पंढरपूर – श्री क्षेत्र पंढरपूर येथील सांस्कृतिक परंपरा टिकवून ठेवण्यासाठी आणि आदरणीय सुधाकरपंत परिचारक यांच्या स्मृतींच्या आठवणी प्रित्यर्थ नवीन वर्षाच्या स्वागतासाठी महाराष्ट्रातील छोटे उस्ताद मी होणार सुपरस्टार फेम राजयोग धूरी यांच्या गायनाचे आयोजन करण्यात आले होते.
कार्यक्रमाच्या सुरवातीला प्रास्ताविकात एस.पी.कुलकर्णी यांनी नवोदित कलाकारांना व्यासपीठ उपलब्ध करून देण्याची सांस्कृतिक परंपरा, चळवळ आधी होती तीच पुढे सुरू राहावी या उद्देशाने पुन्हा सुरू करत आहोत. यावेळी माजी आमदार प्रशांत परिचारक, युटोपियन शुगर्सचे अध्यक्ष उमेश परिचारक, राजयोग धूरी, प्रवीण बानकर, माधव कुलकर्णी,ज्ञानेश्वर दुधाणे ,डॉ.प्रसाद कुलकर्णी यांचे हस्ते (कै.) सुधाकरपंत परिचारकांच्या प्रतिमेचे पूजन होऊन दीपप्रज्वलन करून कार्यक्रमाला सुरुवात झाली.
त्यानंतर राजयोग धूरी यांच्या सुरेल गायनाला सुरुवात करत शास्त्रीय संगीतातील मुरलीधर श्याम या बंदिशीचे सुरुवात करत अनेक संगीतकारांनी संगीतबद्ध केलेल्या अभंग रचना सादर करत त्यामध्ये माझे माहेर पंढरी, राजस सुकुमार मदनाचा पुतळा, वृंदावनी वेणू, माझे जीवन गाणे, ऐसी लागी लगन, घेई छंद मकरंद आणि शेवटी कानडा राजा पंढरीचा या अभंगांने स्वर तरंग कार्यक्रमाची सांगता करत सर्व उपस्थित कला रसिक श्रोत्यांना मंत्रमुग्ध केले.
या कार्यक्रमात त्यांना तितकीच सुंदर साथसंगत निवेदन अभय नलगे, हार्मोनियम प्रवीण बानकर,तबला प्रसाद करंबेळकर, पखवाज प्रथमेश तारळकर,सिंथेसाईजर ज्ञानयोग धूरी टाळ यश खाडे आदींनी करत कार्यक्रमाला रंगत आणली.यावेळी आभार ज्ञानेश्वर दुधाणे यांनी मानले. कार्यक्रमास पंढरपूर आणि पंचक्रोशीतील कलासाधक आणि कलारसिकांनी मोठ्या संख्येने गर्दी करत उदंड प्रतिसाद दिला.
———————–
साहित्य संस्कृती जपण्यासाठी प्रयत्न करुयात
यावेळी माजी आमदार प्रशांत परिचारक यांनी मनोगतात कला साहित्य संस्कृती आहे. यावरुन शहराची श्रीमंती समजते आणि सातत्याने कार्यरत राहत ही संस्कृती जपण्यासाठी आपण सर्वांनी प्रयत्न करुयात असे सांगितले.
