वैराग – बार्शी तालुका आणि शहर परिसरात गेल्या काही दिवसांपासून फोफावणाऱ्या गुन्हेगारीला लगाम घालण्यासाठी पोलिसांनी गुरुवारी मध्यरात्री ‘अॅक्शन मोड’मध्ये येत मोठी कारवाई केली. एकाच रात्री दोन वेगवेगळ्या मोहिमा राबवत पोलिसांनी जिथे महामार्गावर शस्त्रास्त्रांचा साठा जप्त केला, तिथेच शहरातील अश्लील डान्स बारवर छापा टाकून लाखो रुपयांचा मुद्देमाल जस्त केला आहे. या कारवाईमुळे अवैध धंदेवाल्यांचे आणि गुन्हेगारांचे धाबे दणाणले आहेत.
१. ‘हॉटेल स्वामिनी’समोर थरार: पिस्तूल आणि तलवारींसह दोन तरुण गजाआड
बार्शी-कुर्डूवाडी रोडवरील शेंद्री फाट्याजवळ पोलिसांनी फिल्मी स्टाईलने पाठलाग करून दोन तरुणांना अटक केली. पहाटे ३:२० च्या सुमारास गस्तीवर असलेल्या पथकाला ‘हॉटेल स्वामिनी’ समोर हे तरुण संशयास्पद रित्या आढळले. झडती घेतली असता त्यांच्याकडे भीषण शस्त्रसाठा सापडला.
अटक केलेले आरोपी: ऋषिकेश रामेश्वर टिंगरे (वय २२, रा. शेंद्री) आणि तुषार रणजित शिंदे (वय १७, रा. वांगरवाडी).
जप्त शस्त्रे: १ गावठी बनावटीचे पिस्तूल, १ लोखंडी तलवार, ३ धारदार कोयते आणि एक विना क्रमांकाची स्प्लेंडर दुचाकी.
कायदेशीर कारवाई: पोलीस अंमलदार नागनाथ आंधळे यांच्या फिर्यादीवरून शस्त्र अधिनियम (Arms Act) अंतर्गत गुन्हा दाखल करण्यात आला असून पोलीस नाईक चौधरी पुढील तपास करत आहेत.
२. सँट्रो ऑर्केस्ट्रा बारवर पोलिसांचा छापा; ५७ लाखांचा मुद्देमाल जप्त
मालवंडी रोडवरील ‘सँट्रो ऑर्केस्ट्रा बार’मध्ये छुप्या पद्धतीने सुरू असलेल्या अश्लील नृत्यावर पोलिसांनी मध्यरात्री धाड टाकली. या कारवाईने बार्शीतील अनधिकृत छमछम थांबवण्यात पोलिसांना यश आले आहे.
मोठी जप्ती: पोलिसांनी कारवाईत एकूण ५७ लाख ५१ हजार २५५ रुपयांचा मुद्देमाल हस्तगत केला. यामध्ये फॉर्च्युनर आणि क्रेटा सारख्या ७ आलिशान गाड्या, ५१ मोबाईल आणि रोख रकमेचा समावेश आहे.
कारवाई: बार मालक, मॅनेजर आणि ९ ग्राहकांसह एकूण १८ नर्तिकांवर कायदेशीर कारवाई करण्यात आली आहे.
३. शासकीय कामात अडथळा; अॅट्रॉसिटीचा गुन्हा दाखल
तिसऱ्या एका घटनेत, बोरगाव खुर्द येथे जिल्हा परिषद शाळेच्या सुरू असलेल्या कामात अडथळा आणून जातीवाचक शिवीगाळ केल्याप्रकरणी पोलिसांनी संबंधित आरोपीवर अॅट्रॉसिटी अंतर्गत गुन्हा दाखल केला आहे.
बार्शीत ५ महिन्यांत ८ पिस्तूल; कायदा-सुव्यवस्थेचा प्रश्न गंभीर?
गेल्या पाच महिन्यांत बार्शी परिसरातून तब्बल ८ पिस्तूल हस्तगत करण्यात आले आहेत. इतक्या मोठ्या प्रमाणात शस्त्रे येतात कुठून? या तरुणांना कोणाचे राजकीय किंवा गुन्हेगारी अभय मिळत आहे? असे प्रश्न आता नागरिक विचारत आहेत. मात्र, एकाच रात्री केलेल्या या मोठ्या कारवायांमुळे पोलिसांच्या तत्परतेचे सर्व स्तरांतून कौतुक होत आहे.
“बार्शी तालुक्यात अवैध धंदे आणि शस्त्रे बाळगणाऱ्यांची गय केली जाणार नाही. गुन्हेगारी मुळासकट उपटून टाकण्यासाठी ही तर फक्त सुरुवात आहे!”
— दिलीप ढेरे (सहायक पोलीस निरीक्षक, बार्शी तालुका पोलीस स्टेशन ग्रामीण)
