स्टॉक मार्केटमध्ये दीर्घकाळापासून सुरू असलेली ऐतिहासिक तेजी आजही कायम राहिली असून भारतीय शेअर बाजाराची आठवड्याच्या सुरुवातीला रेकॉर्ड-ब्रेक ओपनिंग झाली आहे. शेअर बाजारातील या ऐतिहासिक रॅलीमध्ये दोन्ही मार्केट निर्देशांक (सेन्सेक्स आणि निफ्टी) सातत्याने नव्या शिखरावर चढाई करून इतिहास रचत आहेत. नव्या आर्थिक वर्षात नवा सर्वकालिक उच्चांक गाठल्यानंतर सोमवारी देशांतर्गत बाजाराच्या नावावर नवा इतिहास नोंदवला गेला. इतिहासात पहिल्यांदाच बीएसईवर सूचीबद्ध कंपन्यांचे मार्केट कॅप (बाजार भांडवल) ४०० लाख कोटी रुपयांच्या पुढे गेला आहे.
शेअर बाजारात ऐतिहासिक तेजी
नव्या आठवड्याच्या पहिल्या व्यापार दिवशी शेअर बाजारात जबरदस्त तेजी पाहायला मिल्लई असून शुक्रवारी, अमेरिकन शेअर बाजारातील तेजी आणि आयटी व ऑटो स्टॉकमधील तेजीच्या जोरावर बाजार उघडताच बीएसई सेन्सेक्स आणि एनएसई निफ्टीने नवीन इतिहास रचला. सेन्सेक्सने ४०० हून अधिक अंकांची उडी घेत ७४,६५८ अंकांवर झेप घेतली तर निफ्टी १०० हून अधिक अंकांनी वाढून २२,६२३ अंकांवर उसळला. यासह भारताच्या मार्केट कॅपने प्रथमच ४०० लाख कोटी रुपयांचा टप्पा ओलांडला. सुरुवातीच्या व्यवहारात निफ्टीच्या ५० पैकी ४१ शेअर्समध्ये तेजी दिसून आली.
सुरुवातीच्या सत्रात बीपीसीएल, टाटा स्टील, ॲक्सिस बँक, बजाज फिनसर्व्ह आणि टायटन कंपनीने सर्वाधिक नफा नोंदवला, तर अदानी पोर्ट्स, अपोलो हॉस्पिटल्स, विप्रो, डिवीज लॅबोरेटरीज आणि एचडीएफसी बँकेत सर्वाधिक पडझड दिसून आली.
भारतीय शेअर बाजार सुस्साट
एकूणच देशांतर्गत शेअर बाजाराला सर्व शेअर्समधील लक्षणीय तेजीचा फायदा झाला. बीएसईवर दिलेल्या माहितीनुसार निर्देशांकावर सूचीबद्ध सर्व कंपन्यांचे एकूण बाजार भांडवल सकाळच्या सत्रात ४,००,८८,७१६.०४ कोटी रुपयांवर पोहोचले तर कोणत्याही भारतीय मार्केटच्या मार्केट कॅपने ४०० लाख कोटी रुपयांचा टप्पा ओलांडण्याची ही पहिलीच वेळ आहे.
भारतीय मार्केट पाच ट्रिलियनच्या दिशेने अग्रेसर
दुसरीकडे डॉलरनुसार बीएसईवर सूचिबद्ध कंपन्यांचा मार्केट कॅप आता ४.८१ ट्रिलियन डॉलरवर पोहोचला आहे. गेल्या वर्षी नोव्हेंबर २०२३ च्या अखेरीस बीएसई मार्केट कॅपने प्रथमच ४ ट्रिलियन डॉलर्सचा टप्पा ओलांडला होता तर आता हा आकडा अवघ्या चार महिन्यांत पाच ट्रिलियन डॉलर्स पार करण्याच्या अगदी जवळ पोहोचला आहे. तसेच बीएसईनंतर, नॅशनल स्टॉक एक्सचेंजने देखील डिसेंबर २०२३ च्या सुरुवातीला चार ट्रिलियन डॉलरचा टप्पा ओलांडला होता.
शेअर बाजारती स्थिती काय
क्षेत्रीय निर्देशांकांबद्दल बोलायचे तर ऊर्जा, स्थावर मालमत्ता आणि धातू शेअर्समध्ये सर्वाधिक वाढ झाली. निफ्टीच्या १५ क्षेत्रीय निर्देशांकांपैकी १२ तेजीत व्यवहार करत आहेत तर निफ्टी ऑइल अँड गॅस आणि निफ्टी रिॲल्टी एक टक्क्याहून अधिकने वधारले. तसेच ऑटो आणि आयटीमध्येही खरेदी दिसून येत आहेमी पण बँकिंग शेअर्समध्ये, विशेषतः सार्वजनिक क्षेत्रातील बँकांमध्ये पडझड होत असून बँक निफ्टी ०.०९% घसरून ४८,४४८ अंकांवर व्यवहार करत होता.
