापूर तालुका पोलिसांना कळविली . पोलीस हवलदार एम ए भंडारी यांनी घटनास्थळी पोहचून गावकऱ्यांच्या मदतीने वेली तोडून अर्चना भाकरे हिचा मृतदेह खाली उतरविला व पंचनामा करून मृतदेह यादीसह येथील शासकीय रुग्णालयात शव विच्छेदनासाठी दुपारी साडेबारा वाजता दाखल केला .
