बिलोली – गाढव व खेचर (अश्ववर्गीय) प्राण्यांच्या उपचारात पशुधन सहाय्यक (LSS) व पशुधन पर्यवेक्षक यांची भूमिका अत्यंत महत्वाची असल्याने, त्यांच्यासाठी “अश्ववर्गीय प्राण्यांमधील आरोग्य समस्या व त्यांचे व्यवस्थापन, व्यावहारिक मार्गदर्शन” या विषयावर सगरोळी (ता.बिलोली) येथे “धर्मा डॉंकी सँच्यूअरी” व जिल्हा पशुसंवर्धन विभागाच्या वतीने विशेष प्रशिक्षण वर्गाचे आयोजन करण्यात आले होते, या प्रशिक्षणासाठी नांदेड जिल्ह्यातील तब्बल १०० सहाय्यक पशुधन विकास अधिकारी व पशुधन पर्यवेक्षकांनी उपस्थिती लावली होती.
येथील कृषी विज्ञान केंद्राचे विषय विशेषज्ञ डॉ. निहाल मुल्ला यांनी “कार्यरत अश्ववर्गीय प्राण्यांमधील आरोग्य समस्या व त्यांचे व्यवस्थापन, व्यावहारिक मार्गदर्शन” या विषयावर माहिती दिली व प्रशिक्षणार्थींच्या प्रश्नांना उत्तरे दिली. पशुसंवर्धन विभाग नायगाव येथील सहाय्यक आय्युक्त डॉ. गौतम खिल्लारे यांनी “पशुपालक आणि दवाखाना यांच्यातील दुरावा कमी करण्या हेतू शासन स्तरावर करावयाच्या उपाययोजना” बाबत मार्गदर्शन केले. सगरोळी येथील पशुवैद्यकीय दवाखान्यातील कार्यरत पशुवैद्यक विकास गड्डेवाड यांनी “प्राणी क्लेश प्रतिबंध कायदा १९६०” यावरती प्रकाश टाकला.
बिलोली तालुक्याचे पशुवैद्यकीय विस्तार अधिकारी डॉ. शंकर उदगिरे यांनी, लसीकरण व कृमिनाशकचे महत्व संगून मात्रा व पद्धत सांगितली यासह त्यांनी पोटसूळ आजाराची लक्षणे, निदान व उपचार पद्धतीवर प्रकाश टाकला. उपचार करताना गाढव प्राण्यास कसे हाताळावे त्यास हेडकॉलर कसे घालावे याचे प्रत्याक्षित देण्यात आले.
सदर प्रशिक्षण जिल्हा पशुसंवर्धन उपआयुक्त डॉ. राजकुमार पडीले आणि पशुवैद्यकीय अधिकारी डॉ. प्रवीणकुमार घुले यांच्या पुढाकाराने आयोजित करण्यात आले होते. या प्रशिक्षणामुळे जिल्ह्यातील गाढव व खेचर या प्राण्यांना योग्य उपचार मिळतील यासाठी या प्रशिक्षणाचे आयोजन करण्यात आले होते. यावेळी धर्मा डॉंकी सँच्यूअरी संस्थेचे विश्वस्त रोहित देशमुख, अभिजीत महाजन, यांची उपस्थिती होती, कार्यक्रम यशस्वितेकरिता अंकुश देशमुख, अनन्याकश्यप राव यांनी परिश्रम घेतले.
