सोलापूर : खबरी कडून मिळालेल्या माहितीवरून शहर गुन्हे शाखेच्या पोलीस पथकाने मोदी मुस्लिम कब्रस्तान समोरील व्हीआयपी रोडवर एका कारमधून २ कोटी रुपयाचा ९५० ग्राम वजनाचा अंमली पदार्थाचा साठा ( मेफेड्रोन )जप्त केला आहे. सदर कारवाईत दोन आरोपींना अटक करून एका महिलेसह चार जणांविरुद् सदर बजार पोलीस ठाण्यात गुन्हा दाखल करण्यात आला आहे अशी माहिती पोलिस आयुक्त गोहर हसन यांनी आज मंगळवार रोजी पत्रकार परिषदेत दिली.
ही कारवाई आज मंगळवारी सकाळी सहा वाजता झाली असून रिजवान शब्बीर खान (वय २८, रा. नई जिंदगी), साहिल सिकंदर पिरजादे (वय २५, रा. मंत्री चंडक नगर) या दोन मुख्य आरोपींना अटक केली आहे.दोन्ही आरोपींना दुपारी न्यायालयात हजर करण्यात आले. दोघांनाही चार दिवसांची पोलिस कोठडी सुनावली. तर इतर आरोपींची नावे अफजल मुर्शद (रा. मुस्लीम कब्रस्तान जवळ, सोलापूर ) आणि साहील सिकंदर पिरजादे याची पत्नी कायनात साहील पिरजादे ऊर्फ कायनात साहील खान ( वय ३० वर्षे, मुळ पत्ता- रुम नं.- ३८४, जनता सेवक सोसायटी, एल.जे. रोड माहीम (पश्चिम), मुंबई, सध्या रा. फ्लॅट नं. ४०६ अल्तमश अपार्टमेंट मंत्रीचंडक नगर, सोलापूर ) अशी असून आरोपी अफजल मुर्षद हा फरार झाला आहे.
मंगळवारी १२ मे रोजी सकाळी ६ वाजण्याच्या सुमारास, व्हीआयपी रोडवरील संगमेश्वर कॉलेजकडे जाणाऱ्या रस्त्यावर एका संशयास्पद कारमध्ये अंमली पदार्थ असल्याची गोपनीय माहिती पोलीस शिपाई भारत पाटील यांना मिळाली.होती .आरोपींवर पाळत ठेवायची होती; पण कशी? मग पोलिसांनी शक्कल लढविली. मोदी कबरस्तान ते संगमेश्वर कॉलेज या मार्गावर मॉर्निंग वॉक करत असल्याचे भासविले. त्यांना अपेक्षित असलेली कार थांबलेली दिसली अन् त्या वॉकिंग करणाऱ्या सपोनि दत्तात्रय काळे व त्यांच्या पथकाने कारला घेराव घातला. कारची तपासणी केली असता चालकाच्या सीट शेजारील ड्रॉव्हरमध्ये एका प्लास्टिक पिशवीत पांढऱ्या रंगाचे स्फटीक सापडले. तपासणी ते अमली पदार्थ असल्याचे निष्पन्न झाले .पोलिसांनी या कारवाईत १ कोटी ९० लाख रुपये किमतीचे ९५० ग्रॅम मेफेड्रोन व १० लाख रुपये किमतीची मोटार कार जप्त केली आहे.
सदरची कामगिरी पोलीस आयुक्त एम. राज कुमार, पोलीस उपायुक्त गोहर हसन, डॉ. अश्विनी पाटील आणि सहा. पोलीस आयुक्त राजन माने यांच्या मार्गदर्शनाखाली शहर गुन्हे शाखेचे वरिष्ठ पोलीस निरीक्षक अरविंद माने, सपोनि दत्तात्रय काळे, अंमलदार नंदराम गायकवाड, भारत पाटील, सिद्धाराम देशमुख, अनिल जाधव, महेश शिंदे आणि संजय साळुंखे यांच्या पथकाने पार पाडली आहे.
