सोलापूर : बुद्धभूमी संस्थेच्या वतीने बुद्ध पौर्णिमेचा उत्सव मोठ्या उत्साहात आणि सामाजिक बांधिलकीतून साजरा करण्यात आला. या निमित्ताने ५० चिमुकल्यांना ‘क्रांतीज्योती सावित्री’ कॉमिक बुकचे वाटप करण्यात आले.
महापुरुषांचे विचार बालवयातच मुलांपर्यंत पोहोचावेत, या हेतूने राबवलेल्या या उपक्रमाचे सर्वत्र कौतुक होत आहे. कार्यक्रमाची सुरुवात सामुदायिक बुद्ध वंदनेने झाली. त्यानंतर कृषी अधिकारी ऋतुराज सरवदे आणि निखिल कोयले यांच्या हस्ते तथागत गौतम बुद्ध मूर्तीचे पूजन आणि डॉ. बाबासाहेब आंबेडकर यांच्या प्रतिमेस पुष्पहार अर्पण करून अभिवादन करण्यात आले. संस्थेचे संस्थापक अध्यक्ष धम्मपाल मैंदर्गीकर यांच्या मार्गदर्शनाखाली हा उपक्रम पार पडला.
याप्रसंगी सागर कांबळे, भीमा इंगळे, राजू पाटील, पप्पू वाघमारे, गुड्डू तळभंडारे, अमोल पांढरे यांच्यासह शेकडो कार्यकर्ते उपस्थित होते. पुस्तकांसोबतच बालकांना खाऊवाटपही करण्यात आले. ‘या पुस्तकामुळे मुलांना सावित्रीबाई फुलेंच्या संघर्षाची ओळख होईल,’ असा विश्वास आयोजकांनी व्यक्त केला. कार्यक्रमाचे सूत्रसंचालन अनुराग सुतकर यांनी केले.
