बार्शी – धसपिंपळगाव रोडवरील अध्यात्मा आश्रम परिसराजवळ असलेल्या एका कोल्ड्रिंक्सच्या गोडाऊनमधून अनोळखी चोरट्यांनी धाडसी चोरी केल्याची घटना उघडकीस आली आहे. चोरट्यांनी गोडाऊनच्या छताचे पत्रे उचकटून आत प्रवेश केला आणि ४१,००० रुपये किमतीचे ‘स्टिंग’ कोल्ड्रिंक्सचे ८२ बॉक्स चोरुन नेले. याप्रकरणी बार्शी शहर पोलीस ठाण्यात अनोळखी चोरट्याविरुद्ध गुन्हा दाखल करण्यात आला आहे.
फिर्यादी संदीप राजेश जगताप (वय ३२, रा. १४ नंबर शाळेच्या पाठीमागे, सुभाषनगर, बार्शी) यांचा कोल्ड्रिंक्स विक्रीचा व्यवसाय आहे. धसपिंपळगाव रोडवर अध्यात्मा आश्रम जवळ त्यांचे विविध प्रकारच्या कोल्ड्रिंक्सचे गोडाऊन आहे.
रविवारी फिर्यादी जगताप यांनी आपले गोडाऊन नेहमीप्रमाणे व्यवस्थित बंद करुन मुख्य दरवाजाला कुलूप लावले होते आणि ते घरी गेले होते. त्यानंतर सोमवारी सकाळी जगताप हे नेहमीप्रमाणे गोडाऊन उघडण्यासाठी आले असता, त्यांना गोडाऊनच्या छताचा एक पत्रा वर उचकटून तोडलेल्या अवस्थेत दिसला. गोडाऊनमध्ये काहीतरी विपरीत घडल्याची शंका आल्याने त्यांनी तातडीने आत जाऊन तपासणी केली.
गोडाऊनची पाहणी केली व असता, आतमध्ये विक्रीसाठी ठेवलेले ‘स्टिंग’ कोल्ड्रिंक्सचे ८२ बॉक्स गायब असल्याचे त्यांच्या निदर्शनास आले.
चोरट्यांनी केवळ मालाचीच चोरी केली नाही तर चोरी करताना पकडले जाऊ नये म्हणून हुशारीने गोडाऊनमधील इलेक्ट्रिक मीटरच्या वायर आणि सीसीटीव्ही कॅमेऱ्याची बटणेही बंद केली होती, असे तपासात समोर आले आहे. गोडाऊनमधून चोरट्याने छताचा पत्रा उचकटून आत प्रवेश करुन चोरुन नेल्याची खात्री पटल्यानंतर, संदीप जगताप यांनी बार्शी शहर पोलीस ठाण्यात धाव घेऊन रीतसर तक्रार दाखल केली.
