सोलापूर – मनुस्मृतीने वर्ण व्यवस्थेच्या माध्यमातून समाजाचे शोषण करण्याचा अधिकार वरिष्ठ वर्गाला दिला होता. स्त्रियांना तुच्छ लेखले होते. तिचे स्वातंत्र्य हिरावून घेतले होते व तिला परावलंबी बनवले होते म्हणून डॉ. बाबासाहेब आंबेडकर यांनी मनुस्मृतीचे दहन केले व पुढे कामगार मंत्री झाल्यानंतर हिंदू कोड बिलाच्या माध्यमातून स्त्री मुक्तीचा मार्ग आखून दिला असे प्रतिपादन प्रमुख पाहुणे डॉ. परमेश्वर सूर्यवंशी यांनी केले.
पद्मशाली शिक्षण संस्था संचलित ए. आर. बुर्ला महिला महाविद्यालयातील राष्ट्रीय सेवा योजना व इतिहास अभ्यास मंडळ यांच्या संयुक्त विद्यमाने डॉ. बाबासाहेब आंबेडकर यांच्या 135 व्या जयंतीनिमित्त आयोजित कार्यक्रमात ते बोलत होते. कार्यक्रमाच्या अध्यक्षस्थानी महाविद्यालयाचे प्राचार्य डॉ. अशोक यक्कलदेवी होते. व्यासपीठावर डॉ. ॲनी जॉन, टी.एन. शिंदे आदी मान्यवर उपस्थित होते. पुढे बोलताना डॉ.सूर्यवंशी म्हणाले की, डॉ. बाबासाहेब आंबेडकर यांचे विचार हे मानवजातीच्या कल्याणाचे होते.
वंचित, शोषित व पीडित यांची उन्नती व्हावी. मिळणारे स्वातंत्र्य सर्वांना उपभोगायला मिळावे असा त्यांचा आग्रह होता.जो धर्मग्रंथ भेदभाव करतो, स्त्रियांना कमी लेखतो अशा धर्मग्रंथाचे दहन करण्याचा बाणेदार विचार त्यांनी लहानपणीच बोलून दाखवला होता. त्यांचे विचार अनुकरणीय आहेत. त्यांच्या विचाराबाबत अंतर्मुख होऊन आजच्या पिढीने विचार करावा. त्याचबरोबर त्यांनी तयार केलेले संविधान सर्व जाती व धर्म यांना एकत्र बांधून ठेवून देशाला एकसंघ बनविणारे आहेत हे आपणास विसरून चालणार नाही. यावेळी घेण्यात आलेल्या वक्तृत्व स्पर्धेमध्ये कु.श्रावणी पाटील कु.विपत्तिका गायकवाड कु.साक्षी गंदुरे व प्राची भोसले यांनी भाग घेतला होता.
महाविद्यालयाचे प्राचार्य डॉ. अशोक यक्कलदेवी अध्यक्षीय भाषणात म्हणाले की, डॉ. बाबासाहेब आंबेडकर हे केवळ भारतालाच नव्हे तर जगासाठी आदरणीय आहेत. ते जागतिक अभ्यासाचा विषय आहेत. याचा विचार करुन आज भारतीयांनीही त्यांच्या विचारांचा जागर केला पाहिजे.
कार्यक्रमाचे प्रास्ताविक व सूत्रसंचालन राष्ट्रीय सेवा योजनेचे कार्यक्रम अधिकारी डॉ. शंकर राजे यांनी केले. उपस्थितांचे आभार डॉ.डी. एम.बताले यांनी मानले. सदर कार्यक्रमास महाविद्यालयातील प्राध्यापक वर्ग, कार्यालयीन कर्मचारी व विद्यार्थ्यांनी बहुसंख्येने उपस्थित होत्या.
फोटोओळ – ए.आर. बुर्ला महिला महाविद्यालयात आयोजित डॉ. बाबासाहेब आंबेडकर यांच्या जयंतीनिमित्त मार्गदर्शन करताना डॉ. परमेश्वर सूर्यवंशी व व्यासपीठावर उपस्थित प्राचार्य डॉ. अशोक यक्कलदेवी डॉ. शंकर राजे, डॉ.ॲनी जॉन आणि डॉ. टी. एन.शिंदे
