सोलापूर – शहर व जिल्ह्यामध्ये वाहतुकीचे नियम धाब्यावर बसवून, वैध कागदपत्रे व परवाने जवळ न बाळगता बेकायदेशीरपणे वाहतूक करणे आणि अवैध प्रवासी वाहतूक सुरू असल्याबाबत प्रादेशिक परिवहन कार्यालयाकडे वारंवार तक्रारी प्राप्त होत होत्या. या तक्रारींची गंभीर दखल घेऊन मंत्री (परिवहन), महाराष्ट्र राज्य व परिवहन आयुक्त यांच्या निर्देशानुसार तसेच प्रादेशिक परिवहन अधिकारी, सोलापूर यांच्या मार्गदर्शनाखाली सोलापूर शहर व जिल्ह्यात विशेष वाहन तपासणी मोहीम राबविण्यात आली.
या मोहिमेसाठी प्रादेशिक परिवहन कार्यालयातील ६ वायुवेग पथके व एसटी पथक तैनात करण्यात आले आहेत. शहर व जिल्ह्याच्या विविध भागांत राबविण्यात आलेल्या या मोहिमेत रस्ते सुरक्षा आणि वाहतूक नियमांचे उल्लंघन करणाऱ्या चालकांवर मोटार वाहन कायद्यातील तरतुदींनुसार कडक कारवाई करण्यात आली. यात दोषी आढळलेली एकूण २०२ वाहने आढळली आहेत.
त्यांना या करिता एकूण रु. २०,२७,०००/ इतका दंड ठोठावण्यात आला आहे. अवैध वाहतुकीमुळे रस्ते सुरक्षेचा प्रश्न गंभीर होत असून, भविष्यातही अशा प्रकारची धडक मोहीम सातत्याने सुरू राहणार आहे. तरी सर्व वाहनधारकांनी आपल्या वाहनांवी कागदपत्रे, विमा आणि चालक परवाना (License) वैध ठेवाबा, तसेच वाहतुकीच्या नियमांचे काटेकोरपणे पालन करून प्रशासनास सहकार्य करावे, असे आवाहन प्रादेशिक परिवहन कार्यालयामार्फत करण्यात येत आहे.
